រដ្ឋសភាកម្ពុជា នឹងបន្តលើកកម្ពស់កិច្ចសហប្រតិបត្តិការទ្វេភាគីរវាងអគ្គលេខាធិការដ្ឋានរដ្ឋសភាកម្ពុជា និងម៉ាដាហ្គាស្កា ឱ្យបានកាន់តែល្អប្រសើរ

ភ្នំពេញ៖ នៅព្រឹកថ្ងៃអង្គារ ទី១០ ខែកញ្ញា ឆ្នាំ២០២៤ ឯកឧត្ដម ឡេង ប៉េងឡុង អគ្គលេខាធិការរដ្ឋសភា បានទទួលជួបសម្ដែងការគួរសម និងពិភាក្សាការងារជាមួយ លោកជំទាវ Razafindrazay Mirina អគ្គលេខាធិការនៃព្រឹទ្ធសភាម៉ាដាហ្គាស្កា នៅវិមានរដ្ឋសភា ក្នុងឱកាសដែលគណៈប្រតិភូនៃអគ្គលេខាធិការដ្ឋានព្រឹទ្ធសភាម៉ាដាហ្គាស្កាអញ្ជើញមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៨ ដល់ថ្ងៃទី១៤ ខែកញ្ញា ឆ្នាំ២០២៤។

ចំណុចសំខាន់ៗដែលបានលើកយកមកពិភាក្សាក្នុងជំនួបនេះ មានដូចជា ដំណើរការប្រព្រឹត្តទៅ និងតួនាទី ភារកិច្ចរបស់សភានៃប្រទេសទាំងពីរ ព្រមទាំងការទូតសភាក្នុងបរិបទពិភពលោកនាពេលបច្ចុប្បន្ន ក៏ដូចជាការជំរុញ និងពង្រឹងកិច្ចសហប្រតិបត្តិការទ្វេភាគីរវាងកម្ពុជា និងម៉ាដាហ្គាស្កា ឱ្យបានកាន់តែច្រើនថែមទៀត ទាំងក្នុងក្របខណ្ឌសភា និងរដ្ឋាភិបាល ជាពិសេសលើផ្នែកសេដ្ឋកិច្ច។

ឯកឧត្ដមអគ្គលេខាធិការរដ្ឋសភា សង្ឃឹមយ៉ាងមុតមាំថា នៅក្រោយជំនួបនេះ នឹងមានសកម្មភាពកិច្ចសហប្រតិបត្តិការរវាងសភាម៉ាដាហ្គាស្កា និងសភាកម្ពុជា ជាបន្តបន្ទាប់ និងកាន់តែសកម្ម ដើម្បីរឹតចំណងមិត្តភាពនៃប្រទេសទាំងពីរ ៕