ឯកឧត្តម ប៊ុន ហុន ជឿថា លោកអភិបាលរងខេត្តឧត្តរមានជ័យថ្មី នឹងខិតខំប្រឹងប្រែងអនុវត្ត តួនាទី ភារកិច្ចរបស់ខ្លួន ដើម្បីបន្តចូលរួមអភិវឌ្ឍមូលដ្ឋានខេត្ត ឲ្យកាន់តែរីកចម្រើន

ភ្នំពេញ៖ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានបង្ហាញជំនឿជឿជាក់ថា លោក ស៊ឹម វុទ្ធា អភិបាលរងខេត្តឧត្តរមានជ័យ ដែលទើបទទួលបានការតែងតាំងថ្មី នឹងខិតខំប្រឹងប្រែងអនុវត្ត តួនាទី ភារកិច្ចរបស់ខ្លួន តាមរយៈចំណេះដឹង សមត្ថភាព និងបទពិសោធន៍ ដើម្បីបន្តចូលរួមក្នុង ការងារដឹកនាំ គ្រប់គ្រង និងអភិវឌ្ឍមូលដ្ឋានខេត្តឧត្តរមានជ័យរបស់យើងឲ្យកាន់តែរីកចម្រើន និង ទទួលបានសមិទ្ធផលថ្មីៗថែមទៀត ។

ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រកាសចូលកាន់មុខតំណែងអភិបាលរង ខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន បានថ្លែងការកោតសរសើរ និងវាយតម្លៃខ្ពស់ចំពោះ ក្រុមប្រឹក្សា គណៈ អភិបាលខេត្តឧត្តរមានជ័យ មន្ត្រីរាជការគ្រប់លំដាប់ថ្នាក់ អាជ្ញាធរគ្រប់លំដាប់ថ្នាក់ និងប្រជាពលរដ្ឋ ទូទាំងខេត្ត ដែលបានខិតខំប្រឹងប្រែងរួមគ្នាយ៉ាងសកម្មក្នុងការបំពេញតួនាទី ភារកិច្ចប្រកបដោយ ស្មារតីទទួលខុសត្រូវខ្ពស់ ដើម្បីសម្រេចបាននូវសមិទ្ធផលក្នុងការធានាថែរក្សាសុខសន្តិភាព ស្ថិរភាព នយោបាយ ការរក្សាសន្តិសុខ សណ្តាប់ធ្នាប់សាធារណៈ ការលើកកម្ពស់លទ្ធិប្រជាធិបតេយ្យ និងជំរុញ ការអភិវឌ្ឍសេដ្ឋកិច្ចសង្គម ស្របតាមកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ក្រោមការ ដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដែលកំពុងដឹកនាំកម្ពុជាឈានឆ្ពោះទៅរកការសម្រេចបាន នូវចក្ខុវិស័យកម្ពុជាឆ្នាំ២០៥០។

ឯកឧត្ដមរដ្ឋលេខាធិការ បានបន្ថែមថា ថ្ងៃនេះ យើងបានជួបជុំគ្នាដើម្បីរៀបចំពិធីប្រកាសចូលកាន់មុខតំណែងអភិបាលរងឧត្តរមានជ័យ។ យោងតាមសំណូមពរចាំបាច់ លក្ខណៈសម្បត្តិ សមត្ថភាព និងបទ ពិសោធន៍ ការងារកន្លងមក រាជរដ្ឋាភិបាលបានសម្រេចតែងតាំង លោក ស៊ឹម វុទ្ធា មកពីទីស្តីការគណៈរដ្ឋមន្ត្រី ជាអភិបាលរងខេត្តឧត្តរមានជ័យ ជំនួសលោក ឌី រ៉ាដូ ដែលត្រូវបានផ្ទេរភារកិច្ចទៅជា អភិបាលរងខេត្តសៀមរាប។

ឆ្លៀតក្នុងឱកាសនេះ ឯកឧត្ដម ប៊ុន ហុន ក៏បានសំដែងនូវការអបអរសាទរ លោកអភិបាលរងខេត្ត ដែលត្រូវ បានរាជរដ្ឋាភិបាលសម្រេចតែងតាំងមុខតំណែងជាអភិបាលរងខេត្តឧត្តរមានជ័យ។ ឯកឧត្ដមជឿជាក់ថា «លោកអភិបាលរងខេត្តឧត្តរមានជ័យ ដែលទើបទទួលបានការតែងតាំងថ្មីនឹងខិតខំប្រឹងប្រែងអនុវត្ត តួនាទី ភារកិច្ចរបស់ខ្លួន តាមរយៈចំណេះដឹង សមត្ថភាព និងបទពិសោធន៍ ដើម្បីបន្តចូលរួមក្នុង ការងារដឹកនាំ គ្រប់គ្រង និងអភិវឌ្ឍមូលដ្ឋានខេត្តឧត្តរមានជ័យរបស់យើងឲ្យកាន់តែរីកចម្រើន និង ទទួលបានសមិទ្ធផលថ្មីៗថែមទៀត»។

ទន្ទឹមគ្នានោះដែរ ឯកឧត្ដមរដ្ឋលេខាធិការ ក៏បានស្នើឲ្យក្រុមប្រឹក្សា គណៈអភិបាល មន្ទីរអង្គភាព មន្ត្រីរាជការ កងកម្លាំងប្រដាប់ អាវុធគ្រប់លំដាប់ថ្នាក់ រដ្ឋបាលក្រុង ស្រុក និង រដ្ឋបាលឃុំ សង្កាត់ទាំងអស់ ផ្តល់ល់ការគាំទ្រដល់ លោកអភិបាលរងខេត្តឧត្តរមានជ័យដែលទើបនឹងទទួលការតែងតាំងថ្មី ដើម្បីបន្តរួមគ្នាថែរក្សា សុខសន្តិភាព ស្ថិរភាពនយោបាយ ស្ថិរភាពសង្គម សន្តិសុខ សណ្តាប់ធ្នាប់សាធារណៈ និងខិតខំ រួមគ្នាធ្វើការអភិវឌ្ឍមូលដ្ឋានខេត្តរបស់យើងឲ្យកាន់តែមានការរីកចម្រើនលើគ្រប់វិស័យបន្តទៀត ៕