អេហ្ស៊ីប ព្រមានពីគ្រោះថ្នាក់ ជុំវិញពីជម្លោះតំបន់ហ្គាហ្សា និងការរំលោភបំពាននៅតំបន់ West Bank

បរទេស៖ ប្រធានាធិបតីអេហ្ស៊ីប លោក Abdel-Fattah al-Sisi និងស្តេចហ្ស៊កដានី Abdullah II កាលពីថ្ងៃអង្គារបានព្រមានពីគ្រោះថ្នាក់នៃសង្គ្រាមអ៊ីស្រាអែលដែលកំពុងបន្តនៅតំបន់ហ្គាហ្សាស្ទ្រីប និងការរំលោភកាន់តែខ្លាំងឡើងនៅតំបន់ West Bank។

ប្រធានាធិបតីអេហ្ស៊ីបបានឲ្យដឹងនៅក្នុងសេចក្តីថ្លែងការណ៍មួយថា ក្នុងអំឡុងពេលសន្ទនាតាមទូរស័ព្ទ មេដឹកនាំទាំងពីរបានសង្កត់ធ្ងន់លើការវិវឌ្ឍនាពេលថ្មីៗនេះអាចបង្កើនជម្លោះ ដែលជះឥទ្ធិពលអវិជ្ជមានដល់ប្រជាជនទាំងអស់នៃតំបន់ ក៏ដូចជាសន្តិភាព និងសន្តិសុខអន្តរជាតិ។

ពួកគេបានរំលឹកឡើងវិញនូវការបដិសេធរបស់ពួកគេចំពោះការប៉ុនប៉ងទាំងអស់ដើម្បីធ្វើឱ្យខូចដល់បុព្វហេតុប៉ាឡេស្ទីន ឬបង្វែរទឹកដីប៉ាឡេស្ទីនទៅជាតំបន់ដែលមិនអាចរស់នៅបាន ដើម្បីបង្ខំឱ្យមានការផ្លាស់ទីលំនៅរបស់ប៉ាឡេស្ទីន។

មេដឹកនាំទាំងពីរបានសង្កត់ធ្ងន់លើតម្រូវការបន្ទាន់ដើម្បីបញ្ចប់សង្រ្គាមជាបន្ទាន់ និងជួយសង្គ្រោះតំបន់ហ្គាហ្សាពីមហន្តរាយមនុស្សធម៌ដ៏បំផ្លិចបំផ្លាញ។

អ៊ីស្រាអែលបានបើកការវាយលុកទ្រង់ទ្រាយធំប្រឆាំងនឹងក្រុមហាម៉ាសនៅតំបន់ហ្គាហ្សាស្ទ្រីប ដើម្បីសងសឹកប្រឆាំងនឹងការវាយលុករបស់ក្រុមហាម៉ាស់ឆ្លងកាត់ព្រំដែនភាគខាងត្បូងអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ក្នុងអំឡុងពេលដែលមនុស្សប្រហែល ១,២០០នាក់ត្រូវបានសម្លាប់ និងប្រហែល ២៥០នាក់ត្រូវបានចាប់ពង្រត់។

អាជ្ញាធរសុខាភិបាលដែលមានមូលដ្ឋាននៅហ្គាហ្សាបានឲ្យដឹងនៅក្នុងសេចក្តីថ្លែងការណ៍មួយកាលពីថ្ងៃអង្គារថា ចំនួនអ្នកស្លាប់របស់ប៉ាឡេស្ទីនពីការវាយប្រហាររបស់អ៊ីស្រាអែលដែលកំពុងបន្តនៅក្នុងតំបន់ហ្គាហ្សាស្ទ្រីប បានកើនឡើងដល់ ៤១,២៥២នាក់ហើយ។