ក្រសួងមុខងារសាធារណៈ ប្រជុំត្រួតពិនិត្យឡើងវិញលើគោលការណ៍ និងលក្ខណៈវិនិច្ឆ័យ នៃតំបន់ជួបការលំបាក និងតំបន់ដាច់ស្រយាល និងការកំណត់ប្រាក់តំបន់សម្រាប់មន្រ្តីរាជការស៊ីវិលក្នុងវិស័យអប់រំ និងវិស័យសុខាភិបាល

ភ្នំពេញ៖ នាព្រឹកថ្ងៃទី១២ ខែកញ្ញា ឆ្នាំ២០២៤ ឯកឧត្តម យក់ ប៊ុនណា រដ្ឋលេខាធិការប្រចាំការ បានដឹកនាំកិច្ចប្រជុំពិភាក្សាត្រួតពិនិត្យឡើងវិញលើគោលការណ៍និងលក្ខណៈវិនិច្ឆ័យ នៃតំបន់ជួបការលំបាក និងតំបន់ដាច់ស្រយាលនិងការកំណត់ប្រាក់តំបន់សម្រាប់មន្រ្តីរាជការស៊ីវិលក្នុងវិស័យអប់រំ និងវិស័យសុខាភិបាល។

កិច្ចប្រជុំនេះប្រព្រឹត្តទៅនៅទីស្តីការក្រសួងមុខងារសាធារណៈ ដោយមានការចួលរួមពីតំណាងក្រសួងសេដ្ឋកិច្ចនិងហិរញ្ញវត្ថុ តំណាងក្រសួងសុខាភិបាល តំណាងក្រសួងអប់រំ យុវជន និងកីឡា ព្រមទាំងថ្នាក់ដឹកនាំនិងមន្រ្តីជំនាញពាក់ព័ន្ធក្រសួងមុងារសាធារណៈសរុបចំនួន៥១នាក់។

កិច្ចប្រជុំបានពិភាក្សាទៅលើជម្រើសរបៀបវារៈចំនួន៣រួមមាន៖ ១).កែសម្រួលអនុក្រឹត្យលេខ៣៧អនក្រ.បក ចុះថ្ងៃទី១៨ ខែមីនា ឆ្នាំ២០១៥ ស្តីពីប្រាក់តំបន់សម្រាប់មន្រ្តីរាជការស៊ីវិលក្នុងវិស័យអប់រំ និងវិស័យសុខាភិបាល, ២).ជ្រើសរើសមន្រ្តីរាជការដើម្បីបំពេញបន្ថែមនៅតាមតំបន់ទាំងនោះដោយផ្អែកលើកិច្ចព្រមព្រាងការងារ ដោយនិរាករណ៍អនុក្រឹត្យខាងលើ និង៣).បង្កើតហេដ្ឋារចនាសម្ព័ន្ធនៅតាមតំបន់ទាំងនោះដើម្បីផ្តល់ភាពងាយស្រួលដល់មន្រ្តីទៅបំពេញការងារ។

គួររំលឹកផងដែរអនុក្រឹត្យលេខ៣៧អនក្រ.បក ចុះថ្ងៃទី១៨ ខែមីនា ឆ្នាំ២០១៥ ស្តីពីប្រាក់តំបន់សម្រាប់មន្រ្តីរាជការស៊ីវិលក្នុងវិស័យអប់រំ និងវិស័យសុខាភិបាល បង្កើតឡើងដើម្បីលើកទឹកចិត្តដល់មន្រ្តីរាជការទៅបម្រើការងារក្នុងតំបន់ជួបការលំបាកចំពោះអង្គភាពដែលស្ថិតក្នុងលក្ខខណ្ឌណាមួយ ដូចជា៖ តំបន់ជួបប្រទះការលំបាកខាងគមនាគមន៍ តំបន់ទឹកលិច ឬតំបន់ងាយរងគ្រោះដោយធម្មជាតិ អង្គភាពសុខាភិបាល ដែលមានវិសាលភាពគ្របដណ្តប់តំបន់កោះ តំបន់ភ្នំ និងប្រជាជនរស់នៅតំបន់ឆ្ងាយ ព្រមទាំងភូមិបណ្តែតទឹក ៕