ឯកឧត្តម ប៊ុន ហុន ណែនាំដល់រដ្ឋបាលខេត្តឧត្ដរមានជ័យ អំពីការដឹកនាំ ការគ្រប់គ្រង និងរបៀបរបបបំពេញការងារ

ភ្នំពេញ៖ ក្នុងឱកាសអញ្ជើញជាតំណាងដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែង អភិបាលរងខេត្តឧត្តរមានជ័យ នាថ្ងៃទី២៣ ខែកញ្ញា ឆ្នាំ២០២៤នេះ ឯកឧត្តម ប៊ុន ហុន រដ្ឋលេខាធិការក្រសួងមហាផ្ទៃ បានណែនាំដល់រដ្ឋបាលខេត្តឧត្ដរមានជ័យ អំពីការដឹកនាំ ការគ្រប់គ្រង និងរបៀបរបបបំពេញការងារ ។

ការដឹកនាំ ការគ្រប់គ្រង និងរបៀបរបបបំពេញការងារទាំងនោះរួមមានដូចខាងក្រោម៖
– ជាគោលការណ៍ក្នុងការគ្រប់គ្រង និងដឹកនាំរដ្ឋបាលខេត្ត ក្រុង ស្រុក មានតួអង្គសំខាន់២ គឺ ក្រុមប្រឹក្សា និងគណៈអភិបាលខេត្ត។ ដូច្នេះ ក្រុមប្រឹក្សា និងគណៈអភិបាល ត្រូវខិតខំអនុវត្តឲ្យបាន ត្រឹមត្រូវនូវសិទ្ធិអំណាច តួនាទី និងភារកិច្ចរៀងៗខ្លួនស្របតាមច្បាប់ និងលិខិតបទដ្ឋានជាធរមាន ក្នុង នោះប្រធានក្រុមប្រឹក្សា និងអភិបាល ត្រូវរក្សាសាមគ្គីភាពដោយត្រូវធ្វើការសម្របសម្រួល ពិភាក្សា និងពិគ្រោះយោបល់គ្នា ដើម្បីលើកឡើងនូវគំនិតផ្តួចផ្តើម និងដំណោះស្រាយលើបញ្ហាសំខាន់ៗ សម្រាប់ដាក់បញ្ចូលក្នុងរបៀបវារៈកិច្ចប្រជុំក្រុមប្រឹក្សា។

– រដ្ឋបាលគ្រប់លំដាប់ថ្នាក់នៃខេត្តឧត្តរមានជ័យ ត្រូវពង្រឹងការគ្រប់គ្រងវត្តមានក្នុងការបំពេញ ការងាររបស់មន្ត្រីរាជការ បុគ្គលិក និងត្រូវពង្រឹងការងារតែងតាំង ការដំឡើងថ្នាក់ ឋានន្តរសិក្តិស្រប តាមច្បាប់ គោលការណ៍ បែបបទ និងនីតិវិធីដែលបានកំណត់ និងចូលរួមចំណែកក្នុងអនុវត្តអោយ ទទួលបានជោគជ័យនៃវិធានគន្លឹះក្នុងកែទម្រង់រដ្ឋបាលសាធារណៈរបស់រាជរដ្ឋាភិបាល។

– រដ្ឋបាលខេត្ត ត្រូវខិតខំធ្វើការបណ្តុះបណ្តាលកសាងសមត្ថភាពដល់មន្ត្រី រាជការគ្រប់ លំដាប់ថ្នាក់ នៃខេត្តរបស់ខ្លួន និងជំរុញលើកទឹកចិត្តមន្ត្រីឲ្យចូលរួមក្នុងការអភិវឌ្ឍសមត្ថភាព ពិសេស សមត្ថភាពជំនាញព័ត៌មានវិទ្យា និងឌីជីថលដើម្បីឈោងចាប់យកបច្ចេកវិទ្យាទំនើបៗ ក្នុងការអនុវត្ត ការងារឲ្យកាន់តែឆាប់រហ័ស និងមានប្រសិទ្ធភាពខ្ពស់ ៕