ឯកឧត្តម ហ៊ុន ម៉ានី៖ ក្នុងនាមជាយុវជនបន្តវេនត្រូវតែសិក្សាឱ្យបានស៊ីជម្រៅទៅលើប្រវត្តិសាសស្រ្ត ស្វែងយល់ពីអ្វីដែលជាអត្ថប្រយោជន៍ពិតប្រាកដដែលនាំមកនូវផលប្រយោជន៍ជូនប្រទេសជាតិ និងប្រជាជន
ភ្នំពេញ៖ ក្នុងឱកាសនៃការចូលរួមកិច្ចសន្ទនារវាងយុវជននៃឆ្នាំផ្លាស់ប្តូរវាងប្រជាជនកម្ពុជា-ចិន ឆ្នាំ២០២៤ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជាបានផ្ញើសារដល់យុវជនជំនាន់ក្រោយតាមរយៈការឆ្លើយតបទៅនឹងសំណួររបស់ប្អូនប្រុស លីម គឹមហូវ និស្សិតជំនាញវិទ្យាសាស្រ្តនយោបាយនៃរាជបណ្ឌិត្យសភាកម្ពុជា ក្នុងការត្រៀមខ្លួនក្លាយជាយុវជនបន្តវេន ដោយ ឯកឧត្តមបានគូសបញ្ជាក់ថា ក្នុងនាមជាយុវជនបន្តវេនត្រូវតែសិក្សាឱ្យបានស៊ីជម្រៅទៅលើប្រវត្តិសាសស្រ្ត ស្វែងយល់ពីអ្វីដែលជាអត្ថប្រយោជន៍ពិតប្រាកដដែលនាំមកនូវផលប្រយោជន៍ជូនប្រទេសជាតិ និងប្រជាជន ជាពិសេសការចាប់យកឱកាសក្នុងវេទិកាណាដែលអាចចូលរួមជំរុញដល់ទំនាក់ទំនង និងផ្សព្វផ្សាយពីអត្ថប្រយោជន៍ដែលកម្ពុជាទទួលបាន។
ឯកឧត្តមបានរំលេចដែរថា ដើម្បីថែរក្សាចំណងមិត្តភាពកម្ពុជា-ចិន យុវជនជំនាន់ក្រោយ ត្រូវស្វែងយល់ពីសេចក្តីសម្រេច និងគោលនយោបាយទាំងអស់ដែលថ្នាក់ដឹកនាំសម្រេចបានជាមួយគ្នា ស្វែងយល់ឲ្យបានកាន់តែស៊ីជម្រៅអំពីកិច្ចសហប្រតិបត្តិការកន្លងមករវាងប្រទេសទាំងពីរ។
ក្រៅពីមតិផ្ដាំផ្ញើឯកឧត្តមក៏បានជំរុញ និងលើកទឹកចិត្តឱ្យយុវជនជំនាន់ក្រោយរបស់ប្រទេសទាំងពីរបន្តថែរក្សា ពង្រឹង និងពង្រីកទំនាក់ទំនងនេះ ឱ្យដូចអ្វីដែលថ្នាក់ដឹកនាំជំនាន់មុនគ្រប់ដំណាក់កាល និងបច្ចុប្បន្នបានចាប់ផ្ដើម ហើយទាំងអស់គ្នាចូលរួមចំណែករួមគ្នា ថែរក្សាចំណងមិត្តភាពនេះ៕
