មនុស្សស្លាប់ច្រើន ហើយអត្រាកំណើតធ្លាក់ចុះដល់កម្រិតទាបបំផុត រុញច្រានរុស្ស៊ីធ្លាក់ក្នុងគ្រោះមហន្តរាយ
មូស្គូ៖ រុស្ស៊ីបានកត់ត្រាអត្រាកំណើតទាបបំផុតរបស់ខ្លួនចាប់តាំងពីឆ្នាំ១៩៩៩ ក្នុងរយៈពេលប្រាំមួយខែដំបូងនៃឆ្នាំនេះ ជាមួយនឹងការសម្រាលកូនក្នុងខែមិថុនាក្រោម ១សែននាក់ ដែលជាការធ្លាក់ចុះប្រចាំខែដំបូង។ នេះបើយោងតាមទិន្នន័យផ្លូវការដែលចេញផ្សាយកាលពីថ្ងៃចន្ទទី៩ ខែកញ្ញា ។
ការភ្ជាប់គ្នានៃការថយចុះនៃកំណើត និងការកើនឡើងអត្រាមរណភាព បាននាំឱ្យមានការថយចុះនៃចំនួនប្រជាជនរុស្ស៊ី បង្កបញ្ហាសម្រាប់វិមានក្រឹមឡាំង ខណៈដែលប្រទេសនេះកំពុងធ្វើសង្រ្គាមជាមួយប្រទេសអ៊ុយក្រែន។ វិមានក្រឹមឡាំងកាលពីខែកក្កដាបានហៅអត្រាកំណើតទាបរបស់រុស្ស៊ីថាជា «គ្រោះមហន្តរាយ» សម្រាប់ប្រទេស។
យោងតាមទិន្នន័យដែលចេញផ្សាយដោយសេវាកម្មស្ថិតិ Rosstat កុមារចំនួន៥៩៩៦០០នាក់បានកើតនៅក្នុងប្រទេសរុស្ស៊ី ក្នុងឆមាសទីមួយនៃឆ្នាំ២០២៤ ដែលមានចំនួន១៦០០០នាក់តិចជាងរយៈពេលដូចគ្នាក្នុងឆ្នាំ២០២៣ និងទាបបំផុតចាប់តាំងពីឆ្នាំ១៩៩៩។ ប្រព័ន្ធផ្សព្វផ្សាយរុស្ស៊ីបានរាយការណ៍ថា នៅក្នុងខែមិថុនាចំនួនទារកទើបនឹងកើតបានធ្លាក់ចុះ៦ភាគរយមកនៅត្រឹម៩៨៦០០នាក់ នេះជាលើកដំបូងដែលចំនួនបានធ្លាក់ចុះក្រោម១សែននាក់។
ការធ្លាក់ចុះនៃចំនួនប្រជាជនតាមធម្មជាតិរបស់ប្រទេសរុស្ស៊ីកើនឡើងនៅឆ្នាំនេះ ដោយមានអ្នកស្លាប់ចំនួន៣២៥១០០នាក់ត្រូវបានកត់ត្រានៅចន្លោះខែមករា និងខែមិថុនា ឬ ៤៩០០០ច្រើនជាងក្នុងរយៈពេលដែលត្រូវគ្នានៃឆ្នាំមុន។ ទិន្នន័យបានបង្ហាញថា ការថយចុះចំនួនប្រជាជនត្រូវបានប៉ះប៉ូវដោយកំណើន២០,១ភាគរយនៃជនចំណាកស្រុកក្នុងខែមករាដល់ខែមិថុនា។
អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) បាននិយាយកាលពីខែកក្កដាថា៖«នេះគឺជាមហន្តរាយសម្រាប់អនាគតរបស់ប្រទេសជាតិ»។ នេះបើយោងតាមទីភ្នាក់ងារសារព័ត៌មានរដ្ឋរុស្ស៊ី។ ទន្ទឹមគ្នានោះ លោកស្រី នីណា អូស្តានីណា (Nina Ostanina) ប្រធានគណៈកម្មាធិការការពារគ្រួសារនៅសភាជាន់ទាបរបស់រុស្ស៊ីបានប្រាប់ទីភ្នាក់ងារសារព័ត៌មាន RIA របស់រដ្ឋថា៖«ប្រតិបត្តិការប្រជាសាស្ត្រពិសេស” គឺចាំបាច់ដើម្បីកែលម្អអត្រាកំណើត»៕
