ឱកាសក្លាយជាមន្រ្តីកសិកម្មឃុំ មន្ត្រីក្រសួងសេដ្ឋកិច្ច សិស្សមន្ត្រីចូលសិក្សានៅសាលាភូមិន្ទរដ្ឋបាល និងមន្រ្តីបច្ចេកទេសសុខាភិបាល កំពុងមកដល់ជាបន្តបន្ទាប់
ភ្នំពេញ៖ នាថ្ងៃទី១៨ ខែកញ្ញា ឆ្នាំ២០២៤ ក្រសួងមុខងារសាធារណៈ បានរៀបចំកិច្ចប្រជុំពិភាក្សាលើការរៀបចំការប្រឡងប្រជែងជ្រើសរើសមន្រ្តីរាជការជាច្រើនក្រសួង ស្ថាប័នបន្ថែមទៀតក្រោយបញ្ចប់ការប្រឡងប្រជែងមន្រ្តីរាជការបានរួចរាល់ជាងពីរពាន់កន្លែងក្រោមគោលការណ៍គុណាធិបតេយ្យ តម្លាភាព យុតិ្តធម៌ បរិយាបន្ន និងប្រសិទ្ធភាព។
កិច្ចប្រជុំដែលដឹកនាំដោយ ឯកឧត្ដម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈបានពិភាក្សាទៅលើចំណុចសំខាន់ៗដែលសុទ្ធតែជាគម្រោងជ្រើសរើសមន្ត្រីរាជការស៊ីវិលជូនក្រសួង ស្ថាប័នមួយចំនួនរួមមាន៖ (១)មន្ត្រីកសិកម្មឃុំ (២)មន្ត្រីរតនាគារជាតិ (៣)មន្ត្រីពន្ធដារ (៤)មន្ត្រីជាន់ខ្ពស់ និងមន្ត្រីក្រមការសម្រាប់សិក្សានៅសាលាភូមិន្ទរដ្ឋបាល និង(៥)មន្ត្រីបច្ចេកទេសសុខាភិបាលផ្អែកលើកិច្ចព្រមព្រៀងការងារ។
អង្គប្រជុំកាលពីម្សិលមិញ សម្រេចបាននូវលទ្ធផលជាផ្លែផ្កាគួរជាទីមោទនៈ។ ក្នុងនោះកិច្ចប្រជុំបានពិភាក្សាជាអាទិភាពលើទិដ្ឋភាពបច្ចេកទេសជាច្រើនក្នុងការរៀបចំការប្រឡងប្រជែងនីមួយៗ រួមជាមួយការសិក្សាលើពេលវេលាសម្រាប់រៀបចំការប្រឡងប្រជែងធ្វើយ៉ាងណាឱ្យការប្រឡងនីមួយៗប្រព្រឹត្តទៅស្របតាមគោលការណ៍ដែលបានកំណត់ដោយរាជរដ្ឋាភិបាល និងស្របតាមនិយាមនិតីវិធីប្រតិបត្តិនៃការជ្រើសរើសមន្រ្តីរាជការស៊ីវិល ដែលបានដាក់ចេញ។
