រដ្ឋលេខាធិការក្រសួងមហាផ្ទៃ ឲ្យរដ្ឋបាលខេត្តឧត្តរមានជ័យ ពិនិត្យតាមដាន និងគាំទ្រដល់ដំណើរការការិយាល័យច្រកចេញចូលតែមួយ និងការិយាល័យពលរដ្ឋ ដើម្បីធានាថាការផ្តល់សេវា ដំណើរការប្រកបដោយតម្លាភាព និងគណនេយ្យភាព

ភ្នំពេញ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែង អភិបាលរងខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានថ្លែងណែនាំឲ្យ រដ្ឋបាលខេត្តឧត្តរមានជ័យ ពិនិត្យតាមដាន និងគាំទ្រដល់ដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋ ដើម្បីធានាថាការផ្តល់សេវារដ្ឋបាលទាំងនេះដំណើរការប្រកបដោយតម្លាភាព និងគណនេយ្យភាព ស្របតាមគោលការណ៍ បែបបទ និងនីតិវិធីដែលបានកំណត់។

ជាមួយគ្នានោះដែរ ឯកឧត្ដម ប៊ុន ហុន បានលើកឡើងថា ការអនុវត្តកម្មវិធីកំណែទម្រង់វិមជ្ឈការ និង វិសហមជ្ឈការក្នុងរយៈពេលជាង២ទសវត្សរ៍ កន្លងទៅ រដ្ឋបាលថ្នាក់ក្រោមជាតិ បានក្លាយជាស្ថាប័នដែលមានរចនាសម្ព័ន្ធ ប្រព័ន្ធអភិបាលកិច្ច នីតិវិធីបំពេញការងារ សិទ្ធិអំណាច និងការទទួលខុសត្រូវ កាន់តែច្បាស់លាស់ ប្រកបដោយភាពជាម្ចាស់ ក្នុងការផ្តល់សេវាសាធារណៈ និងការអភិវឌ្ឍមូលដ្ឋាន ដើម្បីឆ្លើយតបទៅនឹងតម្រូវការជាក់ស្តែងរបស់ ប្រជាពលរដ្ឋ បានទាន់ពេល ប្រកបដោយប្រសិទ្ធភាព ស័ក្តិសិទ្ធភាព តម្លាភាព និងគណនេយ្យភាព។

ឯកឧត្ដមបន្តថា ក្នុងដំណើរការអនុវត្តកម្មវិធីកំណែទម្រង់តាមបែបប្រជាធិបតេយ្យនៅថ្នាក់ក្រោមជាតិ រាជរដ្ឋាភិបាល បានផ្ទេរមុខងារក្នុងវិស័យសង្គមកិច្ច ពាក់ព័ន្ធនឹងការគ្រប់គ្រងមណ្ឌលថែទាំកុមាររបស់រដ្ឋ និងមុខងារ ក្នុងវិស័យសុខាភិបាល ដល់រដ្ឋបាលរាជធានី ខេត្ត រួមនឹងមុខងារពាក់ព័ន្ធការគ្រប់គ្រងសាលាបឋម សិក្សា ការអប់រំក្នុង និងក្រៅប្រព័ន្ធក្នុងវិស័យអប់រំក៏ត្រូវបានផ្ទេរដល់រដ្ឋបាល ក្រុង ស្រុក ខណ្ឌផងដែរ។

ឯកឧត្ដមរដ្ឋលេខាធិការ បន្ថែមថា ក្នុងន័យនេះ រដ្ឋបាលខេត្តឧត្តរមានជ័យ ត្រូវសហការចូលរួមអនុវត្តប្រកបដោយភាពម្ចាស់ការ និងការទទួលខុសត្រូវខ្ពស់ ក្នុងក្របខណ្ឌសមត្ថកិច្ច និងការទទួលខុសត្រូវរបស់ខ្លួន លើការដឹកនាំ គ្រប់គ្រង ការចាត់ចែង ការអនុវត្តមុខងារ និងប្រើប្រាស់ធនធាននានាដែលបានផ្ទេរ ជាពិសេសមុខងារ វិស័យ សុខាភិបាល មុខងារអប់រំ និងមុខងារផ្តល់សេវារដ្ឋបាល ដើម្បីធានាផ្តល់សេវាទាំងនោះជូនប្រជា ពលរដ្ឋឲ្យបានឆាប់រហ័ស ប្រកបដោយតម្លាភាព គណនេយ្យភាព ប្រសិទ្ធភាព និងបរិយាបន្ន។

ឯកឧត្ដម ប៊ុន ហុន គូសបញ្ជាក់ថា «ជាមួយគ្នានេះ ត្រូវខិតខំសម្របសម្រួល និងពង្រឹងការផ្តល់សេវាតាមអង្គភាពច្រកចេញចូលតែមួយ ដើម្បីបង្កលក្ខណៈងាយស្រួលជូនប្រជាពលរដ្ឋមកទទួលសេវានៅកន្លែងតែមួយ ព្រមទាំងពិនិត្យតាមដាន និងគាំទ្រដល់ដំណើរការការិយាល័យច្រកចេញចូលតែមួយ និងការិយាល័យប្រជាពលរដ្ឋ ដើម្បីធានាថាការផ្តល់សេវារដ្ឋបាលទាំងនេះដំណើរការប្រកបដោយតម្លាភាព និងគណនេយ្យភាព ស្របតាមគោលការណ៍ បែបបទ និងនីតិវិធីដែលបានកំណត់» ៕