សាលាភូមិន្ទរដ្ឋបាល នៃក្រសួងមុខងារសាធារណៈ ជាមួយសាកលវិទ្យាល័យការពារជាតិ នៃក្រសួងការពារជាតិ ចុះអនុស្សរណៈយោគយល់គ្នា ដើម្បីពង្រីកជវភាពនៃប្រព័ន្ធតួអង្គតែមួយ តាមរយៈការបណ្តុះបណ្តាល និងពង្រឹងសមត្ថភាព
ភ្នំពេញ៖ សាលាភូមិន្ទរដ្ឋបាល នៃក្រសួងមុខងារសាធារណៈ និងសាកលវិទ្យាល័យការពារជាតិ នៃក្រសួងការពារជាតិ បានរៀបចំពិធីចុះហត្ថលេខា លើអនុស្សរណៈនៃការយោគយល់គ្នា ស្តីពី«ការបង្កើតកិច្ចសហប្រតិបត្តិការបណ្តុះបណ្តាល និងលើកកម្ពស់សមត្ថភាពយោធិន» នៅសាលាភូមិន្ទរដ្ឋបាល នាព្រឹកថ្ងៃទី៤ ខែកញ្ញា ឆ្នាំ២០២៤។ ពិធីនេះ មានការអញ្ជើញចូលរួមក្រោមអធិបតីភាព ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ នាយកសាលាភូមិន្ទរដ្ឋបាល តំណាងដ៏ខ្ពង់ខ្ពស់ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានក្រុមប្រឹក្សាសាលាភូមិន្ទរដ្ឋបាល និងឯកឧត្តមនាយឧត្តមសេនីយ៍ ចាយ សាំងឃុន រដ្ឋលេខាធិការប្រចាំការក្រសួងការពារជាតិ ព្រមទាំងមានការចូលរួមពីឯកឧត្តម លោកជំទាវ លោក លោកស្រីជាថ្នាក់ដឹកនាំក្រសួងមុខងារសាធារណៈ ថ្នាក់ដឹកនាំក្រសួងការពារជាតិ គណៈគ្រប់គ្រងសាលាភូមិន្ទរដ្ឋបាល គណៈគ្រប់គ្រងសាកលវិទ្យាល័យការពារជាតិ និងសិស្សមន្ត្រីនៃសាលាភូមិន្ទរដ្ឋបាល ពលទាហាន នាយទាហានរង នាយទាហាន និងយោធាចារ្យនៃសាកលវិទ្យាល័យការពារជាតិ ព្រមទាំងអ្នកសារព័ត៌មានជាច្រើនរូប។
អនុស្សរណៈនៃការយោគយល់គ្នាដែលត្រូវបានចុះហត្ថលេខានាពេលនេះ ក្នុងគោលបំណងសំខាន់ គឺផ្តោតលើការបង្កើតកិច្ចសហប្រតិបត្តិការ និងលើកកម្ពស់ការគាំទ្រពីគ្នាទៅវិញទៅមក ពាក់ព័ន្ធនឹងការអភិវឌ្ឍសមត្ថភាព ការសិក្សាអប់រំ ការបណ្តុះបណ្តាល ការស្រាវជ្រាវ និងគម្រោងកម្មវិធីផ្សេងៗ ដោយផ្អែកលើគោលការណ៍ពិគ្រោះយោបល់ ឯកភាព សមភាព យុត្តិធម៌ និងផ្ដល់អត្ថប្រយោជន៍ដល់គូភាគីទៅវិញទៅមក។ ចំពោះខ្លឹមសារលម្អិត គឺមានចែងនៅក្នុងកិច្ចព្រមព្រៀងអនុស្សរណៈ នៃការយោគយល់គ្នា រវាងសាលាភូមិន្ទរដ្ឋបាល និងសាកលវិទ្យាល័យការពារជាតិ។
