មន្ត្រីជាន់ខ្ពស់ក្រសួងមហាផ្ទៃ៖ អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវប្រមូលផ្តុំ យកចិត្តទុកដាក់លើការងារសំខាន់ៗ ៦ចំណុច
ភ្នំពេញ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែង អភិបាលរងខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានថ្លែងថា អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវប្រមូលផ្តុំយ កចិត្ត ទុកដាក់លើការងារសំខាន់ៗចំនួន ៦ចំណុច ។
ឯកឧត្ដមគូសបញ្ជាក់ថា ការថែរក្សា និងពង្រឹងសន្តិភាព ស្ថិរភាពនយោបាយ សន្តិសុខ និងសណ្តាប់ធ្នាប់សាធារណៈ គឺជាកិច្ចការអាទិភាពខ្ពស់បំផុត ដែលអាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់ត្រូវតែប្តូរផ្តាច់ រក្សាឲ្យបានគង់វង្ស។ ពីព្រោះសុខសន្តិភាព និងស្ថិរភាពនយោបាយគឺជាកត្តាសត្យានុម័តនៃការធានា ឲ្យមានលទ្ធិប្រជាធិបតេយ្យ នីតិរដ្ឋ និងការអភិវឌ្ឍប្រកបដោយចីរភាពលើគ្រប់វិស័យ និងភាពសុខដុម នៅក្នុងសង្គម។
ឯកឧត្ដមរដ្ឋលេខាធិការ បានថ្លែងបន្តថា ហេតុនេះ អាជ្ញាធរ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវប្រមូលផ្តុំយកចិត្ត ទុកដាក់លើការងារសំខាន់ៗ ដូចខាងក្រោម៖
-គណៈបញ្ជាការឯកភាពគ្រប់លំដាប់ថ្នាក់ ត្រូវពង្រឹងការគ្រប់គ្រងការងារសន្តិសុខ និង សណ្តាប់ធ្នាប់សាធារណៈ ពិសេស ត្រូវពង្រឹងការគ្រប់គ្រងសភាពការណ៍តាមមូលដ្ឋាន ដើម្បីដាក់ចេញ នូវវិធានការនានា សំដៅទប់ស្កាត់ និងបង្ក្រាបឲ្យបានទាន់ពេលវេលានូវរាល់ បទល្មើសគ្រប់ប្រភេទ និង សកម្មភាពប៉ុនប៉ងបង្កឲ្យមានភាពចលាចលវឹកវរ និងអសន្តិសុខ ក្នុងសង្គម
-អាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់នៃរដ្ឋបាលខេត្តឧត្តរមានជ័យ ត្រូវរួមគ្នា បន្តទប់ស្កាត់នូវរាល់ឧបាយកល និងសកម្មភាពទាំងឡាយណាដែលប៉ុនប៉ងបង្កចលាចលក្នុងសង្គម ជាតិ ការប៉ុនប៉ងបង្កើតបដិវត្តន៍ពណ៌ និងការពារឲ្យបានជាដាច់ខាតនូវសុខសន្តិភាព ស្ថិរភាពនយោបាយ អធិបតេយ្យជាតិ បូរណភាពទឹកដី ព្រះមហាក្សត្រ និងរាជរដ្ឋាភិបាលស្របច្បាប់ ដែលកើតឡើងពីការ បោះឆ្នោត ទោះបីជាក្នុងតម្លៃណាក៏ដោយ
-ត្រូវខិតខំស្រាវជ្រាវ ស៊ើបអង្កេត និងបង្ក្រាបបទល្មើសគ្រឿងញៀនខុសច្បាប់ តាមរយៈការ បំផុសចលនាក្នុងសង្គមទាំងមូលឲ្យចូលរួមជាមួយអាជ្ញាធរ និងកងកម្លាំងមានសមត្ថកិច្ចក្នុងការ អនុវត្តផែនការស្តីពីយុទ្ធនាការប្រយុទ្ធប្រឆាំងគ្រឿងញៀនខុសច្បាប់ឲ្យកាន់តែមានប្រសិទ្ធភាពថែម ទៀត ដើម្បីចូលរួមទប់ស្កាត់សកម្មភាពជួញដូរ ប្រើប្រាស់គ្រឿងញៀននៅកម្ពុជា និងកាត់ផ្តាច់បណ្តាញឧក្រិដ្ឋជនគ្រឿងញៀនមិនឲ្យប្រើប្រាស់កម្ពុជាជាគោលដៅនៃការផលិត ការកែច្នៃគ្រឿងញៀនខុស ច្បាប់ដើម្បីចែកចាយទៅកន្លែងផ្សេងៗទៀត
-ត្រូវខិតខំបង្ការ ទប់ស្កាត់ និងបង្ក្រាបអំពើជួញដូរមនុស្ស ជួញដូរពលកម្មកុមារ អាជីវកម្ម ផ្លូវភេទ និងល្បែងស៊ីសងខុសច្បាប់គ្រប់ប្រភេទ ឲ្យមានប្រសិទ្ធភាពខ្ពស់តាមបទបញ្ជារបស់រាជរដ្ឋាភិបាល ដែលបានដាក់ចេញនាពេលកន្លងមក
-បន្តយុទ្ធនាការពង្រឹងការអនុវត្តច្បាប់ស្តីពីចរាចរផ្លូវគោកឲ្យបានសកម្មផុលផុសជាប់ជា ប្រចាំ សំដៅកាត់បន្ថយបន្ថែមទៀតនូវគ្រោះថ្នាក់ដល់អាយុជីវិត និងទ្រព្យសម្បត្តិរបស់ប្រជាជន និង ធនធាននានាក្នុងសង្គម
-ជំរុញ និងបំផុសចលនាឲ្យមានការចូលរួមអនុវត្តគោលនយោបាយ “ភូមិ ឃុំ សង្កាត់មាន សុវត្ថិភាព” របស់រាជរដ្ឋាភិបាលឲ្យកាន់តែមានប្រសិទ្ធភាពថែមទៀតក្នុងភូមិសាស្ត្ររបស់ខ្លួនទាំងមូល ពិសេសការបង្ការ និងបង្ក្រាបបទល្មើសលួច ឆក់ ប្លន់ គ្រឿងញៀន ល្បែងស៊ីសងខុសច្បាប់ និងបទ ល្មើសគ្រប់ប្រភេទ ៕
