ឯកឧត្តមរដ្ឋមន្ត្រី ហួត ហាក់ អញ្ជើញជាអធិបតីក្នុងពិធីចុះកិច្ចព្រមព្រៀងសះជា និងបញ្ចប់វិវាទ ជីវិវាទមានទីតាំងដីស្ថិតនៅព្រែកតានប់ ឃុំកំពង់ស្វាយ ស្រុកកៀនស្វាយ
ភ្នំពេញ៖ នាសៀលថ្ងៃព្រហស្បតិ៍ ២រោច ខែភទ្របទ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១៩ ខែកញ្ញា ឆ្នាំ២០២៤ នៅទីស្តីការក្រសួងអធិការកិច្ច ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច បានអញ្ជើញជាអធិបតីក្នុងពិធី ចុះកិច្ចព្រមព្រៀងសះជា និងបញ្ចប់វិវាទរវាង ភាគីដើមបណ្តឹង លោក សួន គឹមសុង និងភាគីចុងបណ្តឹង លោក អៀង ណារិន ពាក់ព័ន្ធនឹងដីដែលមានទីតាំងស្ថិតនៅព្រែកតានប់ ឃុំកំពង់ស្វាយ ស្រុកកៀនស្វាយ ខេត្តកណ្តាល។
ពិធីនេះ មានការអញ្ជើញចូលរួមពីលោក តាំង ម៉េងលាន អភិបាលរងខេត្តកណ្តាល តំណាងឯកឧត្តមអភិបាលនៃគណៈអភិបាលខេត្តកណ្តាល, តំណាងក្រសួងរៀបចំដែនដី នគរូបនីយកម្ម និងសំណង់, ប្រធានមន្ទីរ រៀបចំដែនដី នគរូបនីយកម្ម និងសំណង់ខេត្តកណ្តាល, ប្រធានមន្ទីរទំនាក់ទំនងជាមួយរដ្ឋសភា ព្រឹទ្ធសភា និង អធិការកិច្ចខេត្តកណ្តាល, អភិបាលស្រុកកៀនស្វាយ, ប្រធាការិយាល័យភូមិបាលស្រុកកៀនស្វាយ, អាជ្ញាធរ មូលដ្ឋានគ្រប់ជាន់ថ្នាក់, ភាគីដើមបណ្ដឹង, ភាគីចុងបណ្តឹង ព្រមទាំងឯកឧត្តម លោកជំទាវ ថ្នាក់ដឹកនាំក្រសួង អធិការកិច្ច និងគណៈប្រតិភូអង្កេតស្រាវជ្រាវ។
រាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយចក្ខុវិស័យវែងឆ្ងាយ និងប្រាកដនិយមរបស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រគល់បេសកកម្មឱ្យក្រសួងអធិការកិច្ចដឹកនាំ និងគ្រប់គ្រងវិស័យអធិការកិច្ច ដែលក្នុងនោះការងារទទួលពាក្យបណ្តឹង អង្កេតស្រាវជ្រាវ និងដោះស្រាយបណ្ដឹង ជាការងារអាទិភាពមួយដែលក្រសួងបាននឹងកំពុងបំពេញការងារយ៉ាងសកម្ម។ ជាក់ស្តែង ថ្ងៃនេះក្រោមការដឹកនាំរបស់ ឯកឧត្តមរដ្ឋមន្ត្រីក្រសួងអធិការកិច្ច បានដោះស្រាយបណ្តឹង និងបានបិទបញ្ចប់វិវាទជាស្ថាពររវាងគូភាគីតាមបែបបទនីតិវិធីច្បាប់ជាធរមាន ប្រកបដោយតម្លាភាព យុត្តិធម៌ និងឥតលម្អៀង ដោយឈរលើយុទ្ធសាស្ត្រឈ្នះ-ឈ្នះ ប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាអតីតនាយករដ្ឋមន្ត្រី។
សូមបញ្ជាក់ផងដែរថា នេះជាការដោះស្រាយបញ្ចប់វិវាទដោយសះជាលើកទី៥២ ក្រោមការសម្របសម្រួលរបស់ក្រសួងអធិការកិច្ច និងការចូលរួមសហការពីតំណាងក្រសួង ស្ថាប័នពាក់ព័ន្ធ។
ជាលទ្ធផលទទួលបាន គូភាគីបានឯកភាព និងព្រមព្រៀងដូចខាងក្រោម៖
១)- គូភាគីបានឯកភាពបញ្ចប់វិវាទទាំងស្រុង និងចុះកិច្ចព្រមព្រៀងសះជា និងបញ្ចប់វិវាទ ដោយបានសម្បទានឱ្យគ្នាទៅវិញទៅមក។
២)- គូភាគីបានព្រមព្រៀងទទួលយកចំណែកដី និងថវិកា ស្របតាមខ្លឹមសារនៃកិច្ចព្រមព្រៀងសះជា និងបញ្ចប់វិវាទ។
៣)- គូភាគីបានឯកភាពដកនូវរាល់ពាក្យបណ្ដឹងដែលធ្លាប់បានដាក់ទៅគ្រប់ស្ថាប័នទាំងអស់នាពេលកន្លងមក។
៤)- គូភាគីបានឯកភាពក្នុងការបញ្ឈប់ និងបញ្ចប់នូវគ្រប់រូបភាពទាំងអស់ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ភាគីម្ខាងៗ តាមគ្រប់មធ្យោបាយ មានជាអាទិ៍ សារព័ត៌មាន និងបណ្តាញសង្គមនានា។
ជាទីបញ្ចប់ ឯកឧត្តមរដ្ឋមន្ត្រី បានថ្លែងនូវអំណរគុណយ៉ាងជ្រាលជ្រៅ កោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់គណៈប្រតិភូក្រសួងអធិការកិច្ច និងការផ្តល់កិច្ចសហការបានយ៉ាងល្អប្រសើរ ពីសំណាក់ក្រសួងរៀបចំដែនដី នគរូបនីយកម្ម និងសំណង់, រដ្ឋបាលខេត្តកណ្តាល, មន្ទីរជំនាញពាក់ព័ន្ធ, រដ្ឋបាលស្រុកកៀនស្វាយ, អាជ្ញាធរមូលដ្ឋានគ្រប់លំដាប់ថ្នាក់ ព្រមទាំងឆន្ទៈចូលរួមបញ្ចប់វិវាទរបស់គូភាគីផងដែរ ៕