ក្នុងរបាយការណ៍របស់របស់ ឯកឧត្តម សុខ សេងយ៉ន នាយករងសាលាភូមិន្ទរដ្ឋបាល និងឯកឧត្តម ឧត្តមសេនីយ៍ឯក បណ្ឌិត ដោក សុផា សាកលវិទ្យាធិការ នៃសាកលវិទ្យាល័យការពារជាតិ បានបង្ហាញពីកិច្ចសហប្រតិបត្តិការផ្សេងៗ និងសមិទ្ធផលនានារបស់សាលា និងសាកលវិទ្យាល័យ សម្រេចបាននាពេលកន្លងមក។ លើសពីនេះ ឯកឧត្តមទាំងពីរ ក៏បានបង្ហាញភាពសំខាន់នៃអនុស្សរណៈនេះ ដែលមិនត្រឹមតែជាការផ្សារភ្ជាប់នូវទំនាក់ទំនងរវាងស្ថាប័នទាំងពីរតែប៉ុណ្ណោះទេ តែជាចូលរួមជាមួយរាជរដ្ឋាភិបាល ក្នុងការបណ្តុះបណ្តាលធនធានមនុស្សក្នុងវិស័យរដ្ឋបាលសាធារណៈ និងវិស័យការពារជាតិ ក៏ដូចជាការចូលរួមថែរក្សា សន្តិភាព ស្ថិរភាព និងការអភិវឌ្ឍប្រទេសជាតិមាតុភូមិ ដែលសាលាភូមិន្ទរដ្ឋបាល បាននឹងកំពុងបំពេញបេសកម្ម ដោយបានដើរតួនាទីយ៉ាងសំខាន់ ក្នុងការលើកកម្ពស់សមត្ថភាព និងប្រសិទ្ធិភាព នៃការបណ្តុះបណ្តាល ដោយបានប្រែក្លាយ ជាគ្រឹះស្ថានបណ្តុះបណ្តាលសាធារណៈ ក្រោមការគ្រប់គ្រងរបស់ក្រសួងមុខងារសាធារណៈ និងទទួលបានការយកចិត្តដាក់ព្រមទាំងមានការគាំទ្រជាបន្តបន្ទាប់ពីប្រមុខរាជរដ្ឋាភិបាល និងថ្នាក់ដឹកនាំស្ទើរគ្រប់ក្រសួង-ស្ថាប័ន។
ក្នុងចំណាប់អារម្មណ៍ចំពោះពិធីចុះហត្ថលេខានាពេលនេះ ឯកឧត្តមប្រចាំការ យក់ ប៊ុនណា បានលើកឡើងថា “ពិធីចុះអនុស្សរណៈយោគយល់គ្នា រវាងសាលាភូមិន្ទរដ្ឋបាល និងសាកលវិទ្យាល័យការពារជាតិនេះ គឺជាផ្នែកមួយនៃការពង្រឹង និងពង្រីកជវភាពនៃប្រព័ន្ធតួអង្គតែមួយ របស់រាជរដ្ឋាភិបាល ក្នុងគោលដៅពង្រឹងសមត្ថភាពស្ថាប័នសាធារណៈ ឱ្យកាន់តែប្រសើរ គឺគ្រប់ក្រសួង-ស្ថាប័ន ធ្វើការជាមួយគ្នា គាំទ្រគ្នាទៅវិញទៅមក ប្រកបដោយសុខដុមនីយកម្ម ហើយធ្វើដំណើរព្រមគ្នា នៅក្នុងការសម្រេចចក្ខុវិស័យរបស់រាជរដ្ឋាភិបាល ដែលជាបំណងប្រាថ្នារួមគ្នារបស់ប្រជាជាតិកម្ពុជា ក្នុងការប្រែក្លាយប្រទេសកម្ពុជា ជាប្រទេសដែលមានចំណូលមធ្យម កម្រិតខ្ពស់ក្នុងឆ្នាំ២០៣០ ហើយក្លាយជាប្រទេសអភិវឌ្ឍន៍ក្នុងឆ្នាំ២០៥០ ហើយក្តីប្រាថ្នារួមគ្នារបស់យើងទាំងអស់គ្នា គឺចង់ឃើញប្រទេសកម្ពុជា មានសុខសន្តិភាព មានការអភិវឌ្ឍយូរអង្វែងរាប់ពាន់ឆ្នាំទៅមុខទៀត”។
សូមជម្រាបថា ពិធីចុះអនុស្សរណៈនៃការយោគយល់គ្នារវាងសាលាភូមិន្ទរដ្ឋបាល និងសាកលវិទ្យាល័យការពារជាតិនេះ សាលាភូមិន្ទរដ្ឋបាលនៃក្រសួងមុខងារសាធារណៈ ឯកឧត្តម សុខ សេងយ៉ន នាយករងសាលាភូមិន្ទរដ្ឋបាល តំណាងដោយ រីឯសាកលវិទ្យាល័យការពារជាតិនៃក្រសួងការពារជាតិ តំណាងដោយ ឯកឧត្តម ឧត្តមសេនីយ៍ឯក បណ្ឌិត ដោក សុផា សាកលវិទ្យាធិការ នៃសាកលវិទ្យាល័យការពារជាតិ ៕
