ឯកឧត្តមរដ្ឋមន្ត្រី ហែម វណ្ណឌី ណែនាំឱ្យមន្ទីរឧស្សាហកម្ម ខេត្តកំពង់ស្ពឺ និងខេត្តព្រះសីហនុ ដើរតួនាទីសកម្មក្នុងការធ្វើពិពិធកម្មឧស្សាហកម្ម
ភ្នំពេញ៖ នៅថ្ងៃទី២៩ ខែសីហា ឆ្នាំ២០២៤ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចុះសួរសុខទុក្ខ និងសំណេះ សំណាល ជាមួយថ្នាក់ដឹកនាំ និងមន្ត្រីរាជការនៃមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ខេត្តកំពង់ស្ពឺ និងខេត្តព្រះសីហនុ និងបានណែនាំឱ្យមន្ទីរទាំងពីរដើរតួនាទីសកម្ម ក្នុងការលើកកម្ពស់ពិពិធកម្មឧស្សាហកម្មនៅកម្ពុជា។
ឯកឧត្តមរដ្ឋមន្ត្រី បានលើកឡើងថា ខេត្តកំពង់ស្ពឺ និងខេត្តព្រះសីហនុ មានមូលដ្ឋានឧស្សាហកម្មដ៏រឹងមាំ និងអាច ធ្វើជាគំរូដឹកនាំឧស្សាហូបនីយកម្ម ដោយផ្តោតលើការកែលម្អឧស្សាហកម្មប្រពៃណី ពិសេសរោងចក្រវាយនភ័ណ្ឌ, ការទាក់ទាញឧស្សាហកម្មថ្មី ដូចជារោងចក្រផលិតគ្រឿងបង្គុំ និងឧបករណ៍អេឡិចត្រូនិក, និងការគាំទ្រសហគ្រាសធុនតូច និងមធ្យមក្នុងស្រុកឱ្យចូលរួមក្នុងខ្សែច្រវាក់ផ្គត់ផ្គង់។
ឯកឧត្តមរដ្ឋមន្ត្រី បានបន្ថែមថា ដើម្បីជំរុញកិច្ចខិតខំប្រឹងប្រែងទាំងនេះ មន្ទីរត្រូវប្រកាន់យកអភិក្រមគាំទ្រអាជីវកម្ម ដោយផ្តល់អាទិភាពលើសេវាគាំទ្រដែលបំពេញឱ្យសេចក្តីត្រូវការរបស់វិស័យឯកជន។ ទន្ទឹមនឹងនេះ ក្រសួងកំពុងពិនិត្យកែសម្រួលគោលនយោបាយ និងសេវាសាធារណៈរបស់ខ្លួនបន្ថែមទៀត ដើម្បីបង្កើតបរិយាកាសកាន់តែអំណោយផលសម្រាប់កំណើនឧស្សាហកម្ម ៕
