ឯកឧត្តម សួស យ៉ារ៉ា អញ្ជើញដាក់កម្រងផ្កាគោរពវិញ្ញាណក្ខន្ធសពឪពុកបង្កើត ឯកឧត្តមបណ្ឌិត ឆេង គីមឡុង

ភ្នំពេញ៖ ឯកឧត្តម សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងលោកជំទាវ បានអញ្ជើញដាក់កម្រងផ្កាគោរពវិញ្ញាណក្ខន្ធសព ឧបាសក អ៉ឹម ឆេង ឪពុកបង្កើតរបស់ ឯកឧត្តមបណ្ឌិត ឆេង គីមឡុង ទីប្រឹក្សាសម្តេចមហារដ្ឋសភាធិការធិបតី ឃួន សុដារី នារសៀលថ្ងៃសៅរ៍ ៥កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៧ ខែកញ្ញា ឆ្នាំ២០២៤។

ឧបាសក អ៉ឹម ឆេង ត្រូវជាឪពុកបង្កើតរបស់ ឯកឧត្តមបណ្ឌិត ឆេង គីមឡុង ដែលបានទទួលមរណភាពនាថ្ងៃសុក្រ ៤កើត ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី៦ ខែកញ្ញា ឆ្នាំ២០២៤ វេលាម៉ោង១៦:៤៥នាទីរសៀល ក្នុងជន្មាយុ ៨១ឆ្នាំ ដោយជរាពាធ។

មរណភាពរបស់ ឧបាសក អ៉ឹម ឆេង គឺជាការបាត់បង់ដ៏គួរឱ្យសោកស្តាយបំផុតនូវឪពុកបង្កើត ឪពុកក្មេក ជីតា ជីតាក្មេក និងជីតាទួត ដែលប្រកបដោយព្រហ្មវិហារធម៌ និងជាទីគោរពស្រលាញ់បំផុតរបស់កូន ចៅ ដែលបានខិតខំលះបង់អស់កម្លាំងកាយចិត្ត ប្រាជ្ញា ស្មារតី និងពេលវេលា ដើម្បីបម្រើឧត្តមប្រយោជន៍គ្រួសារ ជាពិសេស បានចូលរួមចំណែកជាមួយរាជរដ្ឋាភិបាលក្នុងការកសាងសមិទ្ធផលជាច្រើន ទាំងក្នុងវិស័យពុទ្ធចក្រ និងអាណាចក្រ នៅទូទាំងប្រទេសនាពេលកន្លងមក។

ឯកឧត្តម សួស យ៉ារ៉ា ក៏បានចូលរួមរំលែកមរណទុក្ខដ៏ក្រៀមក្រំជាមួយ ឯកឧត្តមបណ្ឌិត ឆេង គីមឡុង ព្រមទាំងក្រុមគ្រួសារនៃសព និងបានឧទ្ទិសបួងសួងដល់ដួងវិញ្ញាណក្ខន្ធរបស់ ឧបាសក អ៉ឹម ឆេង សូមបានទៅចាប់បដិសន្ធិក្នុងទីឋានសុគតិភពកុំបីឃ្លៀងឃ្លាតឡើយ។

សពឧបាសក អ៉ឹម ឆេង ឪពុកបង្កើត ឯកឧត្តមបណ្ឌិត ឆេង គីមឡុង ទីប្រឹក្សាសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាត្រូវតម្កល់ធ្វើទក្ខិណានុប្បទានតាមប្រពៃណីព្រះពុទ្ធសាសនា នៅភូមិព្រែកពោធិ៍ ឃុំព្រែកពោធិ៍ ស្រុកស្រីសន្ធរ ខេត្តកំពង់ចាម ៕