នាយករដ្ឋមន្ត្រី ហ៊ុន ម៉ាណែត ណែនាំឲ្យភាគីពាក់ព័ន្ធបន្តរួមគ្នាធ្វើទំនើបកម្មមន្ទីរពេទ្យកាល់ម៉ែត ឱ្យនាំមុខគេនៅកម្ពុជា

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានណែនាំភាគីពាក់ព័ន្ធបន្តរួមគ្នា ធ្វើទំនើបកម្មមន្ទីរពេទ្យកាល់ម៉ែត ឱ្យនាំមុខនៅកម្ពុជា ។

ក្នុងឱកាសអញ្ជើញបញ្ចុះបឋមសិលាបើកការដ្ឋាន សាងសង់អគារបន្ថែមចំនួន០៣ នៅមន្ទីរពេទ្យកាល់ម៉ែត រួមមាន អគារមជ្ឈមណ្ឌលកណ្តាល អគារចំណត និងរោងជាង និង អគារមជ្ឈមណ្ឌលវេជ្ជសាស្ត្រស៊ីក្លូត្រុង នាថ្ងៃទី១៦ ខែកញ្ញា ឆ្នាំ២០២៤ សម្តេចធិបតី ហ៊ុន ម៉ាណែត បានថ្លែងទៅអំណរគុណចំពោះកិច្ចខិតខំប្រឹងប្រែង របស់អតីតអគ្គនាយកមន្ទីរពេទ្យកាល់ម៉ែត ដែលបច្ចុប្បន្នជារដ្ឋមន្ត្រីសុខាភិបាល និងអគ្គនាយកមន្ទីរពេទ្យកាល់ម៉ែតបច្ចុប្បន្ន ដែលបានធ្វើឱ្យមន្ទីរពេទ្យកាល់ម៉ែត ក្លាយជាមជ្ឈមណ្ឌលផ្តល់សេវាសុខាភិបាលមួយដ៏លេចធ្លោជាងគេ ។

សម្ដេចធិបតីបញ្ជាក់ថា «ពេទ្យនៅភ្នំពេញ ហើយពេទ្យកាល់ម៉ែតនេះ ឯកឧត្តមអគ្គនាយកនៅទីនេះ ក៏សូមអរគុណ បន្តដឹកនាំពីឯកឧត្តមរដ្ឋមន្ត្រីអតីតអគ្គនាយក ហើយអគ្គនាយកមន្ទីរពេទ្យ បន្តរួមគ្នាដើម្បីធ្វើទំនើបកម្មពេទ្យនាំមុខ នៅក្នុងព្រះរាជាណាចក្រកម្ពុជា របស់យើងនៅទីនេះ» ។

សម្តេចធិបតីលើកឡើងបន្តថា ទៅអនាគតមិនមែនទៅជាកន្លែងតែមួយទេ ជំហ៊ានដែលយើងត្រូវបន្ថែម គឺពេទ្យតំបន់ ដើម្បីមានកុំឲ្យមកកកស្ទះនៅភ្នំពេញ ហើយមិនបាច់ធ្វើដំណើរមកយូរ ត្រូវពង្រឹងសមត្ថភាពពេទ្យតំបន់របស់យើង ឱ្យបានសមត្ថភាព ហើយទៅថ្ងៃអនាគតទៀត ជំហ៊ាន៣ គឺពេទ្យរាជធានី ពេទ្យខេត្តរបស់យើង ​ដើម្បីឱ្យមានសមត្ថភាពច្រើន ពិតណាស់ជំនាញមួយចំនួន គឺប្រមូលផ្តុំនៅថ្នាក់ជាតិ ប៉ុន្តែជំនាញបឋមមួយចំនួន គឺនៅមន្ទីរពេទ្យបង្អែកខេត្ត និងមណ្ឌលសុខភាពស្រុក ៕