សម្ដេចធិបតី៖ ក្នុងដំណាក់កាលកូវីដ១៩ កម្ពុជាមានសមត្ថភាពម្ចាស់ការ ព្រោះបើសិនពេទ្យអត់សមត្ថភាព យើងអាចគ្រោះថ្នាក់ ហើយស្លាប់ច្រើនជាងនេះ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា ក្នុងដំណាក់កាលជំងឺកូវីដ១៩ កម្ពុជាមានសមត្ថភាពម្ចាស់ការ ព្រោះពេលនោះបើសិនពេទ្យយើងអត់សមត្ថភាព យើងអាចគ្រោះថ្នាក់ ហើយស្លាប់ច្រើនជាងនេះ ។

ក្នុងឱកាសអញ្ជើញបញ្ចុះបឋមសិលា​បើកការដ្ឋានសាងសង់អគារបន្ថែមចំនួន៣ នៅមន្ទីរពេទ្យកាល់ម៉ែត រួមមាន អគារមជ្ឈមណ្ឌលកណ្តាល អគារចំណត និងរោងជាង និងអគារមជ្ឈមណ្ឌលវេជ្ជសាស្ត្រស៊ីក្លូត្រុង សម្ដេចធិបតី ហ៊ុន ម៉ាណែត បានបញ្ជាក់ថា «ក្នុងដំណាក់កាលជំងឺកូវីដ១៩ យើងមានសមត្ថភាពម្ចាស់ការ ព្រោះពេលនោះបើសិនពេទ្យយើងអត់សមត្ថភាព យើងអាចគ្រោះថ្នាក់ ហើយស្លាប់ច្រើនជាងនេះ។ ព្រោះប្រទេសនីមួយៗគ្មានអ្នកណាចេញបានទេ គេបិទព្រំដែនចេញលែងរួច គេបិទផ្លូវអាកាស ហើយម្នាក់ៗទទួលខុសត្រូវក្នុងប្រទេសរបស់ខ្លួន»។

សម្ដេចធិបតី ហ៊ុន ម៉ាណែត បានថ្លែងអំណរគុណដល់សាស្ដ្រាចារ្យវេជ្ជបណ្ឌិត ម៉ម ប៊ុនហេង អតីតរដ្ឋមន្ដ្រីក្រសួងសុខាភិបាល និងថ្នាក់ដឹកនាំក្រសួង ព្រមទាំងក្រុមគ្រូពេទ្យទាំងអស់ ដែលបានខិតខំប្រឹងប្រែងពុះពារ និងជម្នះរាល់គ្រប់ឧបសគ្គទាំងអស់ ដើម្បីការពារសុខុមាលភាពរបស់ប្រជាពលរដ្ឋ។

ជាមួយគ្នានោះសម្ដេចធិបតី ហ៊ុន ម៉ាណែត បានណែនាំឲ្យគ្រូពេទ្យ បុគ្គលិកបច្ចេកទេស និងបុគ្គលិកសុខាភិបាល ទាំងក្នុងវិស័យសាធារណៈ និងឯកជន បង្កើនការយកចិត្តទុកដាក់លើសេវាបង្ការ និងសេវាព្យាបាលបឋម ដើម្បីទប់ស្កាត់ការវិវត្តនៃជំងឺទៅកាន់ស្ថានភាពធ្ងន់ធ្ងរ ឬរ៉ាំរ៉ៃ ដែលអ្នកជំងឺ គ្រួសារអ្នកជំងឺ ប្រព័ន្ធសុខាភិបាល និងប្រព័ន្ធគាំពារសង្គមត្រូវចំណាយខ្ពស់ ៕