មេបញ្ជាការ តំបន់ប្រតិបត្តិការសឹករងកំពង់ឆ្នាំង ផ្សព្វផ្សាយសភាពការណ៍ថ្មីៗ ជូនដល់កងកម្លាំងអន្តរាគមន៍

ភ្នំពេញ៖ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង នៅថ្ងៃចន្ទ ទី៩ ខែកញ្ញា ឆ្នាំ២០២៤ បានផ្សព្វផ្សាយសភាពការណ៍ថ្មីៗ ជាតិ អន្តរជាតិ តំបន់អភិវឌ្ឍន៍ត្រីកោណ (កម្ពុជា ឡាវ វៀតណាម CLV-DTA ) និង ការចូលរួមមូលនិធិកាសាងហេដ្ឋារចនាសម្ព័ន្ធនានានៅតាមខ្សែបន្ទាត់ព្រំដែន ក្រោមគំនិតផ្តួចផ្តើមដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ។

ឧត្តមសេនីយ៍ត្រី អ៊ុំ សុភា មានប្រសាសន៍ថា កាលថ្ងៃសៅរ៍-អាទិត្យ សប្ដាហ៍កន្លងទៅ មានបងប្អូនប្រជាពលរដ្ឋជាច្រើនបានធ្វើដំណើរកំសាន្តតាមបណ្តាខេត្តជាប់ព្រំដែន ដោយមិនមានការចំណាយអ្វីទាំងអស់ តាមរយៈការរៀបចំ និងការឧបត្ថម្ភទាំងស្រុងរបស់រាជរដ្ឋាភិបាល ក្រោមការចង្អុលបង្ហាញដ៏ខ្ពង់ខ្ពស់របស់ សម្តេចធិបតី ប្រមុខរាជរដ្ឋាភិបាលកម្ពុជា ។ ការធ្វើដំណើរកំសាន្តនេះ បានធ្វើឲ្យប្រជាពលរដ្ឋបានស្គាល់ខេត្តតាមព្រំដែនកម្ពុជា និង យល់កាន់តែច្បាស់អំពីកិច្ចសហប្រតិបត្តិការ CLV ជាការរួមគ្នាអភិវឌ្ឍន៍រវាងប្រទេសទាំង៣(កម្ពុជា-ឡាវ-វៀតណាម) មិនមានការកាត់ដីបួនខេត្តឲ្យទៅប្រទេសជិតខាង ដូចពួកប្រឆាំងក្រៅស្រុកមួយក្តាប់តូចបំផុសបំផុលនោះឡើយ ។

ឯកឧត្តម បានសង្កត់ធ្ងន់ថា ក្នុងនាមយើងជាកងទ័ព ត្រូវយកចិត្តទុកដាក់ រក្សាសន្តិភាព ស្ថេរភាព ស្មោះត្រង់ដាច់ខាត ការពារ ជាតិ សាសនា ព្រះមហាក្សត្រ និង រាជរដ្ឋាភិបាលស្របច្បាប់ ។

ឯកឧត្តម ឧត្តមសេនីយ៍ត្រី អ៊ុំ សុភា បានណែនាំដល់កងកម្លាំងទាំងអស់ នៃបញ្ជាការដ្ឋានតំបន់ប្រតិបត្តិការសឹករងកំពង់ឆ្នាំង ត្រូវបន្តត្រៀមបម្រុងកម្លាំង គ្រឿងបំពាក់ សម្ភារៈ មធ្យោបាយ និងបណ្ដាកិច្ចការធានាគ្រប់គ្រាន់ ដើម្បីរង់ចាំអនុវត្តតាមបទបញ្ជារបស់ថ្នាក់លើដែលបានប្រគល់ជូនដើម្បីធានាសន្តិសុខសណ្ដាប់ធ្នាប់ សុវត្ថិភាព និងការពាររក្សាសុខសន្តិភាពជូនប្រជាជនកម្ពុជា ។

ជាចុងក្រោយ ឯកឧត្តម មេបញ្ជាការ តំណាងឲ្យ នាយទាហាន នាយទាហានរង និង ពលទាហាន ទូទាំងតំបន់ប្រតិបត្តិការសឹករងកំពង់ឆ្នាំង សូមគាំទ្រយ៉ាងពេញទំហឹងនូវកិច្ចសហប្រតិបត្តិការតំបន់អភិវឌ្ឍន៍ត្រីកោណCLV-DTA (កម្ពុជា.ឡាវ.វៀតណាម) និងចូលរួមបរិច្ចាគវិភាគទានស្ម័គ្រចិត្តក្នុងមូលនិធិកសាងហេដ្ឋារចនាសម្ព័ន្ធតាមព្រំដែន ប្រទេសកម្ពុជា ៕