កូរ៉េខាងជើង ជំរុញឱ្យមានការពង្រឹងកម្លាំងទ័ពជើងទឹក ខណៈភាពតានតឹងកើនឡើងកាន់តែខ្លាំង

សេអ៊ូល៖ ប្រព័ន្ធផ្សព្វផ្សាយរដ្ឋ KCNA បានរាយការណ៍ថា មេដឹកនាំកូរ៉េខាងជើង លោក គីម ជុងអ៊ុន បានសង្កត់ធ្ងន់លើសារសំខាន់នៃការពង្រឹងអំណាចកងទ័ពជើងទឹក ក្នុងអំឡុងដំណើរទស្សនកិច្ចទៅកាន់ការដ្ឋានសាងសង់មូលដ្ឋានទ័ពជើងទឹករបស់ខ្លួន។

លោក គីម ជុងអ៊ុន បានកត់សម្គាល់ថា ដោយសារតែយើងនឹងទទួលបាននាវាចម្បាំង និងនាវាមុជទឹកដ៏ធំសម្បើមនាពេលឆាប់ៗ ដែលមិនអាចចតនៅកន្លែងដាក់នាវាចម្បាំងបាន ការកសាងកំពង់ផែកងទ័ពជើងទឹកដើម្បីដំណើរការនាវាចម្បាំងដ៏ធំបំផុត និងថ្មីបំផុតបានក្លាយជាកិច្ចការសំខាន់ចម្បង។ ក្នុងដំណើរទស្សនកិច្ចនេះ លោក គីម ជុងអ៊ុន បានសង្កត់ធ្ងន់លើតម្រូវការកសាងកំពង់ផែកងទ័ពជើងទឹក ដែលមានសមត្ថភាពប្រតិបត្តិការប្រព័ន្ធសព្វាវុធរបស់នាវាចម្បាំង និងបង្ហាញវិធានការយោធា ដើម្បីដាក់ពង្រាយប្រព័ន្ធប្រឆាំងយន្តហោះ និងប្រព័ន្ធការពារឆ្នេរសមុទ្ទ សម្រាប់ការពារកំពង់ផែ។

លោក គីម ជុងអ៊ុន បានលើកឡើងថា ទីតាំងនេះមានគុណសម្បត្តិភូមិសាស្ត្រនយោបាយ ដោយសារប្រទេស មានព្រំប្រទល់នៅប៉ែកខាងកើត និងខាងលិចជាប់សមុទ្ទ។

ការវិភាគរូបភាពពីផ្កាយរណបនាពេលថ្មីៗ ដោយ 38 North បានបង្ហាញថា នាវាមុជទឹកប្រភេទមីស៊ីលផ្លោងថ្មីបំផុតរបស់កូរ៉េខាងជើង គឺថ្នាក់ Sinpo-C កំពុងស្ថិតក្រោមការសាកល្បងយ៉ាងទូលំទូលាយនៅឯកន្លែងផលិតនាវា Sinpho South។ នៅក្នុងដំណើរទស្សនកិច្ចដាច់ដោយឡែកមួយទៅកាន់កន្លែងផលិតនាវា លោក គីម បានបញ្ជាឱ្យបង្កើនការវិនិយោគជាតិក្នុងគម្រោងសាងសង់ ដើម្បីឱ្យកិច្ចការភ្លាមៗ និងផែនការរយៈពេលវែងសម្រាប់ការដាក់មូលដ្ឋានគ្រឹះនៃការអភិវឌ្ឍឧស្សាហកម្មផលិតនាវា ត្រូវបានជំរុញទៅមុខតាមការគ្រោងទុក។ លើសពីនេះ KCNA ក៏បានរាយការណ៍ផងដែរពីដំណើរទស្សនកិច្ចរបស់លោក គីម ជុងអ៊ុន ទៅកាន់សហគ្រាសឧស្សាហកម្មការពារជាតិ ជាកន្លែងដែលលោកបានសង្កត់ធ្ងន់លើតម្រូវការ ដើម្បីធ្វើឱ្យការផលិតអាវុធបែបវិទ្យាសាស្ត្រ និងទំនើបកម្ម ធានាការអនុវត្តផ្នែករឹងនៃយោធា ដែលទើបបង្កើតថ្មី និងការចុះត្រួតពិនិត្យសាលាកាំភ្លើងធំផងដែរ។