ឯកឧត្ដម យក់ ប៊ុនណា ដឹកនាំកិច្ចប្រជុំអន្តរក្រសួង ដើម្បីពិភាក្សាលើគោលការណ៍ និងនីតិវិធីនៃការតែងតាំង ផ្លាស់ប្តូរ និងបញ្ចប់មុខ ដំណែងនាយក នៃគ្រឹះស្ថានមត្តេយ្យសិក្សា និងគ្រឹះស្ថានបឋមសិក្សាសាធារណៈ

ភ្នំពេញ៖ នារសៀលថ្ងៃទី១១ ខែកញ្ញា ឆ្នាំ២០២៤ ឯកឧត្ដម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជាប្រធានអនុគណៈកម្មាធិការប្រតិបត្តិនៃ គ.វ.រ. បានដឹកនាំកិច្ចប្រជុំពិភាក្សាលើសេចក្តីព្រាងអនុក្រឹត្យ ស្តីពីគោលការណ៍ និងនីតិវិធីនៃការតែងតាំង ផ្លាស់ប្តូរ និងបញ្ចប់មុខ ដំណែងនាយក នៃគ្រឹះស្ថានមត្តេយ្យសិក្សា និងគ្រឹះស្ថានបឋមសិក្សាសាធារណៈ និងសេចក្តីព្រាងនិយាមនីតិវិធី ប្រតិបត្តិសម្រាប់ការតែងតាំង ផ្លាស់ប្តូរ និងបញ្ចប់មុខតំណែងនាយកនៃគ្រឹះស្ថានមត្តេយ្យសិក្សា និងគ្រឹះស្ថានបឋម សិក្សាសាធារណៈ នៅសាលប្រជុំក្នុងបរិវេណសាលាភូមិន្ទរដ្ឋបាល ដោយមានការអញ្ជើញចូលរួមពី ឯកឧត្ដម លោកជំទាវ លោក លោកស្រី ថ្នាក់ដឹកនាំមន្រ្តីរាជការ តំណាងក្រសួងមហាផ្ទៃ តំណាងទីស្តីការគណៈរដ្ឋមន្រ្តី តំណាងក្រសួងសេដ្ឋកិច្ច និងហិរញ្ញវត្ថុ តំណាងក្រសួងអប់រំយុវជន និងកីឡា តំណាងក្រសួងសុខាភិបាល តំណាងក្រុងប្រឹក្សាអ្នកច្បាប់ និងព្រមទាំងក្រុមការងារពាក់ព័ន្ធជាច្រើនរូប។

អង្គប្រជុំបានពិភាក្សាទៅលើចំនុចសំខាន់ៗរួមមាន៖ ១).ការពិនិត្យនិងកែសម្រួលព្រះរាជក្រឹត្យស្តីពីការកែសម្រួលទៅលើព្រះរាជក្រឹត្យស្តីពីលក្ខន្តិកៈដោយឡែកសម្រាប់បុគ្គលិករដ្ឋបាលថ្នាក់ក្រោមជាតិ, ២).ការកែសម្រួលទៅលើអនុក្រឹត្យស្តីពីគោលការណ៍និងនីតិវិធីនៃការតែងតាំង ការផ្លាស់ប្តូរ និងការបញ្ចប់មុខតំណែងនាយកនៃគ្រឹះស្ថានសិក្សាសាធារណៈនិងគ្រឹងស្ថានបឋមសិក្សាសាធារណៈ, ៣).និយាមនីតិវិធីប្រតិបត្តិ សម្រាប់ការតែងតាំង ការផ្លាស់ប្តូរ និងការបញ្ចប់មុខតំណែងនាយក នៃគ្រឹះស្ថានមត្តេយ្យសិក្សាសាធារណៈ និងគ្រឹះស្ថានបឋមសិក្សាសាធារណៈ និង៤).ផ្សេងៗ។

បន្ទាប់ពីបានពិនិត្យលើចំណុចមួយចំនួន ព្រមទាំងមានការចូលរួមយ៉ាងផុសផុលពីថ្នាក់ដឹកនាំ និងក្រុមប្រឹក្សាអ្នកច្បាប់ក្នុងការតាក់តែងការរៀបចំសេចក្តីព្រាងព្រះរាជក្រឹត្យនិងអនុក្រឹត្យរួចមក អង្គប្រជុំបានពិភាក្សាផ្តល់មតិយោបល់ជាធាតុចូលជាច្រើនក្នុងការកែសម្រួលទៅលើចំណុចសំខាន់ៗរួមមាន៖ ១).ទម្រង់ព្រះរាជក្រឹត្យ និងអនុក្រឹត្យ, ២).កែសម្រួលមូលបទមួយចំនួន និង៣).កែសម្រួលខ្លឹមសារតាមមាត្រានីមួយៗដែលមាននៅក្នុងបទបញ្ញត្តិទូទៅ និងតាមជំពូកនានា។

នៅចុងបញ្ចប់កិច្ចប្រជុំ ឯកឧត្តមប្រធានអង្គប្រជុំ មានប្រសាសន៍ថាសម្រាប់ការងារបន្តអនុក្រឹត្យនិងព្រះរាជក្រឹត្យ នេះនិងដាក់ឆ្លង ឯកឧត្តមឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ស្នើសុំឱ្យក្រុមការងារធ្វើរបាយការណ៍សង្ខេបរាយការណ៍ជូន ឯកឧត្តមឧបនាយករដ្ឋមន្រ្តី រដ្ឋមន្រ្តីក្រសួងមុខងារសាធារណៈ ដើម្បីសម្រេចនិងស្នើសុំកិច្ចប្រជុំបន្ត ក្នុងក្របខណ្ឌលេខាធិការដ្ឋាន នៃ គ.វ.រ. និងក្រសួងដែលពាក់ព័ន្ធ និងរដ្ឋបាលថ្នាក់ក្រោមជាតិ ៕