ឯកឧត្តម ចាន់ យុត្ថា ទទួលជួបពិភាក្សាការងារជាមួយនាយិកាទីភ្នាក់ងារបារាំងសម្រាប់ការអភិវឌ្ឍ
ភ្នំពេញ៖ នៅថ្ងៃទី១៣ ខែកញ្ញា ២០២៤ នៅទីស្ដីការក្រសួង ឯកឧត្តម ចាន់ យុត្ថា រដ្ឋលេខាធិការក្រសួងធនធានទឹក និងឧតុនិយម និងជានាយកទទួលបន្ទុកគម្រោងហិរញ្ញប្បទាននៃភាគីបារាំង បានទទួលជួបពិភាក្សាការងារជាមួយអ្នកស្រី Sandrine Boucher នាយិកាទីភ្នាក់ងារបារាំងសម្រាប់ការអភិវឌ្ឍ(AFD) និងសហការី អំពីវឌ្ឍនភាពការងារគម្រោងស្តារ គ្រប់គ្រង និងអភិវឌ្ឍន៍ស្ទឹងស្វាយចេក។
ឯកឧត្តមរដ្ឋលេខាធិការបានបញ្ជាក់ឱ្យដឹងថា ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការ និងការគាំទ្រកន្លងមក ពិសេសដំណើរសិក្សាលើគម្រោងខាងលើរហូតដល់បានបញ្ចប់ជាស្ថាពរ និងឈានដល់ការចុះហត្ថលេខាលើកិច្ចព្រមព្រៀងឥណទាននាពេលឆាប់ៗខាងមុខ។
ទន្ទឹមនឹងនេះ ឯកឧត្តមរដ្ឋលេខាធិការបានគូសបញ្ជាក់ថា ភាគីទាំងពីរបានប្តេជ្ញាពង្រឹងកិច្ចសហការបន្ថែមទៀត ដើម្បីឈានដល់ការអនុវត្តគម្រោងប្រកបដោយប្រសិទ្ធភាពបន្ទាប់ពីចុះកិច្ចព្រមព្រៀងរួចរាល់៕
