កម្ពុជា និង IOM ប្តេជ្ញាចិត្តសារជាថ្មីក្នុងការលើកកំពស់នូវកិច្ចសហប្រតិបត្តិការដ៏ជិតស្និទ្ធរវាងភាគីទាំងពីរ

ភ្នំពេញ៖ នៅថ្ងៃទី១១ ខែកញ្ញា ឆ្នាំ២០២៤ លោកជំទាវ យ៉ិនទៀង ពុទ្ធិរស្មី រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានទទួលជំនួបសម្តែងការគួរសម និងទទួលសារតាំងពីលោកស្រី Nellie GHUSAYNI ប្រធានបេសកកម្មថ្មីនៃអង្គការអន្តរជាតិទេសន្តរប្រវេសន៍ (IOM) ប្រចាំកម្ពុជា នៅទីស្តីការក្រសួង។

លោកស្រី Nellie បានជម្រាបជូនលោកជំទាវរដ្ឋលេខាធិការអំពីកិច្ចសហប្រតិបត្តិការរវាងអង្គការ IOM ជាមួយក្រសួងពាក់ព័ន្ធកម្ពុជាលើការងារគាំពារជនទេសន្តរប្រវេសន៍កម្ពុជា និងលើការងារទប់ស្កាត់ការជួញដូរមនុស្ស និងបានវាយតម្លៃខ្ពស់ចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការដោះស្រាយបញ្ហាប្រឈមផ្នែកទេសន្តរប្រវេសន៍។

ជាកិច្ចឆ្លើយតប លោកជំទាវរដ្ឋលេខាធិការ យ៉ិនទៀង ពុទ្ធិរស្មី បានសម្តែងការអបអរសាទរចំពោះលោកស្រី Nellie GHUSAYNI ដែលត្រូវបានតែងតាំងជាប្រធានបេសកកម្មថ្មីនៃអង្គការ IOM ប្រចាំកម្ពុជា។ លោកជំទាវ រដ្ឋលេខាធិការបានថ្លែងអំណរគុណដល់អង្គការ IOM ដែលបានផ្តល់ការគាំទ្រ និងជំនួយដល់ទេសន្តរប្រវេសន៍ងាយរងគ្រោះកម្ពុជានៅក្រៅប្រទេស និងផ្តល់ការកសាងសមត្ថភាពនៅកម្ពុជា។

នៅទីបញ្ចប់ ភាគីទាំងពីរបានប្តេជ្ញាចិត្តសារជាថ្មីក្នុងការលើកកំពស់នូវកិច្ចសហប្រតិបត្តិការដ៏ជិតស្និទ្ធរវាងកម្ពុជានិងអង្គការ IOM បន្ថែមទៀត ៕