រដ្ឋមន្រ្តីក្រសួងធម្មការ៖ ខេត្តជាប់ព្រំដែនត្រូវយកចិត្តទុកដាក់ចំពោះការលំហូរចូលនៃសាសនាផ្សេងៗមកលើមូលដ្ឋានរបស់ខ្លួន
ភ្នំពេញ៖ ឯកឧត្តម ចាយ បូរិន រដ្ឋមន្រ្តីក្រសួងធម្មការ និងសាសនា បានថ្លែថា ខេត្តជាប់ព្រំដែនត្រូវយកចិត្តទុកដាក់ចំពោះការលំហូរចូលនៃសាសនាផ្សេងៗពីប្រទេសជិតខាងមកលើមូលដ្ឋានរបស់ខ្លួន។
ឯកឧត្តម ចាយ បូរិន បានថ្លែងបែបនេះក្នុងឱកាសដែលឯកឧត្តមអញ្ជើញបន្តចុះសំណេះសំណាលសួរសុខទុក្ខ មន្ត្រីរាជការនៃមន្ទីរធម្មការនិងសាសនាខេត្តឧត្តរមានជ័យ ដោយមានការអញ្ជើញចូលរួមពីសំណាក់លោក សង់ រីហា អភិបាលរង តំណាងឯកឧត្តម មាន ចាន់យ៉ាដា អភិបាលនៃគណៈអភិបាលខេត្តឧត្តរមានជ័យ លោក ឆឹម តឿ ប្រធានមន្ទីរធម្មការ និងសាសនាខេត្ត នាព្រឹកថ្ងៃទី១៤ ខែកញ្ញា ឆ្នាំ២០២៤ នៅមន្ទីរធម្មការ និងសាសនាខេត្តឧត្តរមានជ័យ។
ឯកឧត្តមរដ្ឋមន្រ្តី បានមានប្រសាសន៍ថា ការជួបសំណេះសំណាលនាពេលនេះ គឺដើម្បីឈ្វេងយល់នូវសកម្មភាពការងាររបស់មន្រ្តីរាជការនៃមន្ទីរធម្មការនិងសាសនា ស្តាប់ពីវឌ្ឍនភាពការងារ បញ្ហាប្រឈម និងសំណូមពរជាក់ស្តែងដែលជាតម្រូវការរបស់មន្ទីរធម្មការនិងសាសនាខេត្ត និង ជំរុញការអនុវត្តកម្មវិធីនយោបាយ យុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយកិត្តិបណ្ឌិតឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។
ឯកឧត្តមរដ្ឋមន្ត្រី បានបន្តថា ខេត្តឧត្តរមានជ័យ គឺជាខេត្តមួយស្ថិតនៅភូមិភាគពាយ័ព្យហើយមានព្រំប្រទល់ជាប់រាជាណាចក្រថៃ ដែលជាប្រទេសមានប្រពៃណី វប្បធម៌ប្រហាក់ប្រហែលនិងកម្ពុជាយើង ដូចនេះយើងត្រូវយកចិត្តចំពោះការលំហូរចូលនៃសាសនាផ្សេងៗពីប្រទេសជិតខាងមកលើមូលដ្ឋានរបស់ខ្លួន ដោយយកចិត្តទុកដាក់លើមន្ត្រីខ្លួន ដាច់ខាតត្រូវមាន ចំណេះ ជំនាញ និងវិជ្ជាជីវៈច្បាស់លាស់ សិក្សាឲ្យច្បាស់នូវសាសនាទាំងអស់ក្នុងខេត្ត ហើយអភិរក្សឱ្យបានល្អ នូវវប្បធម៌ ទំនៀមទម្លាប់ ប្រពៃណី