ឯកឧត្តមឱសថការី បាន បុត្តា អំពាវនាវឲ្យឱសថការីទាំងអស់ ចូលរួមទប់ស្កាត់ការចែកចាយផលិតផលឱសថក្លែងក្លាយ និងគ្មានច្បាប់អនុញ្ញាតពីក្រសួង

ភ្នំពេញ៖ ឯកឧត្តមឱសថការី បាន បុត្តា អនុរដ្ឋលេខាធិការក្រសួងសុខាភិបាល និងជាប្រធានក្រុមប្រឹក្សាគណៈឱសថការីជាតិអាណត្តិទី២ បានអំពាវនាវដល់ឱសថការីទាំងអស់ ត្រូវចូលរួមទប់ស្កាត់នូវការលក់ផលិតឱសថក្លែងក្លាយ ឱសថគ្មានចុះបញ្ជិកា និងទប់ស្កាត់ការលក់ និងផ្សព្វផ្សាយផលិតផលឱសថនៅលើបណ្ដាញសង្គម ដែលពុំមានច្បាប់អនុញ្ញាតពីក្រសួងសុខាភិបាល ។

ក្នុងពិធីសំណេះសំណាល និងផ្សព្វផ្សាយក្រមសីលធម៌ឱសថការី និងច្បាប់ស្តីពីការគ្រប់គ្រងអ្នកប្រកបវិជ្ជាជីវៈវិស័យសុខាភិបាល​ ជូនដល់អ្នកប្រកបវិជ្ជាជីវៈសុខាភិបាលជាឱសថការីទូទាំងខេត្តកណ្តាល នៅថ្ងៃទី៣១ ខែសីហា ឆ្នាំ២០២៤ ឯកឧត្តមឱសថការី បាន បុត្តា បានបន្តថា ឱសថការីទាំងអស់ត្រូវពង្រឹងសមត្ថភាពវិជ្ជាជីវៈ គោរពច្បាប់ ក្រមសីលធម៌ឱសថការី គោរពដែនកំណត់និងនិយាមវិជ្ជាជីវៈឱសថការី និងគោរពគោលការណ៍ក្នុងការអនុវត្តល្អក្នុងការប្រកបវិជ្ជាជីវៈ ។

ក្នុងឱកាសនេះដែរ ឯកឧត្តមក៏បានពាំនាំនូវការសួរសុខទុក្ខសំណាក់ពីឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល ដល់សមាជិក សមាជិកាឱសថការីទាំងអស់ ក្នុងខេត្តកណ្តាល និងសូមជូនពរឲ្យឱសថការីទាំងអស់ឲ្យមានសុខភាពល្អ។

ឯកឧត្តម ឱសថការី បាន បុត្តា ក៏បានក្រើនរំលឹកដល់ឱសថការីទាំងអស់ ត្រូវបន្តការអភិវឌ្ឍវិជ្ជាជីវៈបន្ត និងបន្តស្រាវជ្រាវបន្ថែមទៀត និងត្រូវពង្រឹងបន្ថែមលើការគោរពលិខិតបទដ្ឋានគតិយុត្តបន្ថែមទៀត ហើយចំណុចដែលខ្លាំងត្រូវចែករំលែកបទពិសោធន៍ដល់ឱសថការីផ្សេងៗទៀត និងត្រូវគោរពតាមគោលនយោបាយរបស់រាជរដ្ឋាភិបាលក្នុងអាណត្តិទី៧នេះ ក្នុងគោលបំណងដ៏ធំបំផុត គឺត្រូវពង្រឹងគុណភាពសេវា និងផ្តល់សេវាសុខាភិបាលជូនដល់ប្រជាជនប្រកបដោយប្រសិទ្ធិភាព គុណភាព សុវត្ថិភាព និងសមធម៏។

ជាមួយនេះដែរ គណៈឱសថការីកម្ពុជា ជំរុញឱសថការីទាំងអស់ ដែលប្រកបវិជ្ជាជីវៈឱសថសាស្ត្រ អមវេជ្ជសាស្ត្រក្នុងព្រះរាជាណាចក្រកម្ពុជា ត្រូវតែសុំចុះឈ្មោះនៅក្នុងបញ្ជីគណៈឱសថការីកម្ពុជា ស្នើសុំ  ឫបន្តអាជ្ញាបណ្ណឱសថការី និងពង្រឹងឲ្យឱសថការីទាំងអស់ គោរពនូវក្រមសីលធម៌ឱសថការី គោរពច្បាប់ពាក់ព័ន្ធនឹងការប្រកបវិជ្ជាជីវៈឱសថសាស្ត្រ អមវេជ្ជសាស្ត្រ នានាជាធរមាន និងអនុវត្តតាមគោលនយោបាយរបស់ក្រសួងសុខាភិបាល ដែលបានកំពុងដាក់ចេញដោយប្រមុខរាជរដ្ឋាភិបាលនៃព្រះរាជាណាចក្រកម្ពុជា ៕