ឯកឧត្តម យឹម លាង ណែនាំឲ្យក្រុមការងារខណ្ឌឫស្សីកែវ ខិតខំបង្កើនប្រសិទ្ធភាពនៃការផ្តល់សេវាសាធារណៈលើការបញ្ជាក់លិខិត ឬឯកសារផ្សេងៗជូនពលរដ្ឋ តាមរយៈការិយាល័យច្រកចេញចូលតែមួយឲ្យលឿនរហ័ស
ភ្នំពេញ៖ នាព្រឹកថ្ងៃសៅរ៍ ១២រោច ខែស្រាពណ៍ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៣១ ខែសីហា ឆ្នាំ២០២៤នេះ ឯកឧត្តម ឧត្តមសេនីយ៍ឯក យឹម លាង ប្រធានក្រុមការងាររាជរដ្ឋាភិបាលចុះជួយមូលដ្ឋានខណ្ឌឫស្សីកែវ រាជធានីភ្នំពេញ បានអញ្ជើញជាអធិបតីក្នុងពិធីប្រកាសសមាសភាព ក្រុមការងាររាជរដ្ឋាភិបាលចុះជួយមូលដ្ឋានសង្កាត់ទាំង៧ ក្នុងខណ្ឌឫស្សីកែវ រាជធានីភ្នំពេញ។
ជាកិច្ចចាប់ផ្តើម លោក ជិន ប៊ុនធឿន អភិបាលខណ្ឌប្ញស្សីកែវ បានមានប្រសាសន៍ថា ក្រុមការងាររាជរដ្ឋាភិបាលចុះមូលដ្ឋានខណ្ឌប្ញស្សីកែវ បានចូលរួមអនុវត្តការងារ និងចូលរួមគាំទ្រការអនុវត្តកម្មវិធីនយោបាយអាទិភាពទាំង៦ និងវិធានការគន្លឹះទាំង៥ របស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា រួមទាំងការគាំទ្រ និងជំរុញការអនុវត្តគោលនយោបាយ ភូមិ ឃុំ សង្កាត់ មានសុវត្ថិភាព កំណែទម្រង់វិមជ្ឈការ និងវិសហមជ្ឈការ ការផ្តល់សេវាជូនប្រជាពលរដ្ឋតាមរយៈយន្តការច្រកចេញចូលតែមួយ។ ក្នុងអាណត្តិកន្លងទៅនេះ ក្រុមការងាររាជរដ្ឋាភិបាលចុះជួយមូលដ្ឋាននៅខណ្ឌឫស្សីកែវ និងតាមបណ្តាសង្កាត់ បានយកចិត្តទុកដាក់អនុវត្តតួនាទី និងភារកិច្ចរបស់ខ្លួន ប្រកបដោយស្មារតីទទួលខុសត្រូវខ្ពស់ ដោយបានលើកយកសកម្មភាពសំខាន់ៗ និងបញ្ហាប្រឈមមួយចំនួន ដើម្បីដាក់ចេញជាទិសដៅ និងភារកិច្ចរបស់ក្រុមការងាររួមមាន ការងារសន្តិសុខ នយោបាយ ការងារសុវត្ថិភាព សណ្តាប់ធ្នាប់សង្គម ការអភិវឌ្ឍហេដ្ឋារចនាសម្ព័ន្ធ គណនេយ្យភាពសង្គម និងការផ្តល់សេវាសាធារណៈជូនដល់បង ប្អូនប្រជាពលរដ្ឋក្នុងមូលដ្ឋាន សំដៅគាំទ្រ ដល់យុទ្ធសាស្ត្របញ្ចកោណ ដំណាក់កាលទី១ ដើម្បីកំណើនការងារ សមធម៌ ប្រសិទ្ធភាព និងចីរភាព កសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ របស់រាជរដ្ឋាភិបាលកម្ពុជា នីតិកាលទី៧ នៃរដ្ឋសភា។
