ឧបនាយករដ្ឋមន្ដ្រី ស សុខា គាំទ្រអនុសាសន៍ សម្តេចតេជោ ហ៊ុន សែន រៀបចំឱ្យមានច្បាប់ការពារសុខសន្តិភាពនៅកម្ពុជា
ភ្នំពេញ៖ ឯកឧត្តមអភិសន្ដិបណ្ឌិត ស សុខា ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានសម្ដែងនូវការគាំទ្រយ៉ាងពេញទំហឹង ចំពោះអនុសាសន៍របស់ សម្ដេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានថ្លែងថា «ចាំបាច់ត្រូវរៀបចំឱ្យមានដាក់ក្រុមមនុស្ស និងអង្គការចាត់តាំងខ្លះ ជាក្រុមភេរវកម្ម»។
តាមគេហទំព័រហ្វេសប៊ុករបស់ នៅរសៀលថ្ងៃទី១២ ខែកក្កដា ឆ្នាំ២០២៤ ឯកឧត្តមអភិសន្ដិបណ្ឌិត ស សុខា បានគូសបញ្ជាក់ថា «ក្នុងនាមពលរដ្ឋមួយរូប ខ្ញុំបាទសូមសម្តែងនូវការគាំទ្រយ៉ាងពេញទំហឹង ចំពោះអនុសាសន៍ប្រកបដោយការគិតគូរខ្ពស់អំពីសុខទុក្ខរបស់ប្រជាពលរដ្ឋ និងអនាគតប្រទេសកម្ពុជាទាំងមូល របស់សម្តេចតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា ដែលបានលើកឡើងក្នុងឱកាសទទួលសញ្ញាបត្របណ្ឌិតកិត្តិយស «ភាពជាអ្នកដឹកនាំ និងការកសាងសន្តិភាព» ពីសាកលវិទ្យាល័យ ដុងហ្គុកវ៉ាយស៍ នៃសាធារណរដ្ឋកូរ៉េ នាព្រឹកថ្ងៃទី១២ ខែកញ្ញា ឆ្នាំ២០២៤»។
ក្នុងសារដដែល ឯកឧត្តមអភិសន្ដិបណ្ឌិត ស សុខា បានគូសបញ្ជាក់ទៀតថា «ជាមួយគ្នានេះដែរ ខ្ញុំបាទ ក៏ដូចជាប្រជាពលរដ្ឋខ្មែរទាំងអស់ សូមគាំទ្រចំពោះអនុសាសន៍របស់សម្តេចតេជោ ដែលបានលើកឡើងថា កម្ពុជា ចាំបាច់ត្រូវតែរៀបចំឱ្យមានច្បាប់ដាក់ក្រុមមនុស្ស និងអង្គការចាត់តាំងខ្លះ ដែលមានបំណងប៉ុនប៉ងបំផ្លាញសន្តិភាព នៅកម្ពុជា ឱ្យទៅជាក្រុមភារវកម្ម នៅពេលខាងមុខ។ ក្នុងនោះ អនុសាសន៍ដ៏ថ្លៃថ្លារបស់សម្តេចតេជោ ពិតជាបានបញ្ជាក់យ៉ាងច្បាស់ក្នុងនាមអ្នកតស៊ូ លះបង់សាច់ស្រស់ ឈាមស្រស់ ដើម្បីរំដោះប្រទេសជាតិ និងប្រជាជនពីរបបប្រល័យពូជសាសន៍ ក៏ដូចជា ការខិតខំសម្របសម្រួល ដើម្បីស្វែងរកសុខសន្តិភាពពេញបរិបូរណ៍ និងការកសាងប្រទេសជាតិ ពីបាតដៃទទេ រហូតដល់មានការរីកចម្រើនដូចសព្វថ្ងៃនេះ»។
ឯកឧត្តមអភិសន្ដិបណ្ឌិត ស សុខា បន្ដថា សូមអរគុណសន្តិភាព និងសូមគាំទ្រចំពោះការបង្កើតច្បាប់ ដើម្បីការពារសុខសន្តិភាព នៅកម្ពុជា៕
