មេទ័ពអាមេរិក និងចិន គ្រោងជួបពិភាក្សាគ្នានៅប៉ុន្មានសប្តាហ៍ខាងមុខ ដើម្បីទប់ស្កាត់ការយល់ច្រឡំផ្នែកយោធា រវាងប្រទេសមហាអំណាចទាំង២
វ៉ាស៊ីនតោន៖ ឯកអគ្គរដ្ឋទូតរបស់សហរដ្ឋអាម៉េរិកប្រចាំនៅប្រទេសចិន លោក នីកូឡាស ប៊ឺនស៍ (Nicholas Burns) បានប្រកាសថា មេបញ្ជាការកងកម្លាំងអាម៉េរិកនៅតំបន់ឥណ្ឌូប៉ាស៊ីហ្វិក នឹងពិភាក្សាជាមួយមេបញ្ជាការភាគខាងត្បូងនៃកងកម្លាំងប្រដាប់អាវុធរបស់ប្រទេសចិនក្នុងប៉ុន្មានសប្តាហ៍ខាងមុខនេះ ដើម្បីទប់ស្កាត់ការយល់ច្រឡំផ្នែកយោធាណាមួយរវាងប្រទេសមហាអំណាចទាំង២។
ការកត់សម្គាល់របស់លោក ប៊ឺន បានកើតឡើងបន្ទាប់ពីដំណើរទស្សនកិច្ចទៅកាន់រដ្ឋធានីប៉េកាំងកាលពីខែមុនដោយទីប្រឹក្សាសន្តិសុខជាតិអាម៉េរិក លោក ជេក ស៊ូលីវ៉ាន (Jake Sullivan) ដែលបានជួបជាមួយទីប្រឹក្សាយោធាឈានមុខគេរបស់មេដឹកនាំចិន លោក ស៊ី ជីនពីង ហើយបានយល់ព្រមថាមេដឹកនាំបញ្ជាការនៅឥណ្ឌូប៉ាស៊ីហ្វិករបស់សហរដ្ឋអាម៉េរិក ពោលគឺឧត្តមនាវីឯក សំ ប៉ាប៉ារ៉ូ (Sam Paparo) នឹងសន្ទនាតាមទូរសព្ទក្នុងពេលឆាប់ៗនេះជាមួយមេបញ្ជាការភាគខាងត្បូងនៃកងកម្លាំងប្រដាប់អាវុធរបស់ចិន។
លោក ប៊ឺនស៍ បានលើកឡើងថា រដ្ឋធានីវ៉ាស៊ីនតោនបាននឹងកំពុងបន្តស្វែងរកបណ្តាញទំនាក់ទំនងយោធា និងយោធាកាន់តែជិតស្និតជាមួយរដ្ឋធានីប៉េកាំង ចាប់តាំងពីសហរដ្ឋអាម៉េរិកបានបាញ់ទម្លាក់បាឡុងជាកម្មសិទ្ធិរបស់ចិនដែលសង្ស័យថាជាបាឡុងចារកម្មកាលពីឆ្នាំមុន។ លោកបន្ថែមថា លោកសង្ឃឹមថា កិច្ចពិភាក្សារវាងមន្ត្រីជាន់ខ្ពស់រវាងប្រទេសទាំងពីរនឹងកើតឡើងជាញឹកញាប់បន្ថែមទៀត រួមទាំងរដ្ឋមន្ត្រីការពារជាតិអាម៉េរិក លោក ឡដ អូស្ទីន (Lloyd Austin) និងប្រធានអគ្គសេនាធិការចម្រុះអាម៉េរិក លោក ឆាលស៍ ប្រោន (Charles Brown) ផងដែរ។
ទន្ទឹមគ្នានោះ លោក ប៊ឺន បានសម្ដែងការព្រួយបារម្ភអំពីលក្ខណៈឈ្លានពាននៃការកសាងកម្លាំងយោធា និងអាកប្បកិរិយាឈ្លានពាន និងគំរាមកំហែងរបស់កងទ័ពជើងទឹករបស់មហាយក្សចិន ចំពោះសម្ព័ន្ធមិត្តរបស់សហរដ្ឋអាម៉េរិកគឺហ្វីលីពីន និងជប៉ុន។ លោកបានសង្កត់ធ្ងន់លើតម្រូវការសម្រាប់ការទំនាក់ទំនងភ្លាមៗរវាងមេដឹកនាំយោធា ដើម្បីកាត់បន្ថយភាពតានតឹង និងដោះស្រាយបញ្ហានានាបានយ៉ាងឆាប់រហ័ស។ លើសពីនេះ លោក ប៊ឺន ក៏បានសម្ដែងការព្រួយបារម្ភអំពីជម្លោះអចេតនារវាងកងកម្លាំងយោធានៃប្រទេសយក្សសេដ្ឋកិច្ចនិងយោធាទាំង ២ ខណៈដែលកងទ័ពជើងទឹក និងទ័ពអាកាសរបស់ពួកគេប្រតិបត្តិការនៅក្នុងដែនទឹក និងដែនអាកាសអន្តរជាតិ៕
