ឯកឧត្តម នេត្រ ភក្ត្រា អំពាវនាវដល់ប្រជាពលរដ្ឋរស់នៅតាមដងទន្លេមេគង្គ ជាពិសេសខេត្តស្ទឹងត្រែង និងខេត្តក្រចេះ សូមប្រុងប្រយ័ត្នខ្ពស់ ខណៈទឹកទន្លេមេគង្គនៅតែបន្តឡើង

ភ្នំពេញ៖ តាមរយៈបណ្ដាញសង្គមឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តក្រចេះ អំពាវនាវដល់ប្រជាពលរដ្ឋរស់នៅតាមដងទន្លេមេគង្គ ជាពិសេសខេត្តស្ទឹងត្រែង និងខេត្តក្រចេះ សូមប្រុងប្រយ័ត្នខ្ពស់ ខណៈទឹកទន្លេមេគង្គនៅតែបន្តឡើង។

សូមបញ្ជាក់ថានៅថ្ងៃទី២៤ ខែកញ្ញា ឆ្នាំ២០២៤ នេះ ស្ថានភាពទឹកជំនន់ទន្លេមេគង្គនៅខេត្តក្រចេះមានកម្ពស់ ២១,៤០ម៉ែត្រ កើនឡើង ០,២២ម៉ែត្រ ធៀបនឹងថ្ងៃម្សិលមិញកម្ពស់ ២១,១៨ម៉ែត្រ ខណៈកម្ពស់ទឹកដែលត្រូវប្រុងប្រយ័ត្ន គឺ ២២ម៉ែត្រ។

យោងតាមទិន្នន័យទឹកជំនន់ក្នុងអាងទន្លេមេគង្គក្រោម កម្ពស់ទឹកនៅទន្លេមេគង្គក្នុងខេត្តស្ទឹងត្រែង និងក្រចេះអាចនឹងឡើងដល់កម្រិតប្រុងប្រយ័ត្នក្នុងរយៈពេលប៉ុន្មានថ្ងៃខាងមុខ ករណីបន្តមានភ្លៀងធ្លាក់ខ្លាំងដោយកន្លែង និងធ្លាក់ខ្លាំងជោគជាំ៕