ឯកឧត្តម សួស យ៉ារ៉ា ជួបពិភាក្សាការងារជាមួយនឹងឯកអគ្គរដ្ឋទូតចិនប្រចាំនៅកម្ពុជា
ភ្នំពេញ៖ នាព្រឹកថ្ងៃទី៤ ខែកញ្ញា ឆ្នាំ២០២៤ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា បានជួបពិភាក្សាការងារជាមួយនឹង ឯកឧត្តម Wang Wenbin ឯកអគ្គរដ្ឋទូតនៃសាធារណរដ្ឋប្រជាមានិតចិនប្រចាំនៅកម្ពុជា ដោយមានការចូលរួមពី ឯកឧត្តម ប៉ាន សូរស័ក្តិ និងឯកឧត្តម ទី សុគន្ធ និងក្រុមការងារអនុគណៈកម្មការប្រតិបត្តិនៃគណៈកម្មការដឹកនាំ និងរៀបចំសម័យប្រជុំពេញអង្គនៃសភាអន្តរជាតិដើម្បីភាពអត់ឱន និងសន្តិភាព (IPTP) លើកទី១១ និងបានពិភាក្សាអំពីការអញ្ជើញ សមាជិករដ្ឋសភាតំណាងប្រជាជនចិន មកចូលរួមនៅក្នុងសម័យប្រជុំពេញអង្គ IPTP លើកទី១១ ដែលសភាកម្ពុជានឹងធ្វើជាម្ចាស់ផ្ទះនៅខែវិច្ឆិកា ឆ្នាំ២០២៤ខាងមុខនេះ ក្រោមគំនិតផ្តួចផ្តើមអំពីសន្តិភាព ដែលកម្ពុជាអាចចែករំលែកបទពិសោធជាក់ស្តែងក្នុងការកសាង និងថែរក្សាសន្តិភាពទៅកាន់ពិភពលោក។
ក្នុងកិច្ចប្រជុំនេះដែរ ឯកឧត្តមប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន (គណៈកម្មការទី៥) នៃរដ្ឋសភា បានកោតសរសើរ និងអបអរសាទរ ឯកឧត្តម Wang Wenbin ដែលជាអតីតអ្នកនាំពាក្យដ៏ចំណានរបស់ក្រសួងការបរទេសចិន និងបច្ចុប្បន្ននេះជាឯកអគ្គរដ្ឋទូតចិនប្រចាំកម្ពុជា។
ឯកឧត្តមប្រធានគណៈកម្មការទី៥ ក៏បានលើកឡើងអំពីទស្សនកិច្ចរបស់ លោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិនក្រុងសៀងហៃ មកកម្ពុជា ដោយលោកជំទាវ បានអញ្ជើញទៅទស្សនាតំបន់វប្បធម៌ប្រវត្តិសាស្ត្រ ដូចជាប្រាសាទអង្គរវត្ត និងសារមន្ទីរជាតិផងដែរ។
ឯកឧត្តមប្រធានគណៈកម្មការទី៥នៃរដ្ឋសភា ក៏បានបន្តលើកឡើងអំពីកិច្ចសហប្រតិបតិ្តការដ៏ល្អរវាងប្រទេសទាំងពីរ និងរំលេចផងដែរថា ឆ្នាំ២០២៤នេះ ជាឆ្នាំផ្លាស់ប្តូរប្រជាជន និងប្រជាជន នៃប្រទេសទាំងពីរ។
ជាកិច្ចឆ្លើយតប ឯកឧត្តម ឯកអគ្គរដ្ឋទូត បានអរគុណភាគីកម្ពុជា ក៏ដូចជា សម្តេចមហារដ្ឋសភាធិការធិបតី ឃួន សុដារី ដែលបានរៀបចំទទួលគណៈប្រតិភូដឹកនាំដោយ លោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិនក្រុងសៀងហៃ យ៉ាងកក់ក្តៅ ព្រមទាំងសម្រេចបានលទ្ធផលគួរជាទីគាប់ចិត្តផងដែរ។
ទន្ទឹមនឹងនេះ ឯកឧត្តមឯកអគ្គរដ្ឋទូត សង្ឃឹមថាទស្សនកិច្ចរបស់សម្តេចរដ្ឋសភាធិបតី ប្រធានរដ្ឋសភា ទៅទស្សនកិច្ចនៅសាធារណរដ្ឋប្រជាមានិតចិន នាពេលខាងមុខ នឹងចូលរួមចំណែករឹតចំណងមិត្តភាពរវាងប្រទេស និងប្រជាជនទាំងពីរឱ្យកាន់ស្អិតល្មួតបន្ថែមទៀត ៕
