ឯកឧត្តម អ៊ុក រ៉ាប៊ុន អញ្ជើញសំណេះសំណាល សួរសុខទុក្ខអតីតយុទ្ធជនចំនួន ១១០គ្រួសារ ដែលកំពុងរស់នៅតំបន់ដីសម្បទានសង្គមកិច្ច ស្ថិតក្នុងភូមិអូរកាខុប ឃុំក្រាំងល្វា ស្រុកសាមគ្គីមានជ័យ
ភ្នំពេញ៖ នៅរសៀលថ្ងៃសុក្រ ទី២០ ខែកញ្ញា ឆ្នាំ២០២៤ ឯកឧត្តម បណ្ឌិតសភាចារ្យ អ៊ុក រ៉ាប៊ុន ទេសរដ្ឋមន្ត្រី ទទួលបន្ទុកបេសកកម្ម ពិសេស និងជាប្រធានក្រុមការងារ រាជរដ្ឋាភិបាល ចុះមូលដ្ឋានខេត្តកំពង់ឆ្នាំង បានអញ្ជើញជាអធិបតីក្នុងពិធីសំណេះសំណាល សួរសុខទុក្ខបងប្អូនអតីតយុទ្ធជនចំនួន ១១០គ្រួសារ ដែលកំពុងរស់នៅតំបន់ដីសម្បទានសង្គមកិច្ច ស្ថិតក្នុងភូមិអូរកាខុប ឃុំក្រាំងល្វា ស្រុកសាមគ្គីមានជ័យ ខេត្តកំពង់ឆ្នាំង ។
ពិធីមានការអញ្ជើញចូលរួមពី ឯកឧត្តម ស៉ីវ រុន ប្រធានក្រុមប្រឹក្សាខេត្ត ឯកឧត្តម ស៊ុន សុវណ្ណារិទ្ធិ អភិបាល និងជាប្រធានកិត្តិយសសមាគមអតីតយុទ្ធជនកម្ពុជាខេត្តកំពង់ឆ្នាំង ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការ តំបន់ប្រតិបត្តិការសឹករងកំពង់ឆ្នាំង និងជាប្រធានសមាគមអតីតយុទ្ធជនកម្ពុជាខេត្ត ឯកឧត្តម អស់លោក លោកស្រី ប្រធានមន្ទីរ អង្គភាពជុំវិញខេត្ត លោកអភិបាល ក្រុង ស្រុក និង កងកម្លាំងទាំងបីប្រភេទ ជាច្រើនរូប។
ឯកឧត្តម ឧត្តមសេនីយ៍ត្រី អ៊ុំ សុភា ប្រធានសមាគមអតីតយុទ្ធជនកម្ពុជាខេត្តកំពង់ឆ្នាំង បានលើកឡើងនូវ កាយវិការដ៏ថ្លៃថ្លារបស់ប្រមុខដឹកនាំរាជរដ្ឋាភិបាល សម្តេចមហាបវរធិបតី ហ៊ុន ម៉ាណែត និង លោកជំទាវបណ្ឌិត បានសបញ្ជាក់ឲ្យឃើញនូវគោលជំហរ និង ការយកចិត្តទុកដាក់ខ្ពស់ ចំពោះអតីតយុទ្ធជន គ្រួសារកងទ័ព បើទោះបីជាកាលៈទេសៈដែលប្រទេសជាតិមានសុខសន្តិភាពពេញលេញក្តី ក៏មិនអាចបំភ្លេចបាននូវគុណបំណាច់ដ៏ធំធេង របស់បងប្អូនអតីតយុទ្ធជន ដែលបានលះបង់សាច់ស្រស់ឈាមស្រស់ និង អាយុជីវិត ដើម្បីការពារបូរណភាពទឹកដី ខ្លះធ្លាក់ឈឺ ខ្លះធ្លាក់ខ្លួនពិការ ខ្លះទៀតបានបាត់បង់ជីវិតរហូតប្រទេសជាតិទទួលបាននូវសេចក្តីសុខសាន្តត្រានមកទល់សព្វថ្ងៃនេះ ។
ក្នុងឱកាសជួបសំណេះសំណាលជាមួយអតីតយុទ្ធជន នាពេលនេះ ឯកឧត្តម បណ្ឌិតសភាចារ្យ អ៊ុក រ៉ាប៊ុន បានកោតសរសើរចំពោះ ឯកឧត្តម ឧត្តមសេនីយ៍ត្រី អ៊ុំ សុភា មេបញ្ជាការតំបន់ប្រតិបត្តិការសឹករងកំពង់ឆ្នាំង ដែលជាប្រធានសមាគមអតីតយុទ្ធជនកម្ពុជាខេត្ត បានធ្វើសកម្មភាពមនុស្សធម៌គ្រប់ទីកន្លែងនៅក្នុងខេត្តកំពង់ឆ្នាំង បានទាន់ពេលវេលា ចុះជួយដល់បងប្អូនប្រជាពលរដ្ឋ អតីតយុទ្ធជន គ្រួសារយុទ្ធជន ជនពិការ ជនចាស់ជរាគ្មានទីពឹង ជាដើម។
ឯកឧុត្តមបានបន្តថា តម្លៃនៃសុខសន្តិភាព ដែលកើតមានឡើងដោយកងយោធពលខេមរភូមិន្ទ ក្រោមការដឹកនាំដ៍ឈ្លាសវៃ និង ប៉ិនប្រសព្វ របស់ប្រមុខរាជរដ្ឋាភិបាល អាចឲ្យយើងធ្វើកិច្ចការងារមនុស្សធម៌បានជាច្រើនដោយមិនត្រឹមតែកងកម្លាំងយោធពលខេមរភូមិន្ទទេ ក្នុងនោះអាចធ្វើកិច្ចការងារមនុស្សធម៌ជាច្រើនជូនដល់ប្រជាពលរដ្ឋដោយមិនប្រកាន់និន្នាការនយោបាយ ទាំងអស់នេះជាកត្តាសុខសន្តិភាពបានធ្វើឲ្យប្រទេសជាតិជាប្រទេសក្រីក្រ ប្រែក្លាយមកជាប្រទេសមួយដែលមានចំណូលជាមធ្យម និងមានការអភិវឌ្ឍនយ៉ាងឆាប់រហ័ស លើគ្រប់វិស័យផងដែរ ។
នៅក្នុងពិធីឯកឧត្តម ឧត្តមសេនីយ៍ត្រី អ៊ុំ សុភា បានរៀបចំអំណោយដ៏ថ្លៃថ្លារបស់សម្តេចមហាបវរធិបតី និង លោកជំទាវបណ្ឌិត ដោយមានការចូលរួមសហការឧបត្ថម្ភពី ឯកឧត្តម អភិបាលខេត្ត មន្ទីរអង្គភាពជុំវិញខេត្ត រដ្ឋបាល ក្រុង/ស្រុក ទាំង០៨ ក្នុងនោះមាន អង្ករ ២,៧៥០គីឡូក្រាម មី១១០ ត្រីខ១១០យួរ ទឹកត្រី១១០យួរ ទឹកស៊ីអ៉ីវ១១០យួរ ថវិកា១១លានរៀល សម្រាប់ឧបត្ថម្ភដល់បងប្អូនអតីតយុទ្ធជនទាំង១១០គ្រួសារ ក្នុង០១គ្រួសារ ទទួលបាននូវអង្ករ; មី; ទឹកត្រី; ទឹកស៊ីអ៉ីវ; ត្រីខ; រួមនឹងថវិកាចំនួន១០ម៉ឺនរៀល៕
