ឯកឧត្តម អ៊ុំ រាត្រី និងលោកជំទាវ នាំយកអង្ករ ២.៦៥០គីឡូក្រាម ផ្ដល់ជូនមជ្ឈមណ្ឌលជីវិតថ្មី ភ្នំបាក់
ភ្នំពេញ៖ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងលោកជំទាវ ជ័យ ណារី ព្រមទាំងក្រុមការងារ នៅថ្ងៃទី២៣ ខែកញ្ញា ឆ្នាំ ២០២៤ បាននាំយកនូវអង្ករចំនួន២.៦៥០គីឡូក្រាម ផ្ដល់ជូនមជ្ឈមណ្ឌលជីវិតថ្មី ភ្នំបាក់សម្រាប់ចាត់ចែងប្រើប្រាស់ ប្រចាំថ្ងៃ។
ក្នុងឱកាសនោះដែរឯកឧត្តម អ៊ុំ រាត្រី ក៏បានជួបសំណេះសំណាល ជាមួយនឹងជនបន្សាបគ្រឿងញៀននៅក្នុងមណ្ឌល និងបានណែនាំទៅដល់ពួកគេ ត្រូវខិតខំកែប្រែខ្លួន ស្តាប់នូវដំបូន្មាន របស់ថ្នាក់ដឹកនាំគ្រប់គ្រងមណ្ឌល ជាពិសេសត្រូវចាប់យកនូវចំណេះជំនាញ ដែលកំពុងសិក្សា ដើម្បីជាឱកាសសម្រាប់យកចំណេះជំនាញ ដែលបានរៀនសូត្រនេះ ពេលត្រលប់ទៅជួបជុំគ្រួសារវិញ យើងត្រូវយកចំណេះជំនាញទាំងនោះយកទៅបើករបរកស៊ី សម្រាប់ជាចំណូលប្រចាំ ផ្គត់ផ្គង់ គ្រួសារជាដើម។
មួយវិញទៀតឯកឧត្តម ក៏បានផ្ញើសារ ណែនាំដល់យុវជនទាំងអស់ពេលត្រឡប់ទៅមូលដ្ឋានជួបជុំក្រុមគ្រួសារវិញ ត្រូវចៀសឱ្យឆ្ងាយពីគ្រឿងញៀន និងផ្សព្វផ្សាយពីផលប៉ះពាល់ អំពីគ្រឿងញៀនទៅដល់មិត្តភក្តិ ឪពុកម្តាយ សហគមន៍ ឱ្យបានយល់ច្បាស់ពីផលប៉ះពាល់បញ្ហាគ្រឿងញៀន ។
សូមបញ្ជាក់ផងដែរថា៖ ក្នុងមណ្ឌល ជីវិតថ្មី ភ្នំបាក់ ស្ថិតនៅភូមិភ្នំបាក់ សង្កាត់ទឹកថ្លា ក្រុងសិរីសោភ័ណ បច្ចុប្បន្នមានជនបន្សាបគ្រឿងញៀន សរុបចំនួន ១.១៤៧នាក់/ស្រី៦៣នាក់។ ក្នុងនោះក៏មានការបណ្តុះបណ្តាលជំនាញរួមមាន ៖ សាឡន, ជួសជុលម៉ូតូ, តបណ្តាញទឹក, ម៉ាស៊ីនត្រជាក់រថយន្ត, ម៉ាស៊ីនត្រជាក់តាមគេហដ្ឋាន, ជួសជុលរថយន្ត, អគ្គីសនី, កុំព្យួទ័រ, ភាសាកូរ៉េ, ភាសាចិន និងភាសាអង់គ្លេសផងដែរ ៕
