ឯកឧត្តម ចាន់ ស៊ីណាត ដឹកនាំកិច្ចប្រជុំអន្តរក្រសួងស្ដីពីការអនុវត្តច្បាប់ទឹក ដើម្បីគ្រប់គ្រងបញ្ជាទឹក និងប្រើប្រាស់ទឹកឱ្យមានប្រសិទ្ធភាព

ភ្នំពេញ៖ នៅទីស្ដីការក្រសួង នាថ្ងៃសុក្រ ៤កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៦ ខែកញ្ញា ឆ្នាំ២០២៤នេះ ឯកឧត្តម ចាន់ ស៊ីណាត រដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំអន្តរក្រសួងស្ដីពីការអនុវត្តច្បាប់ទឹក និងច្បាប់រដ្ឋធម្មនុញ្ញ ដើម្បីគ្រប់គ្រង បញ្ជាទឹក និងប្រើប្រាស់ទឹកឱ្យមានប្រសិទ្ធភាពជួយកាត់បន្ថយហានិភ័យនៃគ្រោះធម្មជាតិ ក្នុងបរិបទនៃការប្រែប្រួលអាកាសធាតុ។

សូមជម្រាបថា កិច្ចប្រជុំនេះមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ក្រសួងបរិស្ថាន រដ្ឋបាលសាលារាជធានីភ្នំពេញ ខេត្តកំពង់ស្ពឺ ខេត្តកណ្តាល និងខេត្តតាកែវ អគ្គនាយកដ្ឋាន និងនាយកដ្ឋានជំនាញនៃក្រសូងធនធានទឹក និងឧតុនិយម មន្ទីរធនធានទឹក និងឧតុនិយមខេត្តពាក់ព័ន្ធទាំងអស់ ព្រមទាំងលោក លោកស្រីនៃអង្គភាពគ្រប់គ្រង និងអនុវត្តគម្រោងរបស់ក្រសួងធនធានទឹក និងឧតុនិយមជាច្រើននាក់។

ឯកឧត្តមរដ្ឋលេខាធិការបានបញ្ជាក់ឱ្យដឹងថា កិច្ចប្រជុំបានផ្តោតទៅលើការអនុវត្តច្បាប់ទឹក និងច្បាប់រដ្ឋធម្មនុញ្ញឱ្យបានហ្មត់ចត់បំផុត និងជាធរមាន ដើម្បីធ្វើការគ្រប់គ្រងទឹក បញ្ជាទឹក និងប្រើប្រាស់ទឹកឱ្យមានស័ក្ដិសិទ្ធិភាពឈានទៅសម្រេចបាននូវកាលានុវត្តភាពក្នុងការកាត់បន្ថយហានិភ័យដែលបង្កឡើងដោយគ្រោះទឹកជំនន់ និងគ្រោះរាំងស្ងួត លើកស្ទួយសេដ្ឋកិច្ចប្រទេសកម្ពុជាឱ្យរីកចម្រើនឥតឈប់ និងលើកកម្ពស់ជីវភាពរស់នៅប្រចាំថ្ងៃរបស់ប្រជាពលរដ្ឋឱ្យកាន់តែល្អប្រសើរ។ ហើយនៅតាមបណ្តាអាងទន្លេ អាងទន្លេរង ព្រែក ស្ទឹង ប្រឡាយ អូរ ជ្រោះ ជ្រលង អាងទឹក តំបន់ជម្រាល តំបន់ផ្ទៃរងទឹកភ្លៀង បឹង និងវាលទំនាបនានានឹងមានទឹកគ្រប់គ្រាន់ ដែលធ្វើឱ្យប្រព័ន្ធគ្រប់គ្រងធនធានទឹកមានលក្ខណៈគ្រប់ជ្រុងជ្រោយទប់ទល់ទៅនឹងការប្រែប្រួលអាកាសធាតុ។

ជាមួយគ្នានេះដែរ ឯកឧត្តមរដ្ឋលេខាធិការបានសង្កត់ធ្ងន់ថា ក្រសួងសេដ្ឋកិច្ច និងហិរញ្ញវត្ថុ ក្រសួងធនធានទឹក និងឧតុនិយម និងក្រសួងបិស្ថាន បានប្តេជ្ញាបន្ដធ្វើកិច្ចសហការគ្នាកាន់តែសកម្ម ក្នុងការគ្រប់គ្រងធនធានទឹក បញ្ជាទឹក និងប្រើប្រាស់ទឹក ឈានទៅធានាឱ្យបាននូវសន្តិសុខសុវត្ថិភាពទឹក ជាពិសេសការផ្គត់ផ្គង់ទឹកឱ្យបានទាន់ពេលវេលា និងធ្វើការដោះស្រាយលើបញ្ហាគ្រោះរាំងស្ងួត និងទឹកជំនន់ តាមតម្រូវការរបស់ប្រទេសក្នុងពេលដែលភពផែនដីឡើងកម្តៅខ្លាំង ៕