អភិបាលខេត្តស្ទឹងត្រែង ណែនាំឱ្យបង្កើនវិធានការសន្តិសុខ និងសណ្តាប់ធ្នាប់សាធារណៈឱ្យបានម៉ឺងម៉ាត់ តាមបណ្តាគោលដៅបានដាក់ចេញ ដើម្បីធានារក្សាបានសុខសន្តិភាព
ភ្នំពេញ៖ ឯកឧត្តម សរ សុពុត្រា អភិបាលខេត្តស្ទឹងត្រែង និងជាប្រធានគណៈបញ្ចាការឯកភាពរដ្ឋបាលខេត្ត នាព្រឹកថ្ងៃទី២ ខែកញ្ញា ឆ្នាំ២០២៤ បានអញ្ជើញដឹកនាំកិច្ចប្រជុំគណៈបញ្ចាការឯកភាពរដ្ឋបាលខេត្ត ។
ក្នុងឱកាសនោះឯកឧត្តម សរ សុពុត្រា បានថ្លែងកោតសរសើរចំពោះមន្រ្តីរាជការ អង្គភាពជុំវិញខេត្ត កងកំលាំងប្រដាប់អាវុធគ្រប់ប្រភេទ រដ្ឋបាលក្រុងស្រុក ឃុំសង្កាត់ ដែលបានចូលរួមសហការគ្នា ក្នុងស្មារតីទទួលខុសត្រូវខ្ពស់ រក្សាបាននូវសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម ស្របពេលរយៈពេលប៉ុន្មានថ្ងៃនេះ មានសកម្មភាពញុះញង់ ប្រឌិតព័ត៌មានភូតកុហក បោកប្រាស់ និងចោទប្រកាន់ដោយគ្មានមូលដ្ឋានច្បាស់លាស់ ដើម្បីបំភ័ន្តដល់មិតិសាធារណជន ក៏ដូចជាបំផុសចលនាធ្វើបាតុកម្មប្រឆាំងនិងកិច្ចសហប្រតិបត្តិការតំបន់ត្រីកោណអភិវឌ្ឍន៍ ក្នុងចេតនាប៉ុនប៉ងផ្តួលរំលំរាជរដ្ឋា ភិបាលស្របច្បាប់របស់កម្ពុជា ពីក្រុមពួកឧទ្ទាមក្រៅច្បាប់។
ឯកឧត្តមអភិបាលខេត្តបានណែនាំដល់មន្រ្តីរាជការ កងកំលាំងប្រដាប់អាវុធទាំងអស់ ត្រូវបន្តយកចិត្តទុកដាក់បង្កើនការភ្ជាប់សភាពការណ៍ពាក់ព័ន្ធសន្តិសុខ សណ្តាប់ធ្នាប់សង្គម ជាពិសេសសកម្មភាពភេរវកម្ម ឧក្រិដ្ឋកម្ម ចលាចលសង្គម និងសកម្មភាពល្មើសផ្សេងៗទៀត ដើម្បីចាត់វិធានការបង្ការទប់ស្កាត់ និងបង្ក្រាបឱ្យមានប្រសិទ្ធភាពទាន់ពេលវេលា។
ជាមួយគ្នានេះ បានជំរុញការអនុវត្តគោលនយោបាយ “ភូមិ-ឃុំ សង្កាត់ មានសុវត្ថិភាព” ឱ្យបានសកម្មផុសផុល និងត្រូវយកចិត្តទុកដាក់គ្រប់គ្រងឱ្យបានហ្មត់ចត់ នូវមុខសញ្ញាគ្រប់ប្រភេទ នៅតាមសហគមន៍ ភូមិ-ឃុំ សង្កាត់ ដោយប្រើប្រាស់គ្រប់វិធានការ។
ឯកឧត្តមអភិបាលខេត្ត ក៏បានណែនាំឱ្យបង្កើនវិធានការសន្តិសុខ និងសណ្តាប់ធ្នាប់សាធារណៈឱ្យបានម៉ឺងម៉ាត់ នៅតាមបណ្តាគោលដៅដែលបានដាក់ចេញដើម្បីធានារក្សាបាននូវសុខសន្តិភាព។
ទន្ទឹមនេះ ត្រូវយកចិត្តទុកដាក់យាមកាម ល្បាតការពារ ទប់ស្កាត់ និងបង្រ្កាបឱ្យបានទាន់ពេលចំពោះ ការប្រើប្រាស់អាវុធ គ្រឿងផ្ទះ កាំភ្លើងកែច្នៃ ដែលនាំឱ្យគ្រោះថ្នាក់ដល់សង្គម និងបង្កការភ័យខ្លាច ដល់ប្រជាជន។
នាឱកាសដដែល ឯកឧត្តមអភិបាលខេត្ត បានទទូច ឱ្យមន្ទីរអង្គភាពជុំវិញខេត្តត្រូវចាត់វិធានការកែលំអមន្ទីរអង្គភាពរបស់ខ្លួន មានសោភ័ណ្ឌភាព និងអនាម័យស្អាត ដែលជាបេះដូងនៃការទាក់ទាញភ្ញៀវទេសចរចូលមកខេត្តស្ទឹងត្រែងទស្សនាកំសាន៕
