អភិបាលខេត្តតាកែវ ដឹកនាំមន្រ្តីចុះទៅដល់បង្គោលព្រំដែន នៅច្រកទ្វារអន្តរជាតិភ្នំដិនជាប់វៀតណាម និងអះអាងថាគ្មានឡើយការបង្ខិតបង្គោលព្រំដែន ដូចការចោទប្រកាន់របស់ក្រុមប្រឆាំងនៅក្រៅស្រុក
ភ្នំពេញ៖ ឯកឧត្តម វ៉ី សំណាង អភិបាលខេត្តតាកែវ នៅថ្ងៃទី១៦ ខែកញ្ញា ឆ្នាំ២០២៤ បានដឹកនាំមន្រ្តីចុះធ្វើទស្សនកិច្ចតំបន់ព្រំដែនរវាងខេត្តតាកែវ និងខេត្តចំនួន២របស់វៀតណាម គឺខេត្តអាងយ៉ាង និងខេត្តគៀនយ៉ាង ដោយចាប់ផ្ដើមពីបង្គោលព្រំដែន លេខ២៧៥ នៅច្រកទ្វាអន្តរជាតិភ្នំដិន និងបង្គោលព្រំដែនផ្សេងៗទៀតនៅក្នុងស្រុកគីរីវង់។
ក្នុងឱកាសចុះទស្សនកិច្ចនោះ ឯកឧត្តមអភិបាលខេត្ត បានបញ្ជាក់ច្បាស់ៗថា មិនមានការបង្ខិតបង្គោលព្រំដែនដូចការចោទប្រកាន់របស់ប្រឆាំងនោះទេ ពោលគឺស្ថានភាពបង្គោលព្រំដែននៅគឺនៅដដែល ហើយសមត្ថកិច្ចដែលឈរជើងការពារ នៅតាមព្រំដែនទាំងទាហាន និងនគបាលកំពុងការពារបានយ៉ាងល្អប្រសើរ។
ឯកឧត្តម វ៉ី សំណាង បានអំពាវនាវឲ្យបងប្អូនប្រជាពលរដ្ឋ កុំចាញ់បោកការឃោសនារបស់ក្រុមប្រឆាំងមួយចំនួន ដែលបានចោទប្រកាន់ថាមានការរំកិលបង្គោលព្រំដែន ជាពិសេសបង្គោលព្រំដែនលេខ២៧៥ នៅច្រកទ្វារអន្តរជាតិភ្នំដិន ហើយក៏មិនត្រូវជឿដាច់ខាតលើប្រព័ន្ធ Google Map ដែរ ព្រោះប្រព័ន្ធនេះមិនអាចផ្ទៀងផ្ទាត់ឲ្យបានត្រឹមត្រូវ និងយកជាផ្លូវការនោះឡើយ ៕
