រដ្ឋមន្ត្រីក្រសួងអធិការកិច្ច អញ្ជើញជាអធិបតីក្នុងពិធីចុះកិច្ចព្រមព្រៀងសះជា និងបញ្ចប់វិវាទដីនិងផ្ទះមានវិវាទមានទីតាំងស្ថិតនៅផ្លូវលេខ២៥៧ ភូមិ១០ សង្កាត់ទឹកល្អក់ទី១ ខណ្ឌទួលគោក

ភ្នំពេញ៖ នាព្រឹកថ្ងៃព្រហស្បតិ៍ ២រោច ខែភទ្របទ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៩ ខែកញ្ញា ឆ្នាំ២០២៤ នៅទីស្តីការក្រសួងអធិការកិច្ច ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច បានអញ្ជើញជាអធិបតីក្នុងពិធីចុះកិច្ចព្រមព្រៀងសះជា និងបញ្ចប់វិវាទរវាងដើមបណ្តឹង លោកស្រី កៀង ផល្លាកូល និងលោក កៀង វីរៈកូល និងចុងបណ្តឹង លោកស្រី អ៊ុក សុផាន់ណារី ពាក់ព័ន្ធនឹងដីនិងផ្ទះ ដែលមានទីតាំងស្ថិតនៅផ្លូវលេខ២៥៧ ភូមិ១០ សង្កាត់ទឹកល្អក់ទី១ ខណ្ឌទួលគោក រាជធានីភ្នំពេញ។

ពិធីនេះមានការអញ្ជើញចូលរួមពីឯកឧត្តមរដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់របស់ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់, តំណាងរដ្ឋបាលរាជធានីភ្នំពេញ, តំណាងរដ្ឋបាលខណ្ឌទួលគោក, តំណាងការិយាល័យភូមិបាល ខណ្ឌទួលគោក, អាជ្ញាធរមូលដ្ឋាន, ភាគីដើមបណ្ដឹង, ភាគីចុងបណ្ដឹង, មេធាវីតំណាងដោយអាណត្តិភាគីចុងបណ្ដឹង, ព្រមទាំង ឯកឧត្តម លោកជំទាវ ថ្នាក់ដឹកនាំក្រសួងអធិការកិច្ច និងគណៈប្រតិភូអង្កេតស្រាវជ្រាវ។

រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយចក្ខុវិស័យវែងឆ្ងាយ និងប្រាកដនិយមរបស់ សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រគល់បេសកកម្មឱ្យក្រសួងអធិការកិច្ចដឹកនាំ និងគ្រប់គ្រងវិស័យអធិការកិច្ច ដែលក្នុងនោះការងារទទួលពាក្យបណ្ដឹង អង្កេតស្រាវជ្រាវ និងដោះស្រាយបណ្តឹង ជាការងារអាទិភាពមួយដែលក្រសួងបាននឹងកំពុងបំពេញការងារយ៉ាងសកម្ម។ ជាក់ស្តែង ថ្ងៃនេះក្រោមការដឹកនាំរបស់ឯកឧត្តមរដ្ឋមន្ត្រីក្រសួងអធិការកិច្ច បានដោះស្រាយបណ្តឹង និងបានបិទបញ្ចប់វិវាទជាស្ថាពររវាងគូភាគីតាមបែបបទនីតិវិធីច្បាប់ជាធរមាន ប្រកបដោយតម្លាភាព យុត្តិធម៌ និងឥតលម្អៀង ដោយឈរលើយុទ្ធសាស្ត្រឈ្នះ-ឈ្នះ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី។

សូមបញ្ជាក់ផងដែរថានេះជាការដោះស្រាយបញ្ចប់វិវាទដោយសះជាលើកទី៥១ ក្រោមការសម្របសម្រួលរបស់ក្រសួងអធិការកិច្ច និងការចូលរួមសហការពីតំណាងក្រសួង ស្ថាប័នពាក់ព័ន្ធ។

ជាលទ្ធផលទទួលបាន គូភាគីបានឯកភាព និងព្រមព្រៀងដូចខាងក្រោម៖
១)- គូភាគីបានឯកភាពបញ្ចប់វិវាទទាំងស្រុង និងចុះកិច្ចព្រមព្រៀងសះជា និងបញ្ចប់វិវាទ
២)- គូភាគីបានព្រមព្រៀងទទួលយកចំណែកដី តាមខ្លឹមសារនៃកិច្ចព្រមព្រៀងសះជា និងបញ្ចប់វិវាទ
៣)- ភាគីទាំងពីរ បានឯកភាពដកនូវរាល់ពាក្យបណ្ដឹងដែលធ្លាប់បានដាក់ទៅគ្រប់ស្ថាប័នទាំងអស់នាពេលកន្លងមក។

ជាទីបញ្ចប់ ឯកឧត្តមរដ្ឋមន្ត្រី បានថ្លែងនូវអំណរគុណយ៉ាងជ្រាលជ្រៅ កោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងរបស់គណៈប្រតិភូក្រសួងអធិការកិច្ច និងការផ្តល់កិច្ចសហការបានយ៉ាងល្អប្រសើរពី សំណាក់តំណាងក្រសួងរៀបចំដែនដី នគរូបនីយកម្ម និងសំណង់, រដ្ឋបាលរាជធានីភ្នំពេញ, មន្ទីរជំនាញពាក់ព័ន្ធ, រដ្ឋបាលខណ្ឌទួលគោក, អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងឆន្ទៈចូលរួមបញ្ចប់វិវាទរបស់គូភាគីផងដែរ ៕