សាខាកាកបាទក្រហមកម្ពុជាខេត្តតាកែវ នាំយកអំណោយផ្ដល់ជូនគ្រួសាររងគ្រោះដោយសារអគ្គីភ័យនៅស្រុកសំរោង
ភ្នំពេញ៖ ដោយមានការអនុញ្ញាតពី ឯកឧត្តម វ៉ី សំណាង ប្រធានគណៈកម្មាធិការសាខាកាកបាទក្រហមកម្ពុជាខេត្តតាកែវ នៅព្រឹកថ្ងៃព្រហស្បតិ៍ ទី១៩ ខែកញ្ញា ឆ្នាំ២០២៤ លោក យឹម ច័ន្ទថន នាយកប្រតិបត្តិសាខា មន្ត្រីសាខា លោកស្រី ប៊ុន គឹមហុង ប្រធានអនុសាខាកាកបាទក្រហមស្រុកសំរោង និងមន្រ្តីកាកបាទក្រហមឃុំបឹងត្រាញ់ខាងត្បូង បានចុះសួរសុខទុក្ខ និងនាំយកអំណោយមនុស្សធម៌របស់សាខា មកប្រគល់ជូនគ្រួសារប្រជាពលរដ្ឋដែលបានរងគ្រោះដោយសារភ្លើងឆេះផ្ទះមួយខ្នង អស់ទាំងស្រុង កាលពីពេលកន្លងទៅ នៅភូមិស្រីជ័យ ឃុំបឹងត្រាញ់ខាងត្បូង ស្រុកសំរោង ខេត្តតាកែវ។
ក្នុងឱកាសនោះលោកនាយក ក៏បានចូលរួមសោកស្តាយជាមួយគ្រួសារប្រជាពលរដ្ឋដែលបានរងគ្រោះនាពេលនេះ និងបានពាំនាំមតិផ្ដាំផ្ញើរសាកសួរសុខទុក្ខពីសំណាក់ ឯកឧត្ដមប្រធាន ជាពិសេសពីសំណាក់សម្ដេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្ដេចតែងតែយកចិត្តទុកដាក់គិតគូរអំពីសុខទុក្ខ ដល់ប្រជាពលរដ្ឋដែលរងគ្រោះ និងងាយរងគ្រោះ នៅគ្រប់ទីកន្លែងដោយមិនប្រកាន់និន្នាការ ពូជសាសន៍ សាសនា អ្វីឡើយ ដូចពាក្យស្លោក ទីណាមានការលំបាកទីនោះមានកាកបាទក្រហមកម្ពុជា។
អំណោយដែលបានផ្ដល់ជូនគ្រួសាររងគ្រោះ មានដូចជា៖ អង្ករ ២៥ គីឡូក្រាម តង់ធំ១ កន្ទេល១ មុង១ ភួយ១ សារុង១ ក្រម៉ា១ សម្ភារៈផ្ទះបាយ១ឈុត នំធុងធំ១ ទឹកត្រី ៣ដប ទឹកស៊ីអ៉ីវ ៣ដប មីយើង ១កេស ត្រីខ ១យួរ និងថវិកា ៣០ម៉ឺនរៀល៕
