ឧបនាយករដ្ឋមន្ត្រី សាយ សំអាល់៖ បញ្ហារសើបខាងនយោបាយរឿងដីធ្លី បានធ្លាក់ចុះច្រើន ព្រោះជម្លោះផ្សេងៗត្រូវបានដោះស្រាយបញ្ចប់
ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានលើកឡើងថា គោលនយោបាយទទួលស្គាល់កម្មសិទ្ធិឯកជនរបស់រាជរដ្ឋាភិបាល ក្នុងការផ្តល់ដី និងចេញបណ្ណកម្មសិទ្ធិជូនប្រជាពលរដ្ឋ ពិតជាមានប្រយោជន៍ណាស់ ដើម្បីទ្រទ្រង់សេដ្ឋកិច្ចគ្រួសារ និងសេដ្ឋកិច្ចជាតិ ហើយបន្ទាប់ពីការងារចុះបញ្ជីដីធ្លីជិតបញ្ចប់ បញ្ហារសើបខាងនយោបាយរឿងដីធ្លីក៏បានធ្លាក់ចុះច្រើន ព្រោះជម្លោះផ្សេងៗត្រូវបានដោះស្រាយបញ្ចប់។
ឯកឧត្តមឧបនាយករដ្ឋមន្រ្តីបញ្ជាក់ដូច្នេះ ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៤ និងទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តកំពត នាព្រឹកថ្ងៃទី១៨ ខែកញ្ញា ឆ្នាំ២០២៤ នៅសាលាខេត្តកំពត។
ឯកឧត្តម ឧបនាយករដ្ឋមន្ត្រីបន្តថា ក្នុងនាមជាថ្នាក់ដឹកនាំ និងជាពលរដ្ឋខ្មែរមួយរូប ឯកឧត្តមពិតជាមានមោទនភាពចំពោះកម្ពុជាក្រោមការដឹកនាំរបស់សម្តេចតេជោ ហ៊ុន សែន ដែលបានដាក់ចេញគោលនយោបាយទទួលស្គាល់កម្មសិទ្ធិឯកជនអំឡុងឆ្នាំ១៩៨៨ និង១៩៨៩ បន្ទាប់ពីប្រទេសឆ្លងផុតពីសង្គ្រាម និងបានផ្តល់ដីកម្មសិទ្ធិជូនប្រជាពលរដ្ឋប្រើប្រាស់ទៅតាមតម្រូវការចាំបាច់។ ក្នុងន័យនេះ សម្តេចតេជោហ៊ុន សែន ប្រៀបដូចជាឪពុកដែលបានផ្តល់ដីកេរឱ្យកូនៗ ដើម្បីកសាងនិងអភិវឌ្ឍន៍ជីវភាពគ្រួសារតទៅអនាគត។
ឯកឧត្តមឧបនាយករដ្ឋមន្ត្រីបានបន្តថា បន្តមកដល់បច្ចុប្បន្ន កម្ពុជាក្រោមការដឹកនាំរបស់សម្តេចធិបតី ហ៊ុន ម៉ាណែត លោកខិតខំជំរុញការងារចុះបញ្ជីដីធ្លី ចេញបណ្ណកម្មសិទ្ធិជូនពលរដ្ឋ ព្រោះការចេញបណ្ណកម្មសិទ្ធិ គឺស្មើនឹងទទួលស្គាល់ និងផ្តល់នូវសុវត្ថិភាពកាន់កាប់អចលនទ្រព្យតាមផ្លូវច្បាប់ និងបង្កើនតម្លៃដី។ មកដល់ពេលនេះ ការចុះវាស់វែងដីធ្លីបន្ថែមសរុបបានជាង ៧លានកន្លះក្បាលដី ។បើតាមការប៉ានស្មាន នៅសល់ប្រហែលជាង១លានក្បាលដីទៀតប៉ុណ្ណោះ នឹងបញ្ចប់ការងារចុះបញ្ជីដីធ្លីទាំងស្រុងទូទាំងប្រទេស។
ឯកឧត្តមឧបនាយករដ្ឋមន្ត្រីគូសរំលេចថាបន្ទាប់ពីការងារចុះបញ្ជីដីធ្លីជិតបញ្ចប់ ភាពរសើបខាងនយោបាយដីធ្លីបានធ្លាក់ចុះគួរឱ្យកត់សម្គាល់។ បច្ចុប្បន្នបញ្ហាសេសសល់ពីមុន បូករួមទាំងបណ្តឹងប្រចាំថ្ងៃ (១០ករណី) ដែលក្រសួងទទួលបានសរុបរង្វង់១ ៥០០ករណីក្នុងមួយឆ្នាំ គឺជាចំនួនមួយតិច ហើយនឹងកាន់តែតិចទៅទៀតនៅឆ្នាំបន្តបន្ទាប់។ តាមរយៈការចុះបញ្ជីដីធ្លីនេះដែរ បញ្ហាពាក់ព័ន្ធនឹងគម្រោងបុរី រឿងដីបឹងទន្លេសាប និងរឿងដីអាជ្ញាធរអប្សរាជាមួយប្រពលរដ្ឋ ត្រូវបានដោះស្រាយបញ្ចប់ស្ទើររួចរាល់។ ខណៈដែលសេវាផ្សេងៗទាក់ទង់នឹងដីធ្លី បានបង្កើតឱកាសការងារ ក្នុងវិស័យសំណង់ និងឧស្សាហកម្មចលនទ្រព្យ ជាដើម ជំរុញដល់កំណើនសេដ្ឋកិច្ចពលរដ្ឋ និងប្រទេសជាតិ។ អនាគតដ៏ខ្លីខាងមុខ សេវាអចលនទ្រព្យដូចជាលក់ផ្តាច់ អំណោយផ្តាច់ និងការបង់ពន្ធជាដើម អាចធ្វើតាមប្រព័ន្ធអេប(App) នៅលើទូរស័ព្ទដៃ ហើយប្រជាពលរដ្ឋមិនបាច់មកស្នើសុំសេវានៅច្រកចេញចូលតែមួយទៀតទេ ៕
