សិក្ខាកាមវគ្គបំប៉នពង្រឹងអង្គភាព តំបន់ប្រតិបត្តិការសឹករងបន្ទាយមានជ័យ បានធ្វើលំហាត់យុទ្ធដំណើរទ័ព
ភ្នំពេញ៖ នាថ្ងៃទី១៥ ខែកញ្ញា ឆ្នាំ២០២៤ ដោយអនុវត្តតាមការចង្អុលបង្ហាញរបស់ឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករងបន្ទាយមានជ័យ លោកវរសេនីយ៍ត្រី រិន ចាន់រិត នាយការិយាល័យហ្វឹកហ្វឺន និងក្រុមគ្រូ ដឹកនាំសិក្ខាកាម ធ្វើលំហាត់យុទ្ធដំណើរទ័ព ឆ្លងកាត់ភ្នំចំនួន ៤ គឺ ភ្នំបាក់ ភ្នំជញ្ជាំង ភ្នំខ្លាកូន និងភ្នំដូងព្រះ រយៈពេល ១យប់ ២ថ្ងៃ ចម្ងាយ ១៤គីឡូម៉ែត្រ ភូមិសាស្ដ្រ ក្រុងសិរីសោភ័ណ។
ក្នុងការធ្វើយុទ្ធដំណើរទ័ពនេះដែរ លោក វរសេនីយ៍ត្រី នាយការិយាល័យហ្វឹកហ្វឺន បានលើកឡើងថា ស្ថិតក្នុងស្ថានភាពដែលប្រទេសជាតិមានសុខសន្តិភាព ស្ថិរភាពនយោបាយគឺជាឱកាសសម្រាប់កងទ័ពត្រូវអនុវត្តលំហាត់យុទ្ធដំណើរទ័ពពង្រឹង កាយសម្បទារឹងមាំ និងរំលឹកឡើងវិញនូវជំនាញបច្ចេកទេស ពិសេសលើផ្នែកយុទ្ធវិធី ដើម្បីធានាបាននូវការអនុវត្តន៍តួនាទី ភារកិច្ចទទួលបានជោគជ័យតាមបទបញ្ជារបស់ថ្នាក់ដឹកនាំប្រគល់ជូន។
លោកវរសេនីយ៍ត្រី នាយការិយាល័យ ហ្វឹកហ្វឺនបានបន្តទៀតថា ការធ្វើលំហាត់យុទ្ធដំណើរនាពេលនេះ គឺដើម្បីឲ្យសិក្ខាកាមទាំងអស់ក្នុងវគ្គបំប៉នពង្រឹង តំបន់ប្រតិបត្តិការសឹករងបន្ទាយមានជ័យ ទទួលបាននូវចំណេះដឹង និងមានសមត្ថភាពគ្រប់គ្រាន់ក្នុងការដឹកនាំបញ្ជា ការងារលើផ្នែកយុទ្ធវិធី ត្រៀមប្រយុទ្ធបានស្ទាត់ជំនាញដើម្បីធានាបាននូវភារកិច្ចការពារជាតិមាតុភូមិ និងប្រជាជន៕
