ឯកឧត្តម មាន ចាន់យ៉ាដា៖ កាន់មុខតំណែងជាអភិបាលខេត្ត ជាង ២ខែនេះ ខ្ញុំបន្តខិតខំអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ប្រកបដោយផ្លែផ្កា

ភ្នំពេញ៖ ឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានថ្លែងឲ្យដឹងថា ថ្វីត្បិតទើបតែបានចូលកាន់មុខតំណែងជាអភិបាលខេត្ត ក្នុងរយៈពេលជាង ២ខែកន្លងទៅថ្មីៗនេះ ប៉ុន្តែ រូបឯកឧត្ដម និងរដ្ឋបាលខេត្ត បានបន្តខិតខំចូលរួមអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ប្រកបដោយផ្លែផ្កា ។

ក្នុងពិធីប្រកាស ចូលកាន់មុខតំណែង អភិបាលរង នៃគណៈអភិបាលខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤ ឯកឧត្តម មាន ចាន់យ៉ាដា បានមានប្រសាសន៍ រាយការណ៍ជូន ដោយសង្ខេបនូវ ស្ថានភាព ភូមិសាស្ត្រ និងសមិទ្ធផលសំខាន់ៗ មួយចំនួន ដែលរដ្ឋបាល ខេត្ត សម្រេចបាន មានដូចតទៅ៖ ខេត្តឧត្តរមានជ័យ មានព្រំប្រទល់ខាងកើតជាប់ខេត្តព្រះវិហារ, ខាងលិចជាប់ខេត្តបន្ទាយមានជ័យ, ខាងត្បូងជាប់ខេត្តសៀមរាប និង ខាងជើងជាប់នឹងខេត្ត ០៣ របស់ប្រទេសថៃ គឺខេត្តបុរីរ៉ាំ, សុរិន្ទ និង ស៊ីសាកេត ដោយលាតសន្ធឹងជាប់ព្រំដែនប្រវែង ២២៤គីឡូម៉ែត្រ។

ឯកឧត្តម មាន ចាន់យ៉ាដា បានថ្លែងឲ្យដឹងថា ខេត្តមានក្រុង១ និងស្រុកចំនួន៤ ចែកជា ១៩ឃុំ ៥សង្កាត់ ស្មើនឹង ៣០៨ភូមិ ក្នុងនោះ មានផ្ទៃដីសរុប ៦.៦៥៥,៤០គ.ម២ មានប្រជាពលរដ្ឋសរុប ៦៥.៧៨៥គ្រួសារ ស្មើមនុស្ស ២៦៩.៦៥៦នាក់ (ស្ត្រី ១៣៣.៨៨៨នាក់) និងមានដង់ស៊ីតេ ៣៩នាក់/គ.ម២ ។ សេដ្ឋកិច្ចរបស់ខេត្ត ពឹងផ្អែកលើវិស័យសំខាន់ៗចំនួនបី រួមមាន វិស័យកសិកម្ម (ផ្តោតលើដំណាំកៅស៊ូ, ស្រូវ, ចេក, ស្វាយចន្ទី, ស្វាយ កែវរមៀត និងដំឡូងមី។ល។), វិស័យរ៉ែ (ផ្តោតលើរ៉ែមាស រ៉ែត្បូង សំណ និងរ៉ែធ្យូងថ្ម ប៉ុន្តែមិនទាន់ដំណើរការ) និងវិស័យទេសចរណ៍ (ផ្តោតលើ ទេសចរណ៍ធម្មជាតិ, ទេសចរណ៍វប្បធម៌ និងតំបន់ប្រវត្តិសាស្ត្រ) ហើយ មានច្រកទ្វារព្រំដែនអន្តរជាតិចំនួន៣ គឺ ច្រកទ្វារព្រំដែនអន្តរជាតិអូរស្មាច់ ស្ថិតនៅក្រុងសំរោង ច្រកទ្វារព្រំដែនអន្តរជាតិជាំ ស្ថិតនៅស្រុកអន្លង់វែង និងច្រកទ្វារព្រំដែនអន្តរជាតិជប់គគីរ ស្ថិតនៅស្រុកបន្ទាយអំពិល។ ដោយឡែក ខេត្តស្ថិតនៅលំដាប់ទី២៥ ដែលប្រជាពលរដ្ឋមានប្រាក់ ចំណូលទាប ប្រចាំឆ្នាំប្រមាណ ១៣០០ដុល្លារអាមេរិក/ ១នាក់/១ឆ្នាំ។

អភិបាលខេត្តឧត្តរមានជ័យ បានគូសបញ្ជាក់ថា «ថ្វីត្បិតរូបខ្ញុំ ទើបតែបានចូលកាន់មុខតំណែងជាអភិបាល នៃគណៈ អភិបាលខេត្ត ក្នុងរយៈពេលជាង ២ខែកន្លងទៅថ្មីៗនេះ ប៉ុន្តែ រូបខ្ញុំបាទ និងរដ្ឋបាលខេត្ត បានបន្តខិតខំចូលរួមអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលអាណត្តិទី៧ ប្រកបដោយផ្លែផ្កា ជាលទ្ធផលរដ្ឋបាលខេត្តក៏ដូចជាមន្ទីរ-អង្គភាព ក្រុង ស្រុក បានផ្តល់សេវាបម្រើប្រជាពលរដ្ឋយ៉ាងមានប្រសិទ្ធភាព និង ដំណើរការសកម្មភាពអភិវឌ្ឍលើគ្រប់វិស័យ ដើម្បីកាត់បន្ថយភាពក្រីក្រ របស់ប្រជាពលរដ្ឋ» ៕