ជនជាតិវៀតណាមខុសច្បាប់ ៦០នាក់ ត្រូវបានបណ្តេញចេញពីកម្ពុជា ជាបន្តបន្ទាប់

ភ្នំពេញ៖ នៅរសៀលថ្ងៃអង្គារ ទី១០ ខែកញ្ញានេះ អគ្គនាយកដ្ឋានអន្តោប្រវេសន៍ បានឱ្យដឹងថា ក្រោយការស្រាវជ្រាវ អគ្គនាយកដ្ឋានបានរកឃើញជនជាតិវៀតណាមសរុបចំនួន ៦០នាក់បានចូលមករកស៊ី និងធ្វើការខុសច្បាប់នៅកម្ពុជា ហើយអ្នកទាំងនោះកំពុងបញ្ជូនទៅប្រទេសខ្លួនវិញ។

បើតាមការបញ្ជាក់របស់អគ្គនាយកដ្ឋានអន្តោប្រវេសន៍ បានឱ្យដឹងនៅរសៀលនេះថា ក្រោយទទួលបានការណែនាំ និងអនុសាសន៍ពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម ឧត្តមសេនីយ៍ឯក សុខ វាសនា អគ្គនាយកដ្ឋានអន្តោប្រវេសន៍ បានស្រាវជ្រាវរកឃើញជនជាតិវៀតណាមខុសច្បាប់សរុបចំនួន ៦០នាក់ដោយក្នុងនោះមានស្រីចំនួន ១៥នាក់។ ក្រោយការស្រាវជាវ និងសាកសួរ បានរកឃើញថាជនជាតិវៀតណាមទាំងនោះពាក់ព័ន្ធទៅនឹងករណីលួចស្នាក់នៅ និងធ្វើការងារខុសច្បាប់ផ្នែកផ្តល់យោបល់តាមប្រព័ន្ធទូរស័ព្ទ (Call Center) នៅក្នុងភូមិសាស្រ្តខេត្តព្រះសីហនុ។

បន្ទាប់ពីឃាត់ខ្លួន អគ្គនាយកដ្ឋានអន្តោប្រវេសន៍បានសហការជាមួយស្នងការដ្ឋាននគរបាលខេត្តព្រះសីហនុ នៃអគ្គស្នងការដ្ឋាននគរបាលជាតិ ដើម្បីបណ្តេញចេញអ្នកទាំង ៦០នាក់ពីប្រទេសកម្ពុជា តាមប៉ុស្តិ៍នគរបាលច្រកទ្វារព្រំដែនអន្តរជាតិព្រែកចាក ខេត្តកំពត។

គួរបញ្ជាក់ថា កាលពីថ្ងៃទី១៧ ខែសីហា ឆ្នាំ២០២៤ កន្លងទៅនេះ អគ្គនាយកដ្ឋានអន្តោប្រវេសន៍ក៏ធ្លាប់ស្រាវជ្រាវ និងបណ្តេញចេញនូវជនជាតិវៀតណាមជាបន្តបន្ទាប់ចំនួន២៥នាក់ក្នុងនោះមានស្ត្រីចំនួន ២៣នាក់ និងថ្ងៃទី១២ ខែសីហា បានរកឃើញជនជាតិវៀតណាមសរុបចំនួន ២៨នាក់ផងដែរ ពាក់ព័ន្ធករណីលួចឆ្លងដែនខុសច្បាប់ លួចស្នាក់នៅធ្វើការងារខុសច្បាប់ គ្មានលិខិតឆ្លងដែន កាន់កាប់ល្បែងស៊ីសង និងអ្នកចាត់ចែងល្បែងស៊ីសងអនឡាញនៅក្នុងព្រះរាជាណាចក្រកម្ពុជា ៕