ចិន នឹងកម្ទេចរាល់ការឈ្លានពានរបស់បរទេស ចូលទៅក្នុងទឹកដីអធិបតេយ្យភាពខ្លួន រួមទាំងសមុទ្ទចិនខាងត្បូង
ប៉េកាំង៖ ចិននឹងកម្ទេចរាល់ការឈ្លានពានរបស់បរទេស ចូលទៅក្នុងទឹកដីអធិបតេយ្យភាពរបស់ខ្លួន រួមទាំងនៅក្នុងសមុទ្ទចិនខាងត្បូងផងដែរ។ នេះបើតាមការអះអាងដោយមន្ត្រីយោធាជាន់ខ្ពស់របស់ចិន កាលពីថ្ងៃព្រហស្បតិ៍ទី១២ ខែកញ្ញា នៅខាងក្រៅវេទិកាការពារជាតិ។
លោកឧត្តមសេនីយ៍ឯក ហ៊ី ឡី បានប្រាប់ក្រុមអ្នកសារព័ត៌មានថា៖«យើងសង្ឃឹមថា សមុទ្ទចិនខាងត្បូងនឹងនៅតែជាសមុទ្ទសន្តិភាព»។ ប៉ុន្តែលោក បានព្រលយពាក្យថា៖«ប្រសិនបើសហរដ្ឋអាម៉េរិកលេងល្បិចយកប្រទេសក្នុងតំបន់ជាកូនអ៊ុក ក្នុងការបង្ករជម្លោះ នោះយើងក្នុងនាមជាកងទ័ពរំដោះប្រជាជនចិន [..] មិនមានការអត់ធ្មត់ណាមួយឡើយ»។ មន្រ្តីយោធាចិនជាន់ខ្ពស់រូបនេះ បានបន្ថែមថា៖«យើងជាកងទ័ពរំដោះប្រជាជនចិន នឹងដោះស្រាយយ៉ាងម៉ឺងម៉ាត់នូវការទន្ទ្រានលុកលុយដោយអរិភាពរបស់បរទេសមកលើសិទ្ធិ និងផលប្រយោជន៍ដែនដី អធិបតេយ្យភាព និងដែនសមុទ្ទរបស់ប្រទេសចិន ដោយមានការប្តេជ្ញាចិត្តយ៉ាងម៉ឺងម៉ាត់ ឆន្ទៈដ៏មុតមាំ សមត្ថភាពរឹងមាំ និងមធ្យោបាយដ៏មានប្រសិទ្ធភាព»។
លើសពីនេះ លោកឧត្តមសេនីយ៍ឯករូបនេះ បានសង្កត់ធ្ងន់ថា៖«ដំណោះស្រាយចំពោះភាពតានតឹងទាំងនោះ អាស្រ័យលើសហរដ្ឋអាម៉េរិក[..]។ យើងចង់ឱ្យសហរដ្ឋអាម៉េរិករួមចំណែកបន្ថែមទៀតដល់សន្តិភាព សន្តិសុខ និងស្ថិរភាពក្នុងតំបន់ និងពិភពលោក»។ មហាអំណាចពិភពលោកទាំង២ [សហរដ្ឋអាម៉េរិក និងចិន] បានប៉ះទង្គិចគ្នាជារឿយៗ ជុំវិញវិធីសាស្ដ្រអះអាងកាន់តែខ្លាំងឡើងរបស់រដ្ឋធានីប៉េកាំងនៅក្នុងតំបន់ដែនសមុទ្ទមានជម្លោះ រួមទាំងសមុទ្ទចិនខាងត្បូងផងដែរ។ ក្នុងរយៈពេលប៉ុន្មានខែថ្មីៗនេះ នាវារបស់ចិន បានប្រឈមមុខដាក់គ្នាយ៉ាងតឹងតែងជាមួយនាវាហ្វីលីពីននៅក្នុងដែនទឹក ដែលរដ្ឋធានីប៉េកាំងទាមទារស្ទើរតែទាំងស្រុង បើទោះបីជាតុលាការអន្តរជាតិសម្រេចថាការអះអាងរបស់យក្សកំណាចអាស៊ីមួយនេះ មិនមានមូលដ្ឋានផ្លូវច្បាប់ក៏ដោយ៕
