រដ្ឋមន្ត្រីក្រសួងធនធានទឹក ស្នើដល់ AFD ជួយពន្លឿនការងារគម្រោងអភិវឌ្ឍន៍ស្ទឹងស្វាយចេក ដើម្បីឱ្យភាគីទាំងពីរអាចចុះហត្ថលេខាលើឯកសារហិរញ្ញប្បទានក្នុងខែតុលា ឆ្នាំ២០២៤
ភ្នំពេញ៖ នាព្រឹកថ្ងៃព្រហស្បតិ៍ ១០រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៩ ខែសីហា ឆ្នាំ២០២៤នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយមបានអនុញ្ញាតឱ្យលោក Emmanuel DOLLFUS នាយកស្ដីទីនៃទីភ្នាក់ងារបារាំងសម្រាប់អភិវឌ្ឍន៍ (AFD) ដឹកនាំគណៈប្រតិភូចូលជួបសម្ដែងការគួរសម និងពិភាក្សាអំពីគម្រោងអភិវឌ្ឍន៍នានាលើវិស័យធនធានទឹក និងឧតុនិយមនៅកម្ពុជា។
ក្នុងកិច្ចជំនួប ឯកឧត្តមរដ្ឋមន្ត្រី បានសម្តែងនូវការស្វាគមន៍ ចំពោះគណៈប្រតិភូទីភ្នាក់បារាំងសម្រាប់អភិវឌ្ឍន៍ (AFD) ដែលបានឆ្លៀតពេលដ៏មមាញឹកដើម្បីចូលជួបសម្តែងការគួរសម និងពិភាក្សាការងារ ព្រមទាំងបានថ្លែងអំណរគុណដល់ទីភ្នាក់ងារបារាំងសម្រាប់អភិវឌ្ឍន៍ (AFD) ជាពិសេសសាធារណរដ្ឋបារាំងដែលតែងតែជួយគាំទ្រដល់ប្រទេសកម្ពុជាគ្រប់កាលៈទេសៈ និយាយដោយឡែកការចូលរួមចំណែកយ៉ាងធំធេងលើវិស័យធនធានទឹក និងឧតុនិយម។
ឯកឧត្តមរដ្ឋមន្ត្រី បានបញ្ជាក់ប្រាប់ប្រតិភូបារាំងថា កម្មវិធីគ្រប់គ្រងធនធានទឹក និងផ្លាស់ប្តូរកសិកម្មនៅប្រទេសកម្ពុជា ជំហានទី១ (WAT4CAM-1) ដែលបាននិងកំពុងអនុវត្តនៅតាមបណ្តាខេត្តមួយចំនួន បានចូលរួមចំណែកយ៉ាងធំធេងក្នុងការធានានូវសុវត្ថិភាពទឹកឆ្លើយតបទៅនឹងការប្រែប្រួលអាកាសធាតុ និងជាកម្លាំងចលករជួយជំរុញដល់កំណើនសេដ្ឋកិច្ចកាត់បន្ថយភាពក្រីក្រ ស្របតាមយុទ្ធសាស្ត្របញ្ចកោណដំណាក់កាលទី១ នៃរាជរដ្ឋាភិបាលនីតិកាលទី៧ នៃរដ្ឋសភាដែលបានកំណត់យកទឹកជាវិស័យអាទិភាពមួយក្នុងចំណោមអាទិភាពគន្លឹះចំនួន៥ គឺ៖ មនុស្ស ផ្លូវ ទឹក ភ្លើង និងបច្ចេកវិទ្យា។
ទន្ទឹមនឹងនេះ ឯកឧត្តមរដ្ឋមន្ត្រី បានជំរុញដល់ក្រុមការងារទាំងអស់សហការពន្លឿនការងារគម្រោង WAT4CAM ជំហានទី១ ដែលកំពុងអនុវត្ត និងបានសូមឱ្យភាគីបារាំងផ្តល់ជំនួយឥតសំណងសម្រាប់ការសិក្សាគម្រោង WAT4CAM ជំហានទី២ បន្តទៀត។ ជាពិសេសស្នើដល់ទីភ្នាក់ងារបារាំងសម្រាប់អភិវឌ្ឍន៍ (AFD) ជួយសហការពន្លឿនការងារគម្រោងអភិវឌ្ឍន៍ស្ទឹងស្វាយចេក ដើម្បីឱ្យភាគីទាំងពីរអាចចុះហត្ថលេខាលើឯកសារហិរញ្ញប្បទានក្នុងខែតុលា ឆ្នាំ២០២៤ និងអនុវត្ដភ្លាមៗ ដោយយកគំរូអនុវត្តស្ទឹងស្វាយចេកតាមបែបដំណោះស្រាយធម្មជាតិ (Natural Base Solution)។
តំណាងគណៈប្រតិភូទីភ្នាក់ងារបារាំងសម្រាប់អភិវឌ្ឍន៍ (AFD) លោក Emmanuel DOLLFUS បានវាយតម្លៃខ្ពស់ចំពោះកិច្ចសហប្រតិបត្តិការនាពេលកន្លងមក ជាពិសេសការចុះពិនិត្យដោយផ្ទាល់ពីវឌ្ឍនភាពគម្រោងក្រោមកម្មវិធី WAT4CAM ជំហានទី១ ក្នុងខេត្តបាត់ដំបងកាលពីពេលថ្មីៗនេះ និងបានថ្លែងនូវការកោតសរសើរដល់ក្រុមការងារអនុវត្តកម្មវិធី រួមទាំងក្រុមទីប្រឹក្សាបច្ចេកទេសដែលបានអនុវត្តប្រកបដោយប្រសិទ្ធភាព។ ជាមួយគ្នានេះដែរ តំណាងគណៈប្រតិភូបារាំងបានបញ្ជាក់ពីជំហរក្នុងការបន្តពង្រឹងកិច្ចសហប្រតិបត្តិការ ដើម្បីជួយអភិវឌ្ឍន៍វិស័យធនធានទឹក និងឧតុនិយមនៅកម្ពុជាឱ្យកាន់តែមានការរីកចម្រើន។
សូមបញ្ជាក់ថា ក្រសួងធនធានទឹក និងឧតុនិយមកំពុងសហការយ៉ាងជិតស្និទ្ធជាមួយទីភ្នាក់ងារបារាំងសម្រាប់អភិវឌ្ឍន៍ (AFD) រៀបចំនីតិវិធីលក្ខខណ្ឌយោង និងសេចក្ដីព្រាងកិច្ចព្រមព្រៀង គម្រោងស្ដារឡើវិញ និងគ្រប់គ្រងស្ទឹងស្វាយចេកប្រកបដោយប្រសិទ្ធភាព ក្រោមហិរញ្ញប្បទានរបស់ទីភ្នាក់ងារបារាំងសម្រាប់អភិវឌ្ឍន៍ ដែលនឹងគ្រោងចុះហត្ថលេខាលើកិច្ចព្រមព្រៀងរវាងរាជរដ្ឋាភិបាលកម្ពុជា តំណាងដោយក្រសួងសេដ្ឋកិច្ច និងហិរញ្ញវត្ថុ ជាមួយភាគីសាធារណរដ្ឋបារាំងតំណាងដោយទីភ្នាក់ងារបារាំងសម្រាប់អភិវឌ្ឍន៍ (AFD) នៅខែតុលា ឆ្នាំ២០២៤ ខាងមុខ ៕
