ឯកឧត្ដម ប៊ុន ហុន៖ រដ្ឋបាលខេត្តឧត្ដរមានជ័យ ត្រូវរៀបចំផែនការអភិវឌ្ឍរយៈពេល៥ឆ្នាំ របស់ខ្លួនឲ្យបានតាមច្បាប់ លិខិតបទដ្ឋានគតិយុត្ត និងទាន់ពេលវេលា
ភ្នំពេញ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែង អភិបាលរងខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន រដ្ឋលេខាធិការ ក្រសួងមហាផ្ទៃ បានថ្លែងថា រដ្ឋបាលខេត្តឧត្ដរមានជ័យ ត្រូវរៀបចំផែនការអភិវឌ្ឍរយៈពេល៥ឆ្នាំ (២០២៥-២០២៩) របស់ខ្លួនឲ្យបានតាមច្បាប់ លិខិតបទដ្ឋានគតិយុត្ត និងទាន់ពេលវេលា ពោលគឺរៀបចំឲ្យបានចប់សព្វគ្រប់ក្នុងឆ្នាំទី១នៃ អាណត្តិក្រុមប្រឹក្សា ។
ឯកឧត្ដមបញ្ជាក់ថា ផែនការអភិវឌ្ឍរបស់ខេត្ត គឺជាផែនទីបង្ហាញផ្លូវដល់រដ្ឋបាលខេត្តប្រើប្រាស់ ជាមូលដ្ឋានដ៏សំខាន់សម្រាប់ធ្វើសេចក្តីសម្រេចចិត្តអំពីការអភិវឌ្ឍលើគ្រប់វិស័យក្នុងដែនសមត្ថកិច្ច របស់ខ្លួន ធានាការលើកកម្ពស់គុណភាពជីវិតរបស់ប្រជាពលរដ្ឋក្នុងមូលដ្ឋាន និងការរៀបចំកម្មវិធី វិនិយោគបីឆ្នាំរំកិល ក្របខ័ណ្ឌចំណាយមធ្យម និងថវិកាប្រចាំឆ្នាំរបស់ខេត្ត។
ឯកឧត្ដមរដ្ឋលេខាធិការ លើកឡើងទៀតថា បន្ថែមលើសពីនេះទៀត រដ្ឋបាលខេត្តត្រូវខិតខំទាក់ទាញការវិនិយោគ (ក្រោម៥លានដុល្លា) និងការបណ្តាក់ទុនប្រកបអាជីវកម្មនានាពីប្រភពក្នុង និងក្រៅប្រទេសស្របតាមគោលនយោបាយរបស់ រាជរដ្ឋាភិបាល ជាពិសេសជាមួយខេត្ត ក្រុងសម្ព័ន្ធមេត្រីភាពនៃបណ្តាប្រទេសជាមិត្ត ព្រមទាំងខិតខំ កៀរគរការចូលរួមថវិកា និងជំនួយបច្ចេកទេសពីក្រសួង ស្ថាប័នពាក់ព័ន្ធ ដៃគូអភិវឌ្ឍន៍ អង្គការ សង្គមស៊ីវិល និងសប្បុរសជននានា ដើម្បីចូលរួមចំណែកជំរុញការអភិវឌ្ឍខេត្តបន្ថែមទៀត ៕
