អតីតអ្នកគាំទ្របក្សប្រឆាំង ១៤៦នាក់ ស្ម័គ្រចិត្តរួមរស់ជាមួយគណបក្សប្រជាជនកម្ពុជា ស្រុកឱរ៉ាល់

ភ្នំពេញ៖ នាព្រឹកថ្ងៃទី២១ ខែកញ្ញា ឆ្នាំ២០២៤ ឯកឧត្តម ប៊ិន ត្រឈៃ សមាជិកគណៈកម្មាធិការកណ្តាល និងជាអនុប្រធានក្រុមការងារចុះមូលដ្ឋានខេត្តកំពង់ស្ពឺ បានអញ្ជើញជាអធិបតីភាពក្នុងពិធីប្រកាសបញ្ចូលសមាជិកគណបក្សប្រជាជនកម្ពុជាចំនួន ១៤៦នាក់ (ស្ត្រី៦២នាក់) នៅទីស្នាក់ការគណបក្សប្រជាជនកម្ពុជា ស្រុកឱរ៉ាល់។

មានមតិសំណេះសំណាល ឯកឧត្តមប្រធាន បានថ្លែងនូវការអបអរសាទរ និងស្វាគមន៍យ៉ាងកក់ក្តៅ ចំពោះការចូលរួមដោយស្ម័គ្រចិត្តរបស់បងប្អូនទាំង១៤៦រូប ក្នុងនោះមានស្ត្រី៦២រូប ដែលបានស្ម័គ្រចិត្តចូលរួមជីវភាពនយោបាយជាមួយគណបក្សប្រជាជនកម្ពុជា។

ឯកឧត្តមប្រធាន បានចែករំលែកនូវទស្សនៈនយោបាយរបស់គណបក្សប្រជាជនកម្ពុជា ជូនចំពោះបងប្អូនជាសមាជិកថ្មី ព្រមទាំងសមិទ្ធផល និងការអភិវឌ្ឍនានារបស់កម្ពុជា ក្រោមការដឹកនាំរបស់គណបក្សប្រជាជនកម្ពុជា ដែលមាន សម្តេចអគ្គមហាសេនាបតីតេជោ ហ៊ុន សែន គឺជាស្នូលដឹកនាំ ជាសសរទ្រូងដ៏រឹងមាំរបស់គណបក្សប្រជាជនកម្ពុជា និងជាអគ្គមគ្គទេសក៍ដ៏ឆ្នើមនៃប្រជាជនកម្ពុជា។

ក្នុងឱកាសនេះ ឯកឧត្តមប្រធាន បានគូសរំលឹកនិងចែករំលែកអំពីលទ្ធផលដ៏ត្រចះត្រចង់ ដែលគណបក្សប្រជាជនកម្ពុជាសម្រេចបាន នាការបោះឆ្នោតក្រុមប្រឹក្សាឃុំ សង្កាត់ អាណត្តិទី៥ និងការបោះឆ្នោតជ្រើសតាំងតំណាងរាស្ត្រ នីតិកាលទី៧ កន្លងទៅ ដែលគណបក្សប្រជាជនកម្ពុជាទទួលបានជ័យជម្នះយ៉ាងច្រើនលើសលុប ដែលនេះជាការសបញ្ជាក់ឱ្យឃើញពីជំនឿជឿជាក់ និងឆន្ទៈគាំទ្រយ៉ាងមុតមាំរបស់ប្រជាជនកម្ពុជា ចំពោះការដឹកនាំរបស់គណបក្សប្រជាជនកម្ពុជា។

ជាមួយគ្នានេះ ឯកឧត្តមប្រធាន បានមានប្រសាសន៍ថា លទ្ធផលល្អដែលសម្រេចបាននេះ កើតចេញពីកម្លាំងសាមគ្គីរបស់ក្រុមការងារគ្រប់លំដាប់របស់គណបក្សប្រជាជនកម្ពុជា ក៏ដូចជាក្រុមការងារគណបក្សប្រជាជនកម្ពុជាចុះមូលដ្ឋានស្រុកឱរ៉ាល់ទាំងអស់ ក្នុងនោះមានទាំងសមាជិកចាស់ និងសមាជិកថ្មី ដែលបានបង្កលក្ខណៈឱ្យគណបក្សប្រជាជនកម្ពុជា បន្តដឹកនាំប្រទេសជាតិ ឆ្ពោះទៅកាន់ការរីកចម្រើនជាលំដាប់ ក្រោមដំបូលនៃសន្តិភាព។

ឯកឧត្តមប្រធាន មានទស្សនៈថា កម្មវិធីនយោបាយរបស់គណបក្សប្រជាជនកម្ពុជា ដែលមាន សម្តេចអគ្គមហាសេនាបតីតេជោ ជាប្រធាន បាននាំឱ្យយើងឈរជើងយ៉ាងរឹងមាំ ក្នុងដំណើរការបោះឆ្នោត និងលទ្ធិប្រជាធិបតេយ្យនៅកម្ពុជា។

បន្ថែមពីនេះ ឯកឧត្តមប្រធាន បានគូសបន្ថែមអំពីគោលការណ៍របស់គណបក្សប្រជាជនកម្ពុជា គឺ “ការពង្រឹងអ្នកចាស់ និងបង្កើនអ្នកថ្មី”។ ឯកឧត្តមប្រធាន បានគូសបញ្ជាក់ថា សន្តិភាព និងការអភិវឌ្ឍ ជាចំណងមួយនៃកន្ទុយខ្សែពីរ ដែលពុំអាចកាត់ផ្តាច់ពីគ្នាបាន, សន្តិភាព និងស្ថិរភាពនយោបាយ ធ្វើឱ្យយើងធានាបានបរិយាកាសរួម សម្រាប់ការអភិវឌ្ឍ។

ឆ្លៀតក្នុងឱកាសនេះ ឯកឧត្តមប្រធាន បានចែករំលែកខ្លះៗអំពីចក្ខុវិស័យរបស់កម្ពុជា ឆ្នាំ២០៣០, ឆ្នាំ២០៥០ ដែលរាជរដ្ឋាភិបាល កើតចេញពីការបោះឆ្នោត និងដឹកនាំដោយគណបក្សប្រជាជនកម្ពុជា ត្រូវសម្រេចបានស្របតាមកម្មវិធីនយោបាយ និងបំណងប្រាថ្នារបស់ប្រជាជនកម្ពុជា គឺកម្ពុជាមានមហិច្ឆតាប្រែក្លាយជាប្រទេសដែលមានចំណូលកម្រិតខ្ពស់ ក្នុងឆ្នាំ២០៥០។

ជាមួយគ្នានេះ ឯកឧត្តមប្រធាន បានគូសរំលឹកអំពីអត្ថប្រយោជន៍មហាសាលនៃការកសាងព្រែកជីកហ្វូណន-តេជោ សម្រាប់ការលើកកម្ពស់ឯករាជ្យភាពនៃវិស័យដឹកជញ្ជូនតាមផ្លូវទឹក និងផលចំណេញចំពោះសេដ្ឋកិច្ចកម្ពុជា ៕