វេទិកាសមាជិកសភាអាស៊ី-ប៉ាស៊ីហ្វិកលើកទី៨ ស្តីពីសុខភាពសកល (APPFGH8) ត្រូវបានបិទបញ្ចប់ដោយជោគជ័យ និងប្រកបដោយផ្លែផ្កា
ភ្នំពេញ៖ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា អញ្ជើញចូលរួមបិទវេទិកាសមាជិកសភាអាស៊ី-ប៉ាស៊ីហ្វិកលើកទី៨ ស្តីពីសុខភាពសកល (APPFGH8) នៅថ្ងៃទី៦ ខែកញ្ញា ឆ្នាំ២០២៤ នៅទីក្រុងផតវីឡា សាធារណរដ្ឋវ៉ានូអាទូ។
វេទិកាAPPFGH លើកទី៨ បានបញ្ចប់ទៅដោយជោគជ័យ និងផ្លែផ្កា ដោយមានការចូលរួមយ៉ាងសកម្មពីសមាជិកសភាអាស៊ី-ប៉ាស៊ីហ្វិក ក្នុងការប្តេជ្ញាចិត្តលើកកម្ពស់ការផ្តល់សេវាសុខាភិបាល តាមរយៈការពង្រឹងធនធានមនុស្សក្នុងវិស័យសុខាភិបាល។
វេទិកានេះក៏បានអនុម័តលើសេចក្តីថ្លែងការណ៍រួមរបស់ទីក្រុងផតវីឡាស្តីពី “ធនធានមនុស្សសុខាភិបាល” ដើម្បីជំរុញកិច្ចសហប្រតិបត្តិការ និងបង្កើនធនធានមនុស្សសុខាភិបាល តាមរយៈការបង្កើតគោលនយោបាយ យុទ្ធសាស្រ្តដេីម្បីរក្សាធនធានមនុស្សសុខាភិបាល វិនិយោគធនធានបន្ថែមលើការអប់រំ ការផ្តល់ឱកាស ការបែងចែកកម្លាំង និងគាំទ្រនវានុវត្តន៍ឌីជីថលថ្មីៗ ដើម្បីជំនួួយដល់វិស័យសុខាភិបាល ទាំងនៅក្នុងថ្នាក់ជាតិ តំបន់ និងអន្តរជាតិ។
លោកជំទាវ ក៏បាន ចូលរួមបន្ថែម ក្នុងសេចក្តីថ្លែងការណ៍ដោយអោយយកចិត្តទុកដាក់ក្នុងការស្រាវជ្រាវ អោយបានត្រឹមត្រូវពិតប្រាកដចំពោះចំនួននៃកង្វះពលកម្មសុខាភិបាល ដេីម្បីរៀបចំយុទ្ធសាស្ត្រអោយចំគោលដៅប្រកបដោយប្រសិទ្ធភាពផងដែរ។
លោកជំទាវបានធ្វេីការប្តេជ្ញា ចិត្តក្នុងនាមជាសមាជិកាសភាកម្ពុជាមួយរូប នឹងនាំយកបទពិសោធពីវេទិកានេះមកចែករំលែកដល់សមាជិកសភាកម្ពុជា និងរដ្ឋបាលថ្នាក់ក្រោមជាតិ ជា ពិសេស ឃុំ សង្កាត់ ដើម្បីយល់ដឹងបន្ថែមអំពីសារៈសំខាន់នៃតំរូវការធនធានមនុស្សសុខាភិបាល ក្នុងការលេីកកម្ពស់សុខភាពបងប្អូនប្រជាជនក្នុងមូលដ្ឋានរបស់ខ្លួន និងជួយរិះរកវិធានការដោះស្រាយបញ្ហារួមនេះ ។
លោកជំទាវក៏បានប្តេជ្ញាពង្រឹងកិច្ចសហប្រតិបត្តិការថ្នាក់តំបន់ តាមរយៈការទន្ទឹងរង់ចាំស្វាគមន៍ដោយកក់ក្តៅចំពោះសមាជិកសភាដែលជាសមាជិក APPFGH ក្នុងពេលរដ្ឋសភាកម្ពុជាទទួលធ្វើជាម្ចាស់ផ្ទះនៃវេទិកា APPFGH នៅ ឆ្នាំ២០២៦ខាងមុខនេះ៕
