លោកឧត្តមសេនីយ៍ត្រី វង្ស វិត ដឹកនាំកម្លាំងចូលរួមគោរពវិញ្ញាណក្ខន្ធ និងនាំយកថវិកាប្រគល់ ជូនគ្រួសារសពលោកអនុសេនីយ៍ ឯក សែស ប៊ុនថន
ភ្នំពេញ៖ នៅរសៀល ថ្ងៃទី១០ ខែកញ្ញា ឆ្នាំ២០២៤ លោកឧត្តមសេនីយ៍ត្រី វង្ស វិត ស្នងការរងផែនការងារធនធានមនុស្ស តំណាងលោកឧត្តមសេនីយ៍ទោ សិទ្ធិ ឡោះ ស្នងការនៃស្នងការដ្ឋាននគរបាលខេត្តបន្ទាយមានជ័យ អមដំណើរដោយលោកវរសេនីយ៍ឯក ឱ នរិន្ទ នាយការិយាល័យបុគ្គលិក លោកវរសេនីយ៍ទោ ព្រហ្ម ពិសិដ្ឋ អធិការនៃ អធិការរដ្ឋាននគរបាល ក្រុង ប៉ោយប៉ែត បានដឹកនាំមន្ត្រីនគរបាលនៃអធិការដ្ឋាននគរបាលក្រុងប៉ោយប៉ែតជាច្រើនរូប ចូលរួម គោរព វិញ្ញាណក្ខន្ធ និងនាំយកថវិកាទៅប្រគល់ជូនគ្រួសារសព លោកអនុសេនីយ៍ឯក សែស ប៊ុន ថន នាយរងផ្នែកកិច្ចការប៉ុស្តិ៍នគរបាលរដ្ឋបាលនៃអធិការដ្ឋាននគរបាលក្រុង ប៉ោយប៉ែត ដែលបានទទួលមរណភាពដោយសារខ្យល់គរនៅថ្ងៃទី៨ ខែកញ្ញា ឆ្នាំ២០២៤ នៅភូមិ ផ្សារ កណ្ដាល សង្កាត់ផ្សារ កណ្ដាល ក្រុងប៉ោយប៉ែត ខេត្តបន្ទាយមានជ័យ។
ថវិកាដែលត្រូវបានប្រគល់ជូនគ្រួសារសពចំនួន១០,៩៩៥,០០០រៀល ក្នុងនោះចំនួន៦លានរៀល ជាថវិការបស់សមាគមមិត្តនគរបាលជាតិកម្ពុជា និង៤,៩៩៥,០០០រៀលជាថវិកាបានមកពីការចូលរួមរបស់ថ្នាក់ដឹកនាំនិងមន្ត្រីនគរ បាលនៃអធិការដ្ឋាននគរបាលក្រុង ប៉ោយប៉ែត។
ក្នុងឱកាសនោះ លោកឧត្តមសេនីយ៍ត្រី វង្ស វិតបានពាំនាំនូវការចូលរួមរំលែក ទុក្ខពីសំណាក់ថ្នាក់ដឹកនាំនិងគណៈស្នងការ នឹងបានចូលរួមសោកស្តាយជាមួយក្រុមគ្រួសារសព ចំពោះការបាត់បង់ស្វាមី លោកឪពុកជាទីស្រឡាញ់ដ៏ជ្រាលជ្រៅ ដែលធ្លាប់បានផ្តល់នូវព្រហ្មវិហារធម៌ចំពោះក្រុមគ្រួសារនាគ្រាកន្លងមក និងធនធានមនុស្សដែលជាមន្ត្រីនគរបាលដ៏ល្អក្នុងការបំពេញភារកិច្ចការពារសន្តិសុខ សណ្តាប់ធ្នាប់ សុវត្ថិភាពជូនប្រជាពលរដ្ឋក្នុងមូលដ្ឋាន៕ 