ខ្មែរយើងឱ្យបានខ្ជាប់ខ្ជួន ហើយមន្ទីរធម្មការនិងសាសនាខេត្តត្រូវសហការជាមួយព្រះសង្ឃ គណៈកម្មការអាចារ្យ វត្ត អាជ្ញាធរមូលដ្ឋានរៀបចំទីអារាមឱ្យមានសណ្តាប់ធ្នាប់ល្អ ក្នុងឱកាសនៃការខិតជិតចូលមកដល់នៃពិធីបុណ្យកាន់បិណ្ឌ-ភ្ជុំបិណ្ឌដែលជាពិធីបុណ្យធំជាងគេសម្រាប់ពុទ្ធបរិស័ទដែលកាន់ព្រះពុទ្ធសាសនា ដែលជាសាសនារបស់រដ្ឋ គឺត្រូវរក្សាឱ្យបាន (វបីឬវត្តបី )គឺវត្តស្អាត វត្តស្វាង វត្តស្ងប់។
លោក ឆឹម តឿ ប្រធានមន្ទីរធម្មការ និងសាសនាខេត្ត បានជម្រាបជូន ឯកឧត្តមរដ្ឋមន្រ្តី អំពីវឌ្ឍនភាពការងារ បញ្ហាប្រឈម និងសំនូមពរ របស់មន្ទីរធម្មការនិងសាសនាខេត្ត ដោយនៅក្នុងខេត្តមានការប្រតិបត្តិសាសនាធំៗចំនួន៥គឺ៖ ១.ព្រះពុទ្ធសាសនាដែលជាសាសនារបស់រដ្ឋ, ២.គ្រិស្តសាសនា, ៣.ឥស្លាមសាសនា, ៤.បាហៃសាសនា និង៥.ព្រះពុទ្ធសាសនាមហាយាន និងកង្វះមន្ត្រីក្របខ័ណ្ឌ និងគោរពស្នើរសុំឯកឧត្តមរដ្ឋមន្រ្តី ពិនិត្យវត្តចំនួន២២ដែលមិនទាន់មានប្រកាសទទួលស្គាល់ពីក្រសួង ក្នុងនោះមានវត្តគណៈធម្មយុត្តិចំនួន៨វត្ត។
បន្ទាប់ពីស្តាប់ពីវឌ្ឍនភាពការងារ បញ្ហាប្រឈម និងសំណូមពរជាក់ស្តែងដែលជាតម្រូវការរបស់មន្ទីរធម្មការនិងសាសនាខេត្ត ឯកឧត្តមរដ្ឋមន្រ្តី បានទទួលយកទៅពិចារណាមុននិងធ្វើការដោះស្រាយឱ្យសមស្របទៅនិងកម្មវិធីនយោបាយ យុទ្ធសាស្ត្របញ្ចកោណ ដំណាក់កាលទី១ នៃរាជរដ្ឋាភិបាលបន្តវេន។
នាឱកាសនេះ ឯកឧត្តមរដ្ឋមន្ត្រី ក៏បានអំពាវនាវដល់ព្រះសង្ឃ បងប្អូនប្រជាពលរដ្ឋ និមន្តនិងអញ្ជើញ ទៅលេងកំសាន្តនិងមើលដោយផ្ទាល់ពីការអភិវឌ្ឍន៍ ការកសាងហេដ្ឋារចនាសម្ព័ន្ធផ្លូវក្រវាត់ព្រំដែន នៅខេត្តភាគឥសាន្តចំនួន៤ខេត្តគឺ ខេត្តក្រចេះ ស្ទឹងត្រែង មណ្ឌលគិរី និងរតនៈគិរី ដែលរាជរដ្ឋាភិបាលបានរៀបចំជាមធ្យោបាយដឹកជញ្ជូនទាំងទៅនឹងមក និងផ្តល់ជូនអាហារ៣ពេលជូនបងប្អូនប្រជាពលរដ្ឋដែលទៅទស្សនាកំសាន្តដោយឥតគិតថ្លៃ ចាប់ពីពេលនេះ រហូតដល់ចុងឆ្នាំ២០២៤ ៕
