រដ្ឋមន្ត្រីអប់រំ ដឹកនាំកិច្ចប្រជុំស្តីពី “ការត្រួតពិនិត្យលើបញ្ជីគម្រោងអាទិភាព សម្រាប់ការប្រើប្រាស់ថវិកាជំពូក២១ ឆ្នាំ២០២៥ និងផែនការវិនិយោគសាធារណៈ ៣ឆ្នាំរំកិល

ភ្នំពេញ៖ នារសៀលថ្ងៃទី១០ ខែកញ្ញា ឆ្នាំ២០២៤ នៅទីស្ដីការក្រសួង ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំស្តីពី “ការត្រួតពិនិត្យលើបញ្ជីគម្រោងអាទិភាពសម្រាប់ការប្រើប្រាស់ថវិកាជំពូក២១ (គម្រោងវិនិយោគផ្ទាល់) ឆ្នាំ២០២៥ និងផែនការវិនិយោគសាធារណៈរយៈពេល ៣ ឆ្នាំរំកិល (២០២៥-២០២៨) ដោយមានការចូលរួមពី ឯកឧត្តម លោកជំទាវ ថ្នាក់ដឹកនាំ និងមន្ត្រីមកពីនាយកដ្ឋានពាក់ព័ន្ធក្រោមឱវាទ។

មុនចាប់ផ្ដើមកិច្ចពិភាក្សា នាយកដ្ឋានជំនាញបានធ្វើបទបង្ហាញ និងរាយការណ៍ជូនអង្គប្រជុំ នូវរបាយការណ៍ទាក់ទងនឹងស្ថានភាពបញ្ជីគម្រោងអាទិភាពសម្រាប់ការប្រើប្រាស់ថវិកាជំពូក២១ (គម្រោងវិនិយោគផ្ទាល់) ឆ្នាំ២០២៥ និងផែនការវិនិយោគសាធារណៈ រយៈពេល ៣ឆ្នាំរំកិល (២០២៥-២០២៨) រួមមាន (១). ស្ថានភាពទូទៅ ៖ ក). បញ្ជីឈ្មោះសាលារួម, ខ). បញ្ជីឈ្មោះសាលាអាទិភាព គ). ផែនការថវិកាឆ្នាំ២០២៥ ជំពូក២១ (គម្រោងវិនិយោគផ្ទាល់), ឃ). បញ្ជីរបស់កងវិស្វកម្មតេជោ ហ៊ុនសែន សៀមរាប ឆ្នាំ២០២៥ ង). បញ្ជីឈ្មោះសាលាដែលត្រូវសាងសង់ក្នុងឆ្នាំ២០២៥ និង ច). បញ្ជីអាទិភាព ៣ឆ្នាំរំកិល ។ (២). បញ្ហាប្រឈមផ្សេងៗ និង (៣). គោរពស្នើសុំគោលការណ៍សម្រេច។

ដើម្បីឱ្យការងារប្រព្រឹត្តទៅបានរលូនល្អ ក៏ដូចជាឆ្លើយតបទៅនឹងបញ្ហាប្រឈមផ្សេងៗ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានផ្តល់អនុសាសន៍ឱ្យក្រុមការងារ និងនាយកដ្ឋានពាក់ព័ន្ធទាំងអស់ ធ្វើការបើកកិច្ចប្រជុំដោយឡែក ដើម្បីផ្លាស់ប្តូរមតិយោបល់ ពិភាក្សាជជែកគ្នាឱ្យបានលម្អិត មានការត្រួតពិនិត្យ ធ្វើផែនការឱ្យបានច្បាស់លាស់ពាក់ព័ន្ធនឹងបញ្ហាលើសខ្វះគ្រូនៅតំបន់ទីប្រជុំជនគ្រប់ខេត្ត-ក្រុង និងតម្រូវការអគារសិក្សាផ្សេងៗ លើកទឹកចិត្តឱ្យក្រុមការងារនៅតាមបណ្តារាជធានី-ខេត្ត ឱ្យចូលរួមអនុវត្តលើផែនការនេះជាមួយគ្នា ដើម្បីងាយស្រួលពិនិត្យ និងផ្ទៀងផ្ទាត់គ្នាជាមួយ ប្រព័ន្ធគ្រប់គ្រងធនធានមនុស្ស(HRMIS) ជៀសវាងមានកំហុសឆ្គងផ្សេងៗ សម្របសម្រួលដាក់ផែនការឱ្យចំទិសដៅ ជាពិសេស រឿងអគារចាស់ទ្រុឌទ្រោម សាកល្បងបន្ថែមម៉ោងសិក្សា ដើម្បីពង្រឹងគុណភាពអប់រំ និងរៀបចំឯកសារបូកសរុបការសាងសង់នៅតាមបណ្តាខេត្ត និងតំបន់ផ្សេងៗជាប្រចាំឆ្នាំ ដើម្បីងាយស្រួលពិនិត្យ និងកែសម្រួលជាបន្តបន្ទាប់ទៀត៕