ថ្លែងក្នុងពិធីប្រកាសសមាសភាពក្រុមការងាររាជរដ្ឋាភិបាលចុះជួយ សង្កាត់ទាំង៧ នៃខណ្ឌឫស្សីកែវ រាជធានីភ្នំពេញ ឯកឧត្តម ឧត្តមសេនីយ៍ឯក យឹម លាង ប្រធានក្រុមការងាររាជរដ្ឋាភិបាលចុះជួយមូលដ្ឋានខណ្ឌឫស្សីកែវ រាជធានីភ្នំពេញ បានណែនាំឲ្យក្រុមការងារខណ្ឌឫស្សីកែវ ខិតខំបង្កើនប្រសិទ្ធភាពនៃការផ្តល់សេវាសាធារណៈលើការបញ្ជាក់លិខិត ឬឯកសារផ្សេងៗជូនប្រជាពលរដ្ឋ តាមរយៈការិយាល័យច្រកចេញចូលតែមួយឲ្យលឿនរហ័ស។
ជាមួយគ្នានេះដែរ ឯកឧត្តម ឧត្តមសេនីយ៍ឯក យឹម លាង បានមានប្រសាសន៍ថា ក្រុមការងារចុះជួយមូលដ្ឋានទាំងអស់ ត្រូវខិតខំប្រមែប្រមូលព័ត៌មានស្វែងយល់អំពីតម្រូវការ សំណូមពរ និងសម្របសម្រួលដោះស្រាយបញ្ហាប្រឈមជាច្រើន គឺជាការផ្សារភ្ជាប់ទំនាក់ទំនង រវាងរាជរដ្ឋាភិបាល អាជ្ញាធរដែនដី ជាមួយប្រជាពលរដ្ឋ តាមរយៈការផ្សព្វផ្សាយឲ្យបានកាន់តែទូលំទូលាយ នូវរាល់គោលការណ៍ដឹកនាំរបស់រាជរដ្ឋាភិបាល ក៏ដូចជាសភាពការណ៍រួមរបស់ប្រទេសជាតិ និងសភាពការនៅថ្នាក់មូលដ្ឋាន ជាពិសេសគឺការដោះស្រាយបញ្ហាប្រឈមជូនប្រជាពលរដ្ឋ ដោយភាពស្មោះត្រង់ ធ្វើឲ្យប្រជាពលរដ្ឋកាន់តែមានជំនឿជឿជាក់ មកលើការដឹកនាំដ៏ត្រឹមត្រូវរបស់រាជរដ្ឋាភិបាល ដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
សូមជម្រាបជូនថា ក្រុមការងាររាជរដ្ឋាភិបាលចុះជួយមូលដ្ឋាន គឺជាយន្តការថ្មីមួយ ដែលត្រូវបានរាជរដ្ឋាភិបាលកម្ពុជា បង្កើតឡើងក្នុងឆ្នាំ២០១៤ និងបានបន្តនិរន្តរភាពសម្រាប់នីតិកាលទី៧នេះ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្រ្តបញ្ចកោណដំណាក់កាលទី១ តាមរយៈការប្រមូលព័ត៌មានគ្រប់ជ្រុងជ្រោយពីរដ្ឋបាលថ្នាក់ក្រោមជាតិ ដើម្បីស្វែងយល់ពីតម្រូវការ បញ្ហាប្រឈម និងរកដំណោះស្រាយជូនប្រជាពលរដ្ឋ ក្នុងគោលបំណងធ្វើឲ្យមានភាពឆ្លើយតបក្នុងយុទ្ធសាស្រ្តដឹកនាំរបស់រាជរដ្ឋាភិបាលកម្ពុជា និងឲ្យមានស្មារតីសាមគ្គី ការរួបរួម គ្នារវាងរដ្ឋបាលថ្នាក់ជាតិ និងរដ្ឋបាលថ្នាក់ក្រោមជាតិ ៕
