ឯកឧត្តម ឱម យ៉ិនទៀង និងលោកជំទាវ ឡុង វិសាខា អញ្ជើញកាន់បិណ្ឌវេនទី១ នៅវត្តនាគវ័ន

ភ្នំពេញ៖ ឆ្នាំនេះ ពិធីបុណ្យកាន់បិណ្ឌភ្ជុំបិណ្ឌ ប្រព្រឹត្តទៅពីថ្ងៃទី១៨ ខែកញ្ញា ដល់ថ្ងៃទី២ ខែតុលា ឆ្នាំ២០២៤ ដែលជាបុណ្យប្រពៃណីព្រះពុទ្ធសាសនាដ៏មានសារសំខាន់របស់ពុទ្ធសាសនិកជនខ្មែរគ្រប់ៗរូប ចំពេលដែលព្រះរាជាណាចក្រកម្ពុជាកំពុងមានសុខសន្តិភាព ស្ថិរភាពនយោបាយ សន្តិសុខ ដែលជាគ្រឹះសំខាន់នៃសុភមង្គលជាតិ ការអភិវឌ្ឍជាតិ ក្រោមនយោបាយឈ្នះៗរបស់រាជរដ្ឋាភិបាលកម្ពុជា។

នៅថ្ងៃទី១៨ ខែកញ្ញានេះ ឯកឧត្តមកិត្តិនីតិកោសលបណ្ឌិត ឱម យ៉ិនទៀង ទេសរដ្ឋមន្រ្តី ប្រធានអង្គភាពប្រឆាំងអំពើពុករលួយ និងលោកជំទាវ ឡុង វិសាខា ព្រមទាំងក្រុមគ្រួសារ ថ្នាក់ដឹកនាំ មន្រ្តីរាជការ នៃអង្គភាពប្រឆាំងអំពើពុករលួយ អញ្ជើញកាន់បិណ្ឌវេនទី១ នៃពិធីបុណ្យភ្ជុំបិណ្ឌ នៅវត្តនាគវ័ន។

ពិធីបុណ្យកាន់បិណ្ឌថ្ងៃនេះ ឯកឧត្តមកិត្តិនីតិកោសលបណ្ឌិត ឱម យ៉ិនទៀង និងលោកជំទាវ ឡុង វិសាខា បានអញ្ជើញបូជាទៀន ធូប ផ្កាភ្ញី ថ្វាយព្រះពុទ្ធរូប និងនាំយកនូវគ្រឿងឧបភោគ-បរិភោគ ចង្ហាន់បិណ្ឌបាត្រ និងបច្ច័យមួយចំនួនប្រគេនព្រះសង្ឃ និងសម្រាប់ទុកកសាងសមិទ្ធផលផ្សេងៗក្នុងទីអារាម ដើម្បីឧទ្ទិសកុសលជូនវិញ្ញាណក្ខន្ធ នៃអ្នកមានគុណ មាន មាតាបិតា ជីដូនជីតា គ្រូឧបជ្ឈាយាចារ្យ បុព្វបុរសជាតិ និងបងប្អូនជនរួមជាតិ ដែលបានលាចាកលោកនេះទៅកាន់លោកខាងមុខ។

សូមបញ្ជាក់ថា ពិធីបុណ្យភ្ជុំបិណ្ឌ ក៏ជាឱកាសដ៏ល្អសម្រាប់ការជួបជុំឳពុកម្តាយ បងប្អូនញាតិមិត្តសាច់សារលោហិតដែលរស់នៅទីផ្សេងៗគ្នា អាចស្វែងយល់បានពីសុខទុក្ខ និងដំណើរប្រព្រឹត្តទៅក្នុងជីវភាពរស់នៅប្រចាំថ្ងៃរវាងគ្នានឹងគ្នាទៅវិញទៅមក ព្រមទាំងអាចបង្កើនបាននូវសាមគ្គីភាពដ៏ទូលំទូលាយផង ៕