ប្រធាន EC ទៅដល់នៅទីក្រុង Kiev សារជាថ្មី ដើម្បីពិភាក្សាអំពីការគាំទ្រអ៊ុយក្រែន

បរទេស៖ ប្រធានគណៈកម្មការអឺរ៉ុប លោកស្រី Ursula von der Leyen កំពុងបំពេញទស្សនកិច្ចនៅរដ្ឋធានី Kiev របស់អ៊ុយក្រែននៅថ្ងៃទី២០ ខែកញ្ញា ដើម្បីពិភាក្សាអំពីការគាំទ្ររបស់អឺរ៉ុប ការរៀបចំសម្រាប់រដូវរងា ការការពារ និងវឌ្ឍនភាពទាក់ទងនឹងប្រាក់កម្ចីរបស់ក្រុមប្រទេសឧស្សាហកម្មបំផុតទាំង៧ (G7)។

លោកស្រី von der Leyen បានសរសេរថា ដំណើរទស្សនកិច្ចលើកទី៨ របស់លោកស្រីទៅកាន់ទីក្រុងគៀវកើតឡើងនៅពេលដែលរដូវកាលកំដៅចាប់ផ្តើម ហើយប្រទេសរុស្ស៊ីនៅតែបន្តកំណត់គោលដៅលើហេដ្ឋារចនាសម្ព័ន្ធថាមពលរបស់អ៊ុយក្រែន។

មួយថ្ងៃមុននេះ លោកស្រីបានឲ្យដឹងថា ទ្រព្យសម្បត្តិរបស់រុស្ស៊ីដែលជាប់គាំងចំនួន ១៦០លានអឺរ៉ូ នឹងត្រូវបែងចែកដើម្បីបំពេញតម្រូវការមនុស្សធម៌បន្ទាន់របស់អ៊ុយក្រែនក្នុងរដូវរងានេះ។

ប្រទេសរុស្ស៊ីបានបំផ្លាញហេដ្ឋារចនាសម្ព័ន្ធថាមពលរបស់អ៊ុយក្រែនប្រហែល ៩ជីហ្គាវ៉ាត់ ដែលលោកស្រី von der Leyen បានបញ្ជាក់ថា អំណាចស្មើនឹងរដ្ឋបាល់ទិកបី។

ប្រធាន EC ក៏បានឲ្យដឹងផងដែរថា EU មានបំណងស្តារសមត្ថភាពផលិតថាមពល ២.៥ជីហ្គាវ៉ាត់ ដែលយោងទៅតាមលោកស្រី ក៏នឹងបង្កើនការនាំចេញដើម្បីផ្គត់ផ្គង់ដល់អ៊ុយក្រែននូវថាមពលអគ្គិសនី ២ជីហ្គាវ៉ាត់។

ក្នុង​ដំណើរ​ទស្សនកិច្ច​នៅ​អ៊ុយក្រែន មេដឹកនាំ​អឺរ៉ុប​នឹង​ជួប​ជាមួយ​ប្រធានាធិបតី​អ៊ុយក្រែន លោក Volodymyr Zelensky និង​មន្ត្រី​ដទៃ​ទៀត។

ដំណើរទស្សនកិច្ចលើកទី៨ របស់លោកស្រី von der Leyen ទៅកាន់ប្រទេសអ៊ុយក្រែនកំពុងធ្វើឡើង ខណៈដែលកងកម្លាំងអ៊ុយក្រែនបាននិងកំពុងធ្វើការវាយលុកនៅក្នុងតំបន់ Kursk របស់រុស្ស៊ីចាប់តាំងពីខែសីហា ហើយកងកម្លាំងរុស្ស៊ីកំពុងបន្តការវាយលុករបស់ពួកគេនៅភាគខាងកើតអ៊ុយក្រែន។