មន្ត្រីជាន់ខ្ពស់ក្រសួងធនធានទឹក ដឹកនាំកិច្ចប្រជុំលើកទី១១ ស្ដីពីការអនុវត្តច្បាប់ស្ដីពីភាពជាដៃគូរវាងរដ្ឋ និងឯកជន ដើម្បីវិនិយោគលើការគ្រប់គ្រងធនធានទឹកនៅប្រព័ន្ធធារាសាស្ត្រព្រែកពោធិ ក្នុងខេត្តកំពង់ចាម
ភ្នំពេញ៖ នាថ្ងៃព្រហស្បតិ៍ ១០កើត ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែកញ្ញា ឆ្នាំ២០២៤ នេះ ឯកឧត្តមដ្ឋលេខាធិការក្រសួងធនធានទឹក និងឧតុនិយម បានអញ្ជើញដឹកនាំកិច្ចប្រជុំលើកទី១១ ស្តីពីការអនុវត្តយុទ្ធសាស្រ្ត និងច្បាប់ស្ដីពីភាពជាដៃគូរវាងរដ្ឋនិងឯកជន (PPP) ដើម្បីវិនិយោគលើការគ្រប់គ្រងធនធានទឹកក្នុងតំបន់ប្រព័ន្ធធារាសាស្រ្តព្រែកពោធិ ស្រុកស្រីសន្ធរ ខេត្តកំពង់ចាម។
សូមជម្រាបថា កិច្ចប្រជុំនេះមានការអញ្ជើញចូលរួមពីឯកឧត្តម លោក លោកស្រី អគ្គនាយករង និងមន្រ្តីជាន់ខ្ពស់របស់អគ្គនាយដ្ឋានភាពជាដៃគូរវាងរដ្ឋនិងឯកជន (GDPPP) នៃក្រសួងសេដ្ឋកិច្ច និងហិរញ្ញវត្ថុ លោកអភិបាលរងនៃគណៈអភិបាលខេត្តកំពង់ចាម និងខេត្តកណ្តាល លោកប្រធានមន្ទីរធនធានទឹក និងឧតុនិយមខេត្តកំពង់ចាម និងខេត្តកណ្តាល លោកអភិបាលនៃគណៈអភិបាលស្រុកស្រីសន្ធរ និងស្រុកខ្សាច់កណ្តាល លោកមេឃុំនិងមេភូមិពាក់ព័ន្ធទាំងអស់ គណៈកម្មាធិការសហគមន៍ប្រើប្រាស់ទឹកនៃប្រព័ន្ធធារាសាស្រ្តព្រែកពោធិទាំងអស់ ក្រុមហ៊ុនឯកជនខាងការគ្រប់គ្រងទឹក និងបណ្តាអង្គភាពចំណុះឱ្យក្រសួងធនធានទឹក និងឧតុនិយម។
ឯកឧត្តមរដ្ឋលេខាធិការ បានបញ្ជាក់ឱ្យដឹងថា ក្រសួងធនធានទឹក និងឧតុនិយម បានបង្កើតសហគមន៍កសិករប្រើប្រាស់ទឹកនៃប្រព័ន្ធធារាសាស្រ្តព្រែកពោធិចប់សព្វគ្រប់ ហើយសហគមន៍កសិករប្រើប្រាស់ទឹកនេះកំពុងប្រតិបត្តិការមុខងាររបស់ខ្លួនបានល្អប្រសើរ និងជាសហគមន៍ប្រើប្រាស់ទឹកដ៏ខ្លាំង ដែលធ្វើឱ្យកិច្ចដំណើរការអនុវត្តច្បាប់ភាពជាដៃគូរវាងរដ្ឋនិងឯកជន នៅតំបន់ប្រព័ន្ធធារាសាស្រ្តព្រែកពោធិបានប្រព្រឹត្តទៅរលូនល្អគួរឱ្យកោតសរសើរ និងកំពុងឈានទៅជ្រើសរើសក្រុមហ៊ុនឯកជន ដើម្បីធ្វើការវិនិយោគលើប្រព័ន្ធធារាសាស្រ្តនេះ។ ឯកឧត្តមរដ្ឋលេខាធិការបានបញ្ជាក់បន្ថែមថា បច្ចុប្បន្ន មានក្រុមហ៊ុនជាច្រើនកំពុងរៀបចំបែបបទ និងអនុវត្តតាមនីតិវិធីក្នុងការបោះទុនវិនិយោគតាមបែបភាពជាដៃគូរវាងរដ្ឋនិងឯកជន ដាក់មកក្រសួង ដើម្បីសុំច្បាប់អនុវត្តន៍។
សូមបញ្ជាក់ថា ប្រព័ន្ធធារាសាស្រ្តព្រែកពោធិដែលស្ថិតក្នុងភូមិសាស្ត្រស្រុកស្រីសន្ធរ ខេត្តកំពង់ចាម និងស្រុកខ្សាច់កណ្តាលខ ខេត្តកណ្តាល បានអនុវត្តកម្មវិធីធ្វើទំនើបកម្មវិស្វកម្មគំរូរបស់ក្រសួងធនធានទឹក និងឧតុនិយម ក្រោមហិរញ្ញប្បទានរបស់ធនាគារអភិវឌ្ឍន៍អាស៊ី (ADB) និងដោយមានការគាំទ្រយ៉ាងពេញទំហឹងពីសំណាក់ក្រសួងសេដ្ឋកិច្ច និងហិរញ្ញវត្ថុ ៕
