ឯកឧត្តម ប៊ុន ហុន៖ សភាពការណ៍ក្នុងតំបន់ និងសកលលោក នៅតែបន្តវិវត្តន៍ប្រែប្រួលស្មុគស្មាញ ដោយសារការប្រកួតប្រជែងដណ្តើមភូមិសាស្ត្រនយោបាយ
ភ្នំពេញ៖ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានថ្លែងឲ្យដឹងថា ក្នុងឆ្នាំ២០២៤នេះ សភាពការណ៍សន្តិសុខ សេដ្ឋកិច្ចនៅក្នុងតំបន់ និងសកលលោក នៅតែ បន្តវិវត្តន៍ប្រែប្រួល ស្មុគស្មាញ និងពិបាកប៉ាន់ស្មាន ដោយសារតែការប្រកួតប្រជែងដណ្តើមភូមិសាស្ត្រ នយោបាយ វិបត្តិសង្គ្រាមរវាងរុស្ស៊ី-អ៊ុយក្រែន សង្គ្រាមរវាងអ៊ីស្រាអែល និងក្រុមហាម៉ាស-ប៉ាឡេស្ទីន ព្រមទាំងបញ្ហានៃការប្រែប្រួលអាកាសធាតុ រួមនឹងមានការរាតត្បាតនូវជំងឺអ៊ុតស្វា (Monkey Pox) បានជិះឥទ្ធិពលមកលើប្រទេសជាច្រើនក្នុងតំបន់ និយាយជារួម និងនិយាយឡែក ផលប៉ះពាល់មកលើ ស្ថានភាពសេដ្ឋកិច្ចរបស់ប្រទេសកម្ពុជា ។
ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ប្រកាសចូលកាន់មុខតំណែងអភិបាលរង ខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន បានគូសបញ្ជាក់ថា ទោះបីស្ថិតក្នុងបរិការណ៍អន្តរជាតិដ៏ស្មុគស្មាញ និង ពិបាកប៉ាន់ស្មានយ៉ាងណាក៏ដោយ រាជរដ្ឋាភិបាលអាណត្តិទី៧ នៃរដ្ឋសភានៅតែបន្តរក្សាបាននូវ សន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម ហើយបានបន្តពង្រឹង និងពង្រីកទំនាក់ ទំនងល្អជាមួយបណ្តាប្រទេសជាមិត្តទាំងអស់ ទាំងក្នុងក្របខណ្ឌទ្វេភាគី និងពហុភាគី រួមទាំងការធានា ឲ្យសម្រេចបាននូវកំណើនសេដ្ឋកិច្ច ក្នុងអត្រារង្វង់៦% សម្រាប់ឆ្នាំ២០២៤នេះ។
ឯកឧត្ដមរដ្ឋលេខាធិការ បានមានប្រសាសន៍ថា ទន្ទឹមនេះ ការងារកំណែទម្រង់វិមជ្ឈការ និងវិសហមជ្ឈការក៏មានវឌ្ឍនភាពយ៉ាងល្អប្រសើរ និងសម្រេចបានសមិទ្ធផលនានាជាច្រើន ក្នុងនោះរចនាសម្ព័ន្ធ ប្រព័ន្ធគ្រប់គ្រង និងនីតិវិធីបំពេញ ការងាររបស់រដ្ឋបាលថ្នាក់ក្រោមជាតិត្រូវបានរៀបចំ និងត្រូវបានពង្រឹងទាំងក្នុងក្របខ័ណ្ឌស្ថាប័ន ការលើកកម្ពស់សមត្ថភាពធនធានមនុស្ស និងប្រសិទ្ធភាពនៃការអនុវត្តការងារដើម្បីធានាដល់ការ លើកកម្ពស់គុណភាព និងប្រសិទ្ធភាពនៃការផ្តល់សេវាសាធារណៈ និងការអភិវឌ្ឍមូលដ្ឋានឆ្លើយតប ទៅនឹងតម្រូវការ និងដោះស្រាយបញ្ហាប្រឈមនានារបស់ប្រជាពលរដ្ឋបានទាន់ពេលវេលា និង ចំគោលដៅ។
ឯកឧត្ដមថ្លែងទៀតថា ជាមួយនឹងសមិទ្ធផលដែលរដ្ឋបាលខេត្តឧត្តរមានជ័យរួមចំណែកសម្រេចបាន ដូចបានគូស បញ្ជាក់ក្នុងរបាយការណ៍ស្វាគមន៍របស់ឯកឧត្តមអភិបាលខេត្ត គឺបានឆ្លុះបញ្ចាំងពីកិច្ចខិតខំប្រឹងប្រែង ក្នុងការចូលរួមអនុវត្តយ៉ាងសកម្មនូវកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលសម្រាប់នីតិកាលទី៧ នៃរដ្ឋសភា ដើម្បីជំរុញល្បឿននៃការអភិវឌ្ឍប្រទេសជាតិឱ្យ ឈានឆ្ពោះទៅសម្រេចបានចក្ខុវិស័យ “កម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០” ៕